باقىلاۋدى كۇشەيتۋدى تاپسىردى

ەلوردادا VII سايلانعان نۇر-سۇلتان قالاسىنىڭ ءماسليحاتىندا Nur Otan پارتياسى دەپۋتاتتىق فراكتسياسىنىڭ وتىرىسى ءوتتى. جيىندا «وزگەرىس جولى: اركىمگە لايىقتى ءومىر!» Nur Otan پارتياسىنىڭ سايلاۋالدى باعدارلاماسىن ورىنداۋ جونىندەگى جول كارتاسىن ىسكە اسىرۋ اياسىندا جوبالاردى قارجىلاندىرۋ ماسەلەسى تالقىلاندى.

– ۇلەستىك قۇرىلىستىڭ پروبلەمالىق نىساندارىن اياقتاۋ ءۇشىن 23 ميلليارد تەڭگە ءبولىندى, جىل قورىتىندىسى بويىنشا 18 نىساندى پايدالانۋعا بەرۋ جوسپارلانۋدا. الەۋمەتتىك سالاعا 135,8 ميلليارد تەڭگە, ونىڭ ىشىندە ءبىلىم بەرۋگە 194,9 ميلليارد تەڭگە قاراستىرىلعان. وسى قاراجات اياسىندا جىل سوڭىنا دەيىن 15 مەكتەپتى پايدالانۋعا بەرۋ جوسپارلانۋدا. مەديتسينالىق جابدىقتار الۋعا جانە مەديتسينا قىزمەتكەرلەرىنىڭ بىلىكتىلىگىن ارتتىرۋعا 1,7 ميلليارد تەڭگە قاراستىرىلعان. تۇرعىن ءۇي الاپتارىنىڭ پروبلەمالارىن شەشۋگە باعىتتالعان 38,7 ميلليارد تەڭگە قولداۋ تاپتى. پارتيانىڭ سايلاۋالدى باعدارلاماسىنىڭ ءىس-شارالارىن ورىنداۋ – بيۋدجەتتى جوسپارلاۋ مەن ناقتىلاۋدا باستى باسىمدىق, – دەدى ەكونوميكا جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى ءانۋار زەيدۇللا.

ەلوردادا 890 مىڭ جاسىل جەلەك وتىرعىزۋ جوسپارلانعان. وسى ماقساتتا 1,8 ميلليارد تەڭگە ءبولىندى. سونىمەن قاتار قالادا بۇقارالىق سپورتتى, مادەنيەتتى دامىتۋعا, جاستاردى قولداۋعا 5,2 ميلليارد تەڭگە كولەمىندە قاراجات كوزدەلگەن.

كولىك جانە جول-كولىك ينفراقۇرىلىمىن دامىتۋ باسقارماسى باسشىسىنىڭ ورىنباسارى ولجاس شابدانوۆ قالالىق جانە قالا ماڭىنا قاتىنايتىن قوعامدىق كولىكتەر ماسەلەسى رەتتەلگەنىن ايتتى.

– بيىل «وڭتۇستىك-شىعىس» شاعىن اۋدانىنىڭ سول جاعىندا جالپى ۇزىندىعى 1,9 شاقىرىم بولاتىن ەسىل جانە بۇقتىرما كوشەلەرىندە جوندەۋ جۇمىستارىن اياقتاۋ, سونداي-اق ەرتىس جانە جايىق كوشەلەرى بويىنشا ينجەنەرلىك جەلىلەردىڭ قۇرىلىسىن اياقتاپ, اسفالت جابىنىن توسەۋ جوسپارلانۋدا. اقارىس كوشەسىندە تۇرمىستىق جانە نوسەرلىك كارىز سۋ قۇبىرى جەلىلەرىنىڭ قۇرىلىسى كوزدەلگەن. جوباعا 1 ميلليارد 150 ميلليون تەڭگە قاراستىرىلعان, ونىڭ ىشىندە جەرگىلىكتى بيۋدجەتتەن قوسىمشا 400 ميلليون تەڭگە كوزدەلىپ وتىر, – دەدى و.شابدانوۆ.

باسقارما باسشىسىنىڭ ورىنباسارى قالادا «ءوندىرىس» تۇرعىن الابى تۇرعىندارىنا كولىكتىك قىزمەت كورسەتۋدى جاقسارتۋ ماقساتىندا 26 شىلدەدەن باستاپ «ءوندىرىس» – GreenLine» قاتىناسىمەن جاڭا №30 قالالىق باعدار ىسكە قوسىلعانىن اتاپ ءوتتى. جالپى قالاداعى قوعامدىق كولىك سانى 6 پايىزعا ارتقان. ونىڭ ىشىندە 11-ءى قالا ماڭىنا قاتىنايدى, ال 37-ءسى – قالالىق اۆتوبۋستار.

سونداي-اق ەسىل اۋدانىنىڭ اكىمى, Nur Otan پارتياسى نۇر-سۇلتان قالاسى ەسىل اۋداندىق فيليالىنىڭ توراعاسى بەرىك جاكەنوۆ پارتيانىڭ سايلاۋالدى باعدارلاماسىن ورىنداۋ جونىندەگى جول كارتاسىنىڭ ىسكە اسىرىلۋى تۋرالى ەسەپ بەرەدى.

