كەشە «Mega Silk Way» ساۋدا-ويىن-ساۋىق ورتالىعىندا «بىزبەن بىرگە» قايىرىمدىلىق شاراسى ءوتتى.
بالالارعا ارنالعان شارانى جەرگىلىكتى پوليتسيا قىزمەتى استانا قالاسىنىڭ قوعامدىق دامۋ ىستەرى جونىندەگى باسقارماسى, توتەنشە جاعدايلار دەپارتامەنتى جانە قىزىل جارتى اي قوعامىنىڭ ەلوردالىق بولىمشەسىمەن بىرلەسە ۇيىمداستىردى. وزدەرىڭىزگە ءمالىم, ءبىراز ۋاقىتتان بەرى استانا قالاسى اكىمدىگى «ءبىز قاۋىپسىز قالا ءۇشىن» جوباسىن قولعا العان ەدى. ەلورداداعى قىلمىس پەن جازاتايىم جاعدايلاردىڭ الدىن الۋ, ازاماتتارعا قاۋىپسىز, ءومىر سۇرۋگە قولايلى ورتا قالىپتاستىرۋ باستاماسى سان-سالالى باعىتتاردى قامتيدى. جاسىراتىنى جوق, قيىن جاعدايعا ءالى وڭ-سوڭىن تانىپ ۇلگەرمەگەن جەتكىنشەكتەر مەن بالالار ءجيى دۋشار بولىپ جاتادى ءارى مۇنداي كەزدە قالاي ارەكەت ەتەرىن بىلمەي ابدىراپ قالادى. اسىرەسە, ماسەلەنىڭ ماڭىزى كەشەگى كەمەروۆوداعى قايعىلى وقيعادان كەيىن ارتا تۇسكەنى انىق. سوندىقتان جەرگىلىكتى پوليتسەيلەر كىسى قاراسى مول ويىن-ساۋىق ورتالىعىنا ادەيى بارىپ, كۇندەلىكتى ومىردە جانە قوعامدىق ورىندارداعى ساقتىق شارالارى, ءورت, جول-كولىك اپاتى, ۋلانۋ, سۋعا باتۋ, قۇلاۋ سەكىلدى وقىس وقيعالار كەزىندە ارەكەت ەتۋ مەن العاشقى كومەك كورسەتۋ تۋرالى ءجون سىلتەپ, ناسيحات جۇمىستارىن جۇرگىزدى. ايتا كەتەرلىگى, ءىس-شارا تانىمدىق ويىن-ۆيكتورينا تۇرىندە وتكىزىلدى. بەلسەندى قاتىسۋشىلارعا ارنايى سىيلىقتار تابىس ەتىلدى. وسىلايشا قۇقىق قورعاۋ ورگاندارى قىزمەتكەرلەرى وزدەرى تۋرالى جۇرتشىلىقتىڭ قاساڭ تۇسىنىگىن وزگەرتۋگە تىرىسىپ, ىنتىماقتاسا جۇمىس ىستەۋگە شاقىردى.
ادىلبەك جاپاق
