تۋرا ءبىر اپتادان كەيىن, 19 قاراشا كۇنى تاۋەلسىزدىك سارايىندا «Kazakhstan Kids Fashion Show-2016» اتتى بالالار ءسان كورسەتىلىمى وتەدى. جوبا نەدەن باستاۋ الدى؟ وعان دايىندىق قالاي وتۋدە؟ سۇراقتاردىڭ ءتۇيىنىن تومەندەگىشە تارقاتىپ كورۋگە تىرىستىق.
ءتورت جاسىنان تالپىنىپ ءجۇر
– بۇل جوبانى ءبىز 2014 جىلدان باستاپ قولعا الدىق. العاشقىدا كيىم دۇكەندەرىمەن جۇمىس جاسادىق. سول ۋاقىتتا «بالالاردى قايدان كيىندىرەمىز؟» دەگەن ماسەلە الدىمىزدان شىقتى. سەبەبى بالالارعا ارنالعان ءسان توپتامالارى جوقتىڭ قاسى بولاتىن. ال بۇگىندە ايدارحان قاليەۆ, مايا جۇمانبەكوۆا, دينارا چاكاروۆا, زارينا اكشۋلاكوۆا سىندى مايتالماندار جانە Samidel, ILATI, Vesta, Glasman, KaroMeli, LOGOVO ءسان ۇيلەرى بالالارعا ارناپ كيىم ۇلگىلەرىن ۇسىنا باستادى, – دەپ ءسان كورسەتىلىمىنىڭ باس پروديۋسەرى, بەلگىلى جۋرناليست ماحاببات ەسەن اڭگىمەسىن باستادى.
ءبىرىنشى جىلى شوۋعا 70-كە جۋىق بالا قاتىستى. قازىرگى تاڭدا جوباعا قاتىسۋعا نيەت بىلدىرگەندەردىڭ قاراسى كوبەيدى. وسى جىلى 318 بالادان 111-ءىن ىرىكتەپ الدى. جوباعا ءتورت جاستان باستاپ, ون التى جاسقا دەيىنگى بالالار قاتىسادى. «ماڭىزدىسى – اركىمنىڭ اتالمىش شاراعا ءوز قۇلقىمەن كەلۋىندە» دەيدى جوبانىڭ كرەاتيۆ پروديۋسەرى, كاستينگ ديرەكتورى جۇلدىز سەيسەنبەكوۆا. ءيا, كورسەتىلىمگە جولداما العان كۇننەن باستاپ بالا جاۋاپكەرشىلىكتى سەزىنەدى. جاي عانا ساحناعا شىعىپ, ويىن كورسەتەمىن دەگەن وي بولمايدى. «Kids Fashion Show» بالالاردى كىشكەنتايىنان جان-جاقتى بولۋعا جەتەلەيدى. كەرەك بولسا, سۇراقتارعا جاۋاپ بەرىپ, ءوزىن ءار قىرىنان تانىتۋعا دايىن بولادى. بالا ساحناعا شىققان كەزدە بەلگىلى ءبىر وبرازعا ەنىپ, تەاترلاندىرىلعان قويىلىم قويادى. سونداي-اق, بي بيلەپ, 20 مەترلىك ءسان شەرۋىنەن ءوتىپ ۇلگەرەدى. ارينە, ءنومىردى تاستاي ەتىپ جاساۋ ءۇشىن كاسىبي مامانداردىڭ كومەگى قاجەت, سول سەبەپتى بالالارمەن ەكى اي بويى جۇمىس جۇرەدى. وسى تۇستا ءبارى بالانىڭ ەڭبەگىنە بايلانىستى ەكەنىن ءتۇسىنۋ قاجەت. ەگەر بالا قالاماسا, اكە-شەشە ونىڭ شەشىمىنە اسەر ەتە المايدى.
– ءبىر قۋانتارلىعى, ءار جىل سايىن ەر بالالار جوبامىزعا كوپتەپ قاتىسىپ جاتىر. بۇگىندە ۇلداردان 40 قاتىسۋشىمىز بار. كوبى بۇل جوبانى ۋاقىتشا مۇمكىندىك دەپ قابىلدامايتىنىن بايقاۋعا بولادى. العان بىلىمدەرىن ءارى قاراي جالعاستىرىپ, ديپلوماتيالىق مەكتەبىمىزگە جازىلادى. بويىنداعى سەنىمدىلىكتى ارتتىرىپ, وقۋ ۇلگەرىمىن جاقسارتادى. ۋاقىتتىڭ قادىرىن تۇسىنەدى, – دەيدى جۇلدىز.
كاستينگتە تاڭعالدىرۋدان تارتىنبايدى
بالالار كاستينگتەن سۇرىنبەي ءوتۋ ءۇشىن تاڭقالدىرۋدان جالىقپايدى. وسى جولى ىرىكتەۋگە ءبىر قىز قاعازدان جاسالعان كويلەكتى كيىپ كەلگەن ەكەن. كەيبىر جاعدايدا قاتىسۋشىلار كۇمانمەن كەلەدى, قازىلار القاسىنا سۇراق قويۋدان تايىنبايدى. «قويىلىمنىڭ ماعان بەرەر پايداسى قانداي؟» دەگەن ساۋال كوكەيلەرىندە جۇرەدى.
