مەملەكەت باسشىسىنىڭ ءوزى ايرىقشا نازار اۋدارىپ وتىرعان ماسەلەنىڭ ءبىرى – مەكتەپتەگى قاۋىپسىزدىك. جاسىراتىنى جوق, بالالاردىڭ قاۋىپسىزدىگىن قامتاماسىز ەتۋدە كوپتەگەن كەمشىلىكتەرگە جول بەرىپ وتىرمىز. پروكۋراتۋرا وكىلدەرى اشىق ايتقان جايتتار ءبارىمىزدى ويلاندىرۋى ءتيىس. ماسەلەن, بالالار مەن جاسوسپىرىمدەر اراسىنداعى قۇقىق بۇزۋشىلىق, سۋيتسيد فاكتىلەرىنىڭ ازايماۋى – وسىنداي قىلمىستاردىڭ الدىن الۋ جۇمىسىنىڭ جۇرگىزىلمەۋى يا بولماسا ناشار جۇرگىزىلۋىنىڭ ناتيجەسى. ءبىر عانا الاڭداتارلىق فاكت, 2023 جىلى بالالارعا قاتىستى جىنىستىق سيپاتتاعى قىلمىس وسكەن. بيىل 24 بالاعا جىنىستىق زورلىق جاسالعان. بىلتىر 83 بالا سۋيتسيد جاساپ, 12-ءسى امان قالسا, بيىل 3 بالا وزىنە-ءوزى قول سالعان. بۇل – ءبىر عانا وتباسىنىڭ قايعىسى ەمەس, كۇللى قوعام بولىپ كۇرەسەتىن ماسەلە.
استانا قالاسىنىڭ ءبىلىم باسقارماسى ادىستەمەلىك ورتالىعىمەن بىرلەسە وتىرىپ اقسەلەۋ سەيدىمبەك اتىنداعى №54 مەكتەپ-ليتسەي بازاسىندا «قاۋىپسىز بالالىق شاق» تاقىرىبىندا سەمينار-كەڭەس وتكىزدى.
ءىس-شاراعا تەحنيكالىق جانە كاسىپتىك, جالپى ورتا ءبىلىم بەرۋ ۇيىمدارىنىڭ باسشىلارى, مەكتەپكە دەيىنگى ءبىلىم بەرۋ ۇيىمدارىنىڭ مەڭگەرۋشىلەرى, جەكەمەنشىك بالاباقشالاردىڭ قاۋىمداستىعىنىڭ جانە اتا-انالار كوميتەتىنىڭ مۇشەلەرى قاتىستى.
جيىن استانا قالاسى اكىمىنىڭ ورىنباسارى ەسەت بايكەننىڭ توراعالىعىمەن ءوتتى, سەمينار-كەڭەسكە وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا, استانا قالاسى پروكۋرورىنىڭ كامەلەتكە تولماعاندار بويىنشا اعا كومەكشىسى ايگەرىم ومىرزاقوۆا, قالالىق پوليتسيا دەپارتامەنتى جەرگىلىكتى پوليتسيا قىزمەتى باسقارماسى باستىعىنىڭ ورىنباسارى, پوليتسيا پولكوۆنيگى قانات نىسانتاەۆ, توتەنشە جاعدايلار دەپارتامەنتى باستىعىنىڭ ورىنباسارى دامير ەرماعامبەتوۆ, «نازارباەۆ زياتكەرلىك مەكتەبى» دەربەس ءبىلىم بەرۋ ۇيىمىنىڭ بالالاردىڭ ءال-اۋقاتى دەپارتامەنتىنەن ءاليا ابكەنوۆا, استانا قالاسى ءبىلىم باسقارماسى باسشىسى قاسىمحان سەنعازىەۆ قاتىسىپ, بالا قاۋىپسىزدىگىنە قاتىستى باياندامالار جاسادى, ءبىلىم بەرۋ ۇيىمدارىنىڭ وكىلدەرىنىڭ سۇراقتارىنا جاۋاپ بەردى.
– كەيىنگى كەزدەرى ءبىزدىڭ الەۋمەتتىك قوعامدا بايقالىپ جاتقان تەندەنتسيالىق فاكتورلار شۇعىل تۇردە بالا قاۋىپسىزدىگىنە قاتىستى جيىندى جوسپاردان تىس وتكىزۋدى قاجەت ەتتى, وسى باعىتتا ناقتى جۇمىس جاسالۋى ءتيىس دەپ ەسەپتەيمىن. كۇندەلىكتى بالالاردىڭ قاۋىپسىزدىگى, دەنساۋلىعى, ومىرىنە جاۋاپتى ءبىلىم مەكەمەلەرىنىڭ وسىعان قاتىستى ەڭ وزەكتى ساۋالدارىن, ماسەلەلەرىن ءدال وسى جەردە, وسى وتىرعان ساراپشىلارمەن بىرگە تالقىلاپ, وسى تاراپتا جۇمىستى جانداندىرۋىمىز قاجەت. ويتكەنى ماماندار كەلتىرگەن دەرەكتەر مەن دايەكتەر, كورسەتكىشتەر الاڭداتادى. بۇل – بالاعا, ونىڭ وتباسىنا, وقۋ ورداسىنا قاتىستى مالىمەت قانا ەمەس, ءار بالا ءبىزدىڭ ۇلانىمىز, ءبىزدىڭ بولاشاعىمىز, سوندىقتان, بۇل قوعام بولىپ, بالا تاربيەسىندەگى ولقىلىقتارعا, ادام تۇرشىگەرلىك تسيفرلارعا بەيجاي قاراماي, ونى بولدىرماۋعا جانىمىزدى سالا كۇرەسۋىمىز قاجەت, – دەدى ەسەت بايكەن ءوزىنىڭ سوزىندە.
سەمينار-كەڭەستە سپيكەرلەر كەلتىرگەن دەرەكتەر مەن دايەكتەر, بالاعا قاتىستى قىلمىستىق فاكتىلەر, بۋللينگتەر, ءتۇرلى قيىندىقتارعا تاپ بولۋى – بالالاردىڭ ءومىرىن, دەنساۋلىعىن ساقتاۋ جولىندا, ءبىلىم بەرۋ مەكەمەلەرىندەگى قاۋىپسىزدىكتى قامتاماسىز ەتۋ باعىتىندا جۇيەلى شارالار قابىلداۋ كەرەكتىگىن اڭعارتتى. بۇل – مەملەكەتتىڭ اسا ماڭىزدى مىندەتتەرىنىڭ ءبىرى.
