1 ماۋسىم – حالىقارالىق بالالاردى قورعاۋ كۇنى قارساڭىندا ەلوردانىڭ ءتۇرلى مەكەمەلەرى قايىرىمدىلىق شارالارىن ۇيىمداستىرىپ, بۇلدىرشىندەردى قۋانتۋعا تىرىستى. سونداي جيىننىڭ ءبىرى بالالاردى وڭالتۋ ۇلتتىق ورتالىعىندا ءوتتى. «نۇر وتان» پارتياسى استانا قالالىق فيليالىنىڭ مۇرىندىق بولۋىمەن قويىلعان مەرەكەلىك كونتسەرت بارىسىندا بالدىرعاندار كول-كوسىر شاتتىققا كەنەلىپ, كەرەمەت اسەرگە بولەندى.
– بۇگىندە ەرەكشە قاجەتتىلىكتى تالاپ ەتەتىن بالالاردى الەۋمەتتەندىرۋ ماقساتىندا مەملەكەت تاراپىنان تىندىرىمدى شارۋالار اتقارىلۋدا. وسى ورايدا «نۇر وتان» پارتياسى دا قالىس قالعان جوق. ءبىز ىسكە اسىرىپ جاتقان 8 پارتيالىق جوبانىڭ ءبىرى «كەدەرگىسىز كەلەشەك» دەپ اتالادى. سول ارقىلى مەديتسينالىق كومەككە مۇقتاج سابيلەرگە قول ۇشىن بەرىپ, ولاردى قوعامعا بەيىمدەگىمىز كەلەدى. ماسەلەن, مۇمكىندىگى شەكتەۋلى جاندارعا ارنالعان ليفت, پاندۋس سالىپ, ءجۇرىپ-تۇرۋلارىنا قولايلى جاعداي جاساۋدا جۇمىستار جۇرگىزۋدەمىز. مۇنداي ساۋاپتى تىرلىككە استانا قالاسىنىڭ كاسىپكەرلەر قاۋىمداستىعى, قازاقستان رەسپۋبليكاسى ەلشىلەرىنىڭ ايەلدەرى كلۋبى سەكىلدى ۇيىمدار مەن پارلامەنت جانە جەرگىلىكتى ءماسليحات دەپۋتاتتارىن تارتتىق, – دەدى «نۇر وتان» پارتياسى استانا قالالىق فيليالى توراعاسىنىڭ ورىنباسارى ۆلاديسلاۆ سەرگەەۆ.
دۋماندى شاراعا استانا قالاسى كاسىپكەرلەر قاۋىمداستىعىنىڭ ۆيتسە-پرەزيدەنتى حانزادا بالتاەۆا, قازاقستان رەسپۋبليكاسى ەلشىلەرىنىڭ ايەلدەرى كلۋبى پرەزيدەنتى سوفيا باكۋريدزە, قازاقستاندىق دەنساۋلىق ساقتاۋ قىزمەتكەرلەرىنىڭ سالالىق كاسىپوداعى ەلوردالىق فيليالى توراعاسى باقىتجان ءتاجىباي قاتىستى. ولار وڭالتۋ ورتالىعىنا ۆەلوسيپەدتەر تارتۋ ەتىپ, ەمدەلۋشى بالاقايلارعا ويىنشىقتار سىيلادى.
كونتسەرتتىڭ سوڭى جارمەڭكەگە ۇلاستى. وندا سال اۋرىنا شالدىققان 300-گە جۋىق بالا ءوز قولىنان شىققان بۇيىمداردى ۇسىندى. جارمەڭكەدەن تۇسكەن قارجى تۇگەلدەي ۇلتتىق ورتالىقتىڭ قورىنا اۋدارىلادى.
بوتاگوز ماراتقىزى
