نۇر-سۇلتان قالاسى ءماسليحاتىنىڭ الەۋمەتتىك-مادەني دامۋ ماسەلەلەرى جونىندەگى تۇراقتى كوميسسياسىنىڭ وتىرىسىندا ەلورداداعى بالالار-جاسوسپىرىمدەر سپورت مەكتەپتەرىن دامىتۋ جوسپارى تالقىلاندى. ءتيىستى باياندامانى قالالىق دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ جاسادى.
ونىڭ مالىمدەۋىنشە, قازىر ەلوردادا بالالار مەن جاسوسپىرىمدەرگە ارنالعان 11 سپورت مەكتەبى جۇمىس ىستەيدى. بۇل مەكتەپتەردە سپورتتىڭ 60 ءتۇرى بويىنشا 9 مىڭعا جۋىق وقۋشى ءۇشىن جاتتىعۋلار وتەدى. باپكەرلەردىڭ جالپى سانى – 408 ادام.
– بالالار-جاسوسپىرىمدەر سپورت مەكتەپتەرىنىڭ كەيبىرىندە سپورتتىق بازالار جوق. وقۋ-جاتتىعۋ شارالارى جالعا الىنعان بازالار مەن سپورت نىساندارىندا وتەدى, – دەدى س.جىلقىباەۆ.
سپورت مەكتەپتەرى تاربيەلەنۋشىلەرىنىڭ جەتىستىكتەرىنە توقتالعان ول 2024 جىلعى جازعى وليمپياداعا بارۋعا 10 ۇمىتكەر بار ەكەنىن جەتكىزدى. بۇل – كوركەم گيمناستيكادان سابينا بوگاتوۆا, سپورت گيمناستيكاسىنان دميتري پوتانين, بوكستان تەمىرلان مۇقاتاەۆ پەن ورالبەك ابدىقادىروۆ, گرەك-ريم كۇرەسىنەن ماقسات سايلاۋ, جۇزۋدەن ادىلبەك مۋسين, ۆەلوسيپەد سپورتىنان ۆاديم برونسكي, ترياتلوننان ەكاتەرينا شابالينا, ستەندتىك اتۋدان ادەل ساقاباەۆا, ساداق اتۋدان الەكساندرا ۆوروپاەۆا. جالپى ەلوردانىڭ بالالار-جاسوسپىرىمدەر سپورت مەكتەپتەرىنىڭ 600-گە جۋىق تاربيەلەنۋشىسى – قازاقستان ۇلتتىق قۇراماسىنىڭ مۇشەسى.
وسى ورايدا قالالىق ءماسليحات دەپۋتاتى ۆلاديسلاۆ سەرگەەۆ «قازاقستان» سپورت سارايى قۇرىلىسىنا 20 ملرد تەڭگە جۇمساعانشا, بۇل قارجىنى بالالار سپورتىن دامىتۋعا باعىتتالعانىن ءجون كورەتىنىن ايتا كەلە, شاڭعى سپورتى مەن ەسكەك ەسۋمەن اينالىساتىندارعا جاعداي جاساۋ كەرەكتىگىن ايتىپ ءوتتى.
– «قازاقستاندى» جارىقتاندىرۋ مەن وسى نىساننىڭ دىبىس قوندىرعىسىنا 6 ميلليارد تەڭگە ءبولىپ وتىرمىز. ەندى شاڭعى بازاسى قۇرىلىسىنا 150 ميلليون بولگەنىمىز ءجون بولار. سەبەبى بۇل سپورت ءتۇرى بويىنشا جەتىستىكتەرىمىز ازايىپ بارا جاتىر, – دەدى ۆ.سەرگەەۆ.
دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ دەپۋتات وزەكتى ماسەلەنى كوتەرىپ وتىرعانىن, شاڭعى بازاسى قۇرىلىسى ماسەلەسى 3-4 جىل كولەمىندە شەشىلمەي جاتقانىن جەتكىزدى.
دەپۋتات ازامات ايتحوجين شاڭعى بازاسى قۇرىلىسىنا جەر تەلىمى بولىنگەنىن, ول دەنە شىنىقتىرۋ جانە سپورت باسقارماسىنا بەكىتىلگەنىن انىقتاعانىن ايتىپ, «جەڭىس» فۋتبول كلۋبى كىمنىڭ يەلىگىندە, قۇرىلتايشىسى كىم ەكەنىن سۇرادى.
– «جەڭىس» فۋتبول كلۋبى جەكەمەنشىك بولۋى كەرەك. مەندەگى مالىمەت بويىنشا بىلتىر بۇل كلۋبتى داۆيد لوريا قارجىلاندىردى. مەملەكەتتەن وسى كلۋب قارجىلاندىرىلمايدى, – دەدى س.جىلقىباەۆ.