«ەكىنشى تالاپ – ءتۇر-الپەتتىڭ كەلىسۋى» دەيدى ۇيىمداستىرۋشىلار. «بالانىڭ اتى بالا. قاتتى ارلەمەي-اق, جالت-جۇلت ەتكەن كيىمدى كيگىزبەي-اق بالا بويىنداعى جالىندى كورسەتۋگە بولادى. ءبىزدىڭ ماقساتىمىز دا سوعان سايادى. تەك قانا بالالارعا ەمەس, كاسىبي ماماندارعا دا تالاپ قاتاڭ. ۇزدىكتەردى تاڭداپ الدىق. ماسەلەن, «KaroMeli» اتتى ءسان ءۇيى بالالاردىڭ كيىم-كەشەگىنەن باستاپ, اياق-كيىمىنە دەيىن تىگەدى. ال ايدارحان ەسىمدى جىگىت وتاندىق ءجۇن مەن كاشەميرمەن جۇمىس ىستەيدى» دەپ ءسوزىن ساباقتادى جۇلدىز.
ساحنا جىگەر بەرەدى
بالالار كيىمىمەن ءبارى تۇسىنىكتى بولعان سياقتى. ەندى بي جاعىنا كىم جاۋاپتى؟ دايىندىق بارىسىن ءوز كوزىمىزبەن كورۋ ءۇشىن ستۋدياعا بەتتەدىك. ءتاپ-ءتاتتى بالالار حورەوگرافپەن بىرگە بيلەپ جاتقاننىڭ ۇستىنەن تۇستىك. اركىم ۇستازدارىنىڭ ايتقان نۇسقاۋلىعىن, جاساعان قيمىلدارىن بارىنشا اينىتپاي قايتالاۋعا تىرىسىپ جاتىر. ءار قيمىلدى بالاعا ويىن ارقىلى جەتكىزىپ جاتقانىن بايقادىق. «نارۇل, سەن تيگردى سال», «…ەندى كولىك ايداعانداي بول» دەگەن سوزدەر ەستىلىپ جاتتى.
بالانى بيگە ۇيرەتۋدىڭ ءوز ەرەكشەلىگى بارىن حورەوگراف جاسىرمادى. بي مۇعالىمى تۇرسىناي ەركەنباەۆا جەتىستىككە جەتۋدىڭ جولى – بالاعا سەنىم ءبىلدىرۋ دەيدى. ومىرگە جاڭا قادام باسقاندارعا «قولىڭنان بارلىعى كەلەدى!» دەگەن ءسوز كادىمگىدەي جىگەر بەرەتىن بولىپ شىقتى.
كىشكەنتايلار بارىن سالىپ, بي بيلەپ جاتقان كەزدە, بولمەنىڭ ار جاعىندا ولاردىڭ اكە-شەشەسىن كوردىك. سولاردىڭ ءبىرى – التى جاسار ەرسۇلتاننىڭ اناسى اقتوتىمەن اڭگىمەلەسۋدىڭ ءساتى ءتۇستى. «بۇل جوباعا ءبىز العاش رەت قاتىسىپ وتىرمىز. ءبىز ءۇشىن وسىناۋ شارا ۇلكەن جاڭالىق دەۋگە بولادى» دەپ باستادى ول. – ۇلىم ءۇش جاسىنان باستاپ بارلىق ۇيىرمەلەرگە ءۇيىر: بي بيلەپ, ءان ايتادى, سپورتپەن اينالىسادى. مۇنىڭ بارلىعى بالامنىڭ دامۋىنا وڭ اسەر ەتەتىنىنە سەنەمىن. ول بىردەن «ماما, تەلەديداردان كورىنگىم كەلەدى» دەدى. ايتقانىنا قۇلاق استىم. بۇل جوبا بالا ارمانىنىڭ ورىندالۋىنا سەپ بولارىنا سەنەمىن. جوبادا باسقا دا بالالارمەن تانىسىپ, قوعام بەلسەندىسىنە اينالىپ جاتىر. كەيبىرەۋلەرى بەسىكتەن بەلى شىقپاعان بالانى تانىمالدىققا اۋەستەندىرمە دەپ سوگۋى مۇمكىن. الايدا بالامىز ءوز ۋاقىتىن ءتيىمدى وتكىزەدى, تابيعاتىنان ۇقىپتى, تاربيەلى. بەرىپ جاتقان مۇمكىندىكتىڭ دە سۇراۋى بارىن بىلەدى. اكەسى دە تەمىردەي ءتارتىپتىڭ ادامى» دەپ قايىردى ءسوزىن جاس انا.
ءيا, «بولار بالا – بەسىكتەن» دەيدى قازاق. «Kazakhstan Kids Fashion Show» جوباسى كوپتەگەن بۇلدىرشىندەردىڭ جۇلدىزىن جاندىرعانى تالاي رەت دالەلدەندى. ۇل-قىزداردىڭ داۋىستارىن راديودان ەستىپ, جۇزدەرىن جارنامالىق بيلبوردتان كورگەن بولارسىز. بۇنىڭ بارلىعى بالا ەڭبەگىن پايدالانىپ, قارجى جيناقتاۋ ماقساتىندا ەمەستىگىن ماحاببات باسا ايتتى. ءوزى دە 7 جاسارلىق ۇلدى تاربيەلەپ وتىرعان انا. «يدەيانى ءاۋ باستان-اق بالام ءۇشىن جۇزەگە اسىردىم. ول مەنىڭ بارلىق باستامالارىما اتسالىسىپ, باسى-قاسىمدا جۇرەدى» دەپ اعىنان جارىلدى ول.
بيىلعى شوۋ تاۋەلسىزدىگىمىزدىڭ 25 جىلدىعىنا ارنالىپ, «قازاقستاندا جاسالعان» ۇرانىمەن وتەدى.
گۇلدانا تالعاتقىزى
