استاناداعى «سارىارقا» كينوتەاترىندا قالا اكىمدىگى مەن «Kinopark Theatres» كينوتەاتر جەلىسى بىرلەسىپ, «SOS بالالار اۋىلى» مەن «بالا اسىراپ الۋعا قولداۋ كورسەتۋ ورتالىعىنىڭ» تاربيەلەنۋشىلەرىنە «قۇبىجىقتار دەمالىستا 3» ءمۋلتفيلمىن كورۋىنە جاعداي جاسادى.
يگى شارا مەملەكەت باسشىسىنىڭ «بولاشاققا باعدار: رۋحاني جاڭعىرۋ» ماقالاسى اياسىندا جۇزەگە اسىرىلدى. وعان جوعارىدا اتالعان مەكەمەلەردەن باس-اياعى 176 بالا قاتىستى. كورسەتىلىم باسىندا ۇيىمداستىرۋشىلار مادەني-ويىن-ساۋىق ءىس-شارالار مەن جارىستار وتكىزدى. ال سۋسىندار مەن پوپكورن بالالارعا تەگىن تاراتىلدى.
مۇنداي يگىلىگى مول ءىس-شارانىڭ باستى ماقساتى – اتا-اناسىنىڭ قامقورلىعىنسىز قالعان سابيلەردىڭ بولاشاققا, بۇگىنگى ومىرگە دەگەن قۇلشىنىسىن ارتتىرۋعا سەپتىگىن تيگىزۋ. بۇدان بولەك, استانا اكىمدىگى وسى ءىستىڭ ءداستۇرلى تۇردە جالعاسۋى ءۇشىن اتالعان كينوتەاترلار جەلىسىمەن كەلىسسوزدەر ورناتپاق نيەتتە.
قازاق – ەرتەدەن جەتىمىن جىلاتپاعان حالىق. ەلىمىزدە ونداعان مىڭ ءسابي اتا-اناسىنىڭ قامقورلىعىنان ايىرىلىپ, تاعدىردىڭ تاۋقىمەتىنە ەرتە ارالاستى. ولارعا قولداۋ كورسەتۋ بيلىك تاراپىنان باستالىپ, قاراپايىم حالىق تاراپىنان جالعاسىن تاپسا, نۇر ۇستىنە نۇر بولماق.
ايان ءابدۋالي