ازامات ءايتحوجيننىڭ قالا قارجىلاندىراتىن فۋتبول كومانداسىن قۇرۋ كەرەكتىگى جونىندە كەڭەسىنە ەلوردانىڭ باس سپورتشىسى ونداي «جاس سۇڭقار» كومانداسى قۇرىلىپ, كۇنى كەشە عانا العاشقى ويىنىن وتكىزگەنىن جەتكىزدى.
– بۇل – بالالار-جاسوسپىرىمدەر سپورت مەكتەبى تاربيەلەنۋشىلەرىنەن قۇرالعان كوماندا, – دەدى دەنە شىنىقتىرۋ جانە سپورت باسقارماسىنىڭ باسشىسى.
قالالىق ءماسليحات دەپۋتاتى باتىر كوتىرەۆ №8 بالالار-جاسوسپىرىمدەر سپورت مەكتەبىنىڭ سپورتشىلارى قايدا جاتتىعاتىندارىن سۇرادى. ونىڭ سوزىنشە, ق.مۇڭايتپاسۇلى ستاديونى جارامسىز بولىپ قالعالى اتالمىش سپورت مەكتەپتىڭ تاربيەلەنۋشىلەرى ءار جەردە دايىندالىپ ءجۇر.
– قاجىمۇقان مۇڭايتپاسۇلى ستاديونى ءسۇرىلىپ جاتىر. سول سەبەپتەن قازىر «اۆتوموبيليست» ستاديونىنىڭ ەكى الاڭىن جالعا الىپ وتىرمىز. بالانسىمىزدا جيرەنتاەۆ كوشەسىندەگى ۇرلەمەلى كورت تا بار. بالالار وسى جەردە جاتتىعىپ ءجۇر. «اسپان» سپورت كەشەنى دە بار. قازىر كۇن جىلىنعاندىقتان, فۋتبول الاڭدارىنان تاپشىلىق جوق. ال №8 بالالار-جاسوسپىرىمدەر سپورت مەكتەبىندە 800 بالا دايىندالادى, – دەدى س.جىلقىباەۆ.
دەپۋتات ازامات ايتحوجين قىس مەزگىلىندە قالادا جابىق مانەج بولماعاندىقتان, فۋتبولدان جاتتىعۋلار وتپەيتىنىن ايتا كەلە, دەنە شىنىقتىرۋ جانە سپورت باسقارماسىنىڭ باسشىسىنا الداعى بيۋدجەتتى ناقتىلاۋدا جابىق مانەجدى سالۋعا قارجى سۇراۋعا كەڭەس بەردى. «قازاقستان» سپورت كەشەنىن سالعاندا سونىڭ ىشىندە زالداردى كوبەيتۋ كەرەكتىگىن ايتتى.
دەپۋتات نۇرداۋلەت ورازحانوۆ «تاۋەلسىزدىك» سارايىندا بالالار كوركەم گيمناستيكامەن اينالىساتىنىن, الايدا وندا كيىم اۋىستىراتىن بولمە مەن دۋشتىڭ جوقتىعىن ايتتى. ونىڭ ارىپتەسى سايات باتپەنوۆ سپورت مەكتەپتەرى جاتتىقتىرۋشىلارىنىڭ جالاقاسىنا نازار اۋداردى. «اۋلا فيت» اتالاتىن جاقسى جوبا بولعانىن ايتىپ, بۇل جوبانىڭ جايىن سۇرادى.
– قازىر باپكەرلەردىڭ جالاقىسى قانشا ەكەنىن بىلمەيمىن. بىراق ەكى-ءۇش جىل بۇرىن 50 مىڭ تەڭگە بولعان, – دەدى دەپۋتات. وعان دەنە شىنىقتىرۋ جانە سپورت باسقارماسىنىڭ باسشىسى جاتتىقتىرۋشىلار قازىر اي سايىن 80 مىڭ تەڭگە الاتىندارىن جەتكىزدى. بۇل جەتپەيتىنىن, سوندىقتان باپكەرلەر قوسىمشا تابىس تابۋعا ءماجبۇر ەكەندىگىن ايتتى.
– جاتتىقتىرۋشىلاردى مۇعالىمدەرگە تەڭەستىرۋ كەرەك. ايتپەسە 80 مىڭ تەڭگە جالاقى تۇك ەمەس. اۋىلداردا دا وسى اقشاعا ەشكىم جۇمىس ىستەگىسى كەلمەيدى. ءبىز مادەنيەت جانە سپورت مينيسترلىگىنە باپكەرلەردىڭ بازالىق ستاۆكاسىن كوتەرۋ ءۇشىن ءوتىنىش جىبەرگەنبىز. وقۋدى جاڭا بىتىرگەندەر دە باپكەر بولعىسى كەلمەيدى. ال «اۋلا فيت» جوباسى جالعاسىپ جاتىر, – دەدى س.جىلقىباەۆ.
