قالالىق ءماسليحاتتىڭ بيۋدجەت, ەكونوميكا, كاسىپكەرلىك جانە ونەركاسىپ ماسەلەلەرى بويىنشا تۇراقتى كوميسسياسىنىڭ كەزەكتى وتىرىسىندا ەكونوميكا جانە بيۋدجەتتىك جوسپارلاۋ باسقارماسىنىڭ جەتەكشىسى ءالىبي جۇماەۆ 2017-2019 جىلدارعا ارنالعان استانا قالاسىنىڭ بيۋدجەتىنە تالداۋ جاسادى.
استانا قالاسىنىڭ الەۋمەتتىك-ەكونوميكالىق دامۋىندا ماڭىزدى ورنى بار الماتى, ەسىل, سارىارقا اۋداندارىنىڭ, قارجى باسقارماسى, كوممۋنالدىق مۇلىك جانە مەملەكەتتىك ساتىپ الۋ باسقارماسىنىڭ الداعى ءۇش جىلعا ارنالعان بيۋدجەت جوبالارى تالقىلاندى.
مەجەلەنگەن جوبا بويىنشا ءۇش اۋداننىڭ قىزمەتى اعىمداعى بىرنەشە باعدارلاما بويىنشا جۇزەگە اسىرىلادى. وندا قالا كوشەلەرىن جارىقتاندىرۋدان باستاپ, قالا تازالىعىن قامتاماسىز ەتۋ, اباتتاندىرۋ مەن كوگالداندىرۋ, سۋ تاسقىنىنا قارسى شارالار, قالاداعى باقتار مەن گۇلزارلاردىڭ كۇتىمى, كوپىرلەر مەن جولايىرىقتارىنىڭ پايدالانۋ شىعىندارى, پروفيلاكتيكالىق دەزينسەكتسيا جانە دەراتيزاتسيا, سونىمەن قاتار ەكولوگيالىق شارالاردى جۇرگىزۋگە قاتىستى قاراجات قاراستىرىلعان. ەسىل وزەنى مەن اقبۇلاق جاعالاۋلارىنىڭ جايى مەن ەلورداسىنداعى ەسكەرتكىشتەر مەن مۇسىندەردىڭ كۇتىمى, ودان بولەك, ايتۋلى مەرەكەلەر قارساڭىنداعى بەزەندىرۋ شارالارىنىڭ دا قاراجاتى قاراستىرىلىپ وتىر.
الماتى اۋدانى بويىنشا اتالعان جۇمىستارعا 11 980,8 ملن تەڭگە قاراستىرىلعان. ال سارىارقا اۋدانى بۇل ماقساتقا – 7 637,9 ملن تەڭگە, ەسىل اۋدانى 16 257,5 ملن تەڭگە جۇمساۋدى كوزدەپ وتىر.
ءۇش اۋدان اۋماعىنداعى مەكتەپكە دەيىنگى تاربيە مەن ءبىلىم بەرۋ سالاسىنا دا اۋقىمدى قاراجات قاراستىرىلعان. ياعني, ەسىل اۋدانى بويىنشا – 799,7 ملن تەڭگە, الماتى اۋدانى – 4 323,3 ملن تەڭگە, سارىارقا اۋدانى 4 081,3 ملن تەڭگەنى قۇرايدى.
مەكتەپكە دەيىنگى تاربيە مەن وقىتۋعا مەملەكەتتىك ءبىلىم بەرۋ تاپسىرىسىن ىسكە اسىرۋ ءۇشىن دە اۋداننىڭ ءۇش جىلدىق كەزەڭگە بولىنگەن شىعىستارى بيۋدجەتتە بەلگىلەنىپ, بۇل كورسەتكىش الماتى اۋدانى – 9 077,8 ملن تەڭگە, سارىارقا اۋدانى – 5 926,3 ملن تەڭگە ەسىل اۋدانى بويىنشا 6 174,6 ملن تەڭگەنى قۇرادى.
بيۋدجەت وپەراتورلارىنىڭ ەسەبىنەن كەيىن دەپۋتاتتار الداعى ۋاقىتتا ەسكەرىلۋى ءتيىس بىرنەشە ماسەلەلەردى العا تارتتى. اتاپ ايتقاندا, تەلمان, كوكتال-1, كوكتال-2, ءوندىرىس سەكىلدى قالا ماڭىنداعى ەلدى مەكەندەردىڭ كوشەلەرىن جارىقتاندىرۋ, سپورت جانە بالالار الاڭدارىن سالۋ, سول ەلدى مەكەندەردىڭ ۇستىنەن وتەتىن وزەن جاعالاۋلارىن اباتتاندىرۋ سياقتى تۇرعىنداردىڭ دەمالىس ورىندارىنا قاتىستى شارالاردى ۇيىمداستىرۋ ءۇشىن قاراجات قالا بيۋدجەتىندە قاراستىرىلۋى كەرەكتىگىن ايتتى. قالا شەكاراسىنا كىرەتىن, ىرگەلەس جاتقان ەلدى مەكەندەردىڭ وركەندەۋى باس شاھاردىڭ دامۋىمەن قاتار بولۋى كەرەك دەگەن ۇسىنىس ايتقان تۇراقتى كوميسسيا مۇشەلەرى بيۋدجەت جوباسىن ماقۇلدادى.
ايگۇل ۋايسوۆا
