بۇگىن «استانالىق» ساياباعىندا بالالاردى قورعاۋدىڭ حالىقارالىق كۇنىنە وراي بالدىرعانداردى شات-شادىمان كوڭىل-كۇيگە بولەگەن مەرەكەلىك شارالار ءوتتى. باس قالا جەتكىنشەكتەرىن مەيرامدارىمەن قۇتتىقتاۋعا ارنايى كەلگەن قر مەملەكەتتىك حاتشىسى گۇلشارا ابدىقالىقوۆا ءوزىنىڭ جىلى لەبىزىن ءبىلدىردى.
– جايماشۋاق جازدىڭ ءبىرىنشى كۇنى وزىمەن بىرگە تاماشا مەرەكەنى الا كەلدى. 1949 جىلى ايەلدەردىڭ حالىقارالىق دەموكراتيالىق فەدەراتسياسىنىڭ ۇسىنىسىمەن, بۇۇ-نىڭ قولداۋىمەن بالالاردى قورعاۋدىڭ حالىقارالىق كۇنى مەيرامى پايدا بولدى. سول ۋاقىتتان بەرى بۇل مەرەكە بۇكىل دۇنيەجۇزىندە اتالىپ كەلەدى. ەلباسى «قازاقستان-2050» ستراتەگياسىندا قازىردە ەلىمىزدە اتقارىلىپ جاتقان شارالاردىڭ بارلىعى بولاشاعىمىز – بالالار ءۇشىن ەكەنىن اتاپ كورسەتتى, – دەگەن مەملەكەتتىك حاتشى ءارى قاراي ەلىمىز تاۋەلسىزدىك العان كەزەڭنەن بەرى ۇرپاق ءۇشىن جاسالعان شارۋالاردى تارقاتتى.
– قازاقستان تاۋەلسىزدىگىنە بيىل 25 جىل تولىپ وتىر. ەگەمەندىگىمىزدىڭ العاشقى جىلدارى مەملەكەت باسشىسى بالالاردىڭ قۇقىقتارى تۋرالى كونۆەنتسياعا قول قويدى. جالپى ەلىمىزدە 60-تان استام كونۆەنتسياعا قول قويىلسا, ولاردىڭ 15-تەن استامى بالالاردىڭ قۇقىقتارىنا قاتىستى بولىپ وتىر. جۋىردا مەملەكەتىمىزدە بالالاردىڭ قۇقىقتارى جونىندە ارنايى ۋاكىل تاعايىندالدى. اسىرەسە, استانادا بالالاردىڭ بولاشاعى ءۇشىن ۇشان-تەڭىز جۇمىس اتقارىلىپ وتىر. قازاقستان پرەزيدەنتىنىڭ تاپسىرماسىمەن باس قالامىزدا جەتكىنشەكتەرگە ارنالعان قانشاما نىسان سالىندى. ماسەلەن, وقۋشىلار سارايى, مۇز ارەناسى كوركىمەن كوز ارباپ, كوڭىل سۇيسىنتەدى. بۇلارعا قوسا سپورتتىق نىساندار, قازىر ءبارىمىز جۇرگەن ساياباق بالالاردىڭ باقىتتى ومىرىنە جول اشىپ وتىر. بۇگىنگى مەيرامدارىمەن بارشا بالانى شىن جۇرەكتەن قۇتتىقتايمىن! كەلگەن جازعى دەمالىستارىڭىز ۇمىتىلماستاي جاقسى اسەرلەردى سىيلاسىن! توبەمىزدەن ارقاشان كۇن جارقىراپ تۇرسىن! باقىتتى بالالىق شاقتى تىلەيمىن! – دەپ تۇيىندەدى ءسوزىن گ. ابدىقالىقوۆا.
ساياباقتاعى مەرەكەلىك شارالار بالالار ونەر ۇجىمدارىنان قۇرالعان كونتسەرتكە ۇلاستى. اعىمداعى مامىر ايىندا استانا قالاسى ءبىلىم باسقارماسىنا قاراستى جاس ساياحاتشىلار ستانتسياسىنىڭ جەتكىنشەكتەرى شىمكەنت قالاسىندا وتكەن «وتان جولىمەن» اتتى ولكەتانۋ بويىنشا جارىستان جۇلدەلى ورالدى. شارا بارىسىندا سوندا توپ جارعان بالالار ماراپاتتالدى.
امانعالي قالجانوۆ
