رەسەيلىك اتاقتى كومپوزيتور يگور كرۋتوي ۇيىمداستىرعان «بيتۆا تالانتوۆ» بايقاۋىنىڭ باس جۇلدەسىن ەلوردالىق جاس دارىن مۇحامەدالى جۇگىنىسوۆ جەڭىپ الىپ, ماسكەۋدەن ەلىمىزدىڭ ابىرويىن اسقاقتاتىپ ورالدى.
مۇحامەدالى وسىدان ەكى جىل بۇرىن رەسەيدە وتكەن «جاڭا تولقىن بالالار» بايقاۋىندا ءۇشىنشى ورىن الىپ, ۇلكەن قۇرمەتكە بولەنگەن ەدى. سوندا يگور كرۋتوي جاس جەتكىنشەكتىڭ تالانتىنا ءدان ريزا بولىپ, ءوزى جەتەكشىلىك ەتەتىن پروديۋسەرلىك اكادەمياعا قابىلداعان. كەشەگى ماسكەۋدە بولعان بايقاۋدا دا مۇحامەدالى ەڭ دارىندى دەگەن بالالاردىڭ قاتارىنا كىرىپ, ايگىلى ءانشى Beyonce-تىڭ ۇستازى David Lee Brewer-دەن ءدارىس العان. وسىنداي كول-كوسىر قۋانىش ۇستىندە ونەرپاز بالانىڭ اناسى, تالانتتى اكتريسا اينۇر جۇگىنىسوۆانىڭ ءبىر-ەكى اۋىز پىكىرىن بىلدىك.
– راقمەت, وتباسىمىزبەن قۋانىپ, ءماز-ءمايرام بولىپ جاتىرمىز. بايقاۋ وتە جوعارى دەڭگەيدە ۇيىمداستىرىلدى. الەمگە تانىمال ءانشى Beyonce-تىڭ ۇستازى 120 بالانىڭ ىشىنەن 8 جەتكىنشەكتى تاڭداپ الىپ, شەبەرلىك سىنىپ وتكىزگەن. سوندا ءبىزدىڭ مۇحامەدالىگە ءبىرىنشى كوزى ءتۇسىپ, ونىڭ تالانتىنا جوعارى باعا بەرىپتى. بايقاۋدا مۇحامەدالى ءۇش ءان شىرقاعان. ءبىر ءاندى – يتاليانشا, ەكەۋىن – اعىلشىنشا ورىنداعان. سوڭعى تۋردا ايتقان انىنە قازىلاردىڭ ءوزى ورىندارىنان تۇرىپ, قۇرمەت كورسەتىپتى. جەڭىمپاز بولىپ ورالعانىنا قۋانىشتىمىز, – دەيدى بالاسىنىڭ جەڭىسىنە شاتتانعان انا.
ءبىر ايتا كەتەرلىگى, مۇحامەدالى وسى 4 قاراشادا 13 جاسقا تولعان تۋعان كۇنىن ماسكەۋدىڭ ساحناسىندا قارسى الىپتى. ءبىز دە بولاشاعىنان ۇلكەن ءۇمىت كۇتەتىن جاس دارىن ءتىل-كوزدەن امان بولىپ, بيىكتەرگە سامعاي بەرسىن دەمەكپىز!
ازامات ەسەنجول
