نۇر-سۇلتانداعى «Bilim All» وقۋ ورتالىعىندا ۇزدىك ۆولونتەرلىك جوبالارعا بەرىلەتىن شاعىن گرانتتار بايقاۋىنىڭ جەڭىمپازدارى ءبىر اي بويى الەۋمەتتىك وسال توپقا جاتاتىن جانە كوپبالالى وتباسىدان شىققان استانالىق وقۋشىلارعا شاحمات, دومبىرا, گيتارا جانە قوبىزدى تەگىن ۇيرەتتى.
«ۆولونتەرلىك باستامالاردى قولداۋعا ارنالعان شاعىن گرانتتار بايقاۋى ەكىنشى رەت وتكىزىلىپ وتىر. بايقاۋ شىلدە ايىندا ۇيىمداستىرىلعان بولاتىن. وعان 14 پەن 29 جاس ارالىعىنداعى ەلوردالىق جاس قاتىستى. بايقاۋعا كەلىپ تۇسكەن 50 شاقتى وتىنىمنەن 20-سى جەڭىمپاز اتانىپ, ولاردىڭ ارقايسىسىن جۇزەگە اسىرۋعا 300 مىڭ تەڭگە بەرىلدى. گرانت ۇتقان ۆولونتەرلىك جوبالار ءار باعىتقا ارنالعان. ماسەلەن, ولاردىڭ ىشىندە ەكولوگيا, قايىرىمدىلىق, ءۇيسىز جانۋارلاردى قورعاۋ, ءبىلىم سەكىلدى سالالالارعا ارنالعان ۆولونتەرلىك جوبالار بار» دەيدى نۇر-سۇلتان قالاسى جاستار ساياساتى ماسەلەلەرى باسقارماسىنىڭ باس مامانى اجار ساربۋبەنوۆا.
ءبىر قىزىعى, ۆولونتەرلىك جوبالاردىڭ اۆتورلارى مۇنداي بايقاۋلارعا بۇرىن-سوڭدى قاتىسىپ كورمەگەن ەكەن.
«مەن ۆولونتەرلىك جوبالار بايقاۋىنىڭ وتەتىنىن تالىمگەرلەرىمنەن ەستىدىم. كوپ ويلانباي باعىمدى سىناپ كورگىم كەلدى. بۇل – مەنىڭ وسى سىندى بايقاۋعا العاش قاتىسۋىم. ءوزىم شاحماتتى ءتاۋىر وينايمىن. نەگە باسقا بالالارعا وسى ونەرىمدى ۇيرەتىپ كورمەسكە دەگەن وي كەلدى. گرانت يەلەنگەن سوڭ ءبىر اي بويى وسى ورتالىقتا بالالارعا شاحماتتىڭ قىر-سىرىن ۇيرەتتىم» دەيدى بايقاۋ جەڭىمپازدارىنىڭ ءبىرى, ەلورداداعى №10 مەكتەپتىڭ 10-سىنىپ وقۋشىسى سۇلتان قۇرمانوۆ.