ايتا كەتەيىك, ەسىل اۋدانى اكىمدىگى Nur Otan پارتياسىنىڭ سايلاۋالدى باعدارلاماسى جول كارتاسىنىڭ 6 تارماعىنا جاۋاپتى.

– 5 جىل ىشىندە 31 قوعامدىق كەڭىستىكتى اباتتاندىرۋ جوسپارلانۋدا. بيىلعا 6 مەكەنجاي بويىنشا قوعامدىق كەڭىستىكتى اباتتاندىرۋ بويىنشا جۇمىستار جوسپارلانعان. سونىمەن قاتار جىل سوڭىنا دەيىن 38 اۋلا اباتتاندىرىلادى. قازىرگى تاڭدا 10 سپورت الاڭى اباتتاندىرىلدى. قاتتى تۇرمىستىق قالدىقتاردى جيناۋ جانە تاسىمالداۋ بويىنشا كەشەندى جۇمىستاردى ەلوردالىق قورشاعان ورتانى قورعاۋ جانە تابيعاتتى پايدالانۋ باسقارماسىنىڭ قولداۋىمەن «Clean City NC» جشس جۇزەگە اسىرادى. بۇگىندە مەردىگەرلىك ۇيىم 1000 كونتەينەر ساتىپ الۋدى جوسپارلاپ وتىر. بيىلعا 160 كونتەينەرلىك الاڭعا جوندەۋ جۇمىستارىن جۇرگىزۋ جوسپارلانعان, ونىڭ ىشىندە «پريگورودنىي», «تەلمان», «زارەچنىي» تۇرعىن الاپتارىنا ارقايسىسىنا 10 جاڭا كونتەينەر الاڭى ورناتىلسا, «ۇركەر» تۇرعىن الابىندا تاعى 30 جاڭا كونتەينەر پايدا بولادى. بۇگىندە اۋداندا 10 كونتەينەرلىك الاڭ جايلاستىرىلىپ, 20-سى جوندەلدى, – دەدى ب.جاكەنوۆ.

دەپۋتاتتار ەسىل اۋدانىنىڭ اكىمى بەرىك جاكەنوۆ پەن وڭىرلىك دامۋ جونىندەگى قوعامدىق كەڭەس توراعاسى نۇرلان كۋپەشوۆتىڭ ەسەپتەرىنە وڭ باعاسىن بەردى. قر پارلامەنتى ءماجىلىسىنىڭ ۆيتسە-سپيكەرى پاۆەل كازانتسەۆ پارتيانىڭ سايلاۋالدى باعدارلاماسىن جۇزەگە اسىرۋدىڭ الەۋمەتتىك ماڭىزدىلىعىن اتاپ ءوتىپ, دەپۋتاتتارعا جول كارتاسىنىڭ ورىندالۋىنا باقىلاۋدى كۇشەيتۋدى ۇسىندى.

پارتيا مۇشەلەرىنىڭ ايتۋىنشا, باسقارماعا بەكىتىلگەن جەكەلەگەن كورسەتكىشتەر اعىمداعى جىلى تومەن دەڭگەيدە جۇزەگە اسىرىلۋدا. Nur Otan پارتياسى فيليالىنىڭ ءبىرىنشى ورىنباسارى ساقتاعان سادۋاقاسوۆ دەپۋتاتتار مەن باسقارما وكىلدەرىن بارلىق جوسپارلانعان مىندەتتەردى بىرلەسىپ, جۇيەلى تۇردە جۇزەگە اسىرۋعا شاقىردى.

– جول كارتاسىنىڭ كەيبىر پۋنكتتەرى قاراجاتپەن قامتاماسىز ەتىلمەگەن. ونى جۇزەگە اسىرۋعا دەپۋتاتتار عانا ەمەس, مەملەكەتتىك ورگاندار دا جاۋاپتى. قاراجات ءبولۋ مۇمكىندىگى بار-جوعىن ءتۇسىنۋ كەرەك. كەلەسى جىلعا قارجىلاندىرۋ بويىنشا تالداۋ جۇرگىزىڭىزدەر, – دەدى ول.

جول كارتاسى سايلاۋالدى باعدارلامانىڭ ءتورت باعىتىن ىسكە اسىرۋ بويىنشا 362 ءىس-شارانى قامتيدى: «بارشاعا تەڭ مۇمكىندىكتەر», «زياتكەر, سالاماتتى جانە ىجداعاتتى ۇلت», «ەكونوميكا مەن وڭىرلەردىڭ تۇراقتى دامۋى», «حالىققا ەسەپ بەرەتىن مەملەكەت جانە جاۋاپتى ازاماتتار». تۇرعىن ءۇي قۇرىلىسىنىڭ كولەمىن, ونىڭ ىشىندە جەڭىلدىكتى الەۋ­مەتتىك تۇرعىن ءۇي كولەمىن ۇلعايتۋ, ايەلدەر كاسىپكەرلىگىن, مەكتەپكە دەيىنگى جانە ورتا ءبىلىم بەرۋدى دامىتۋ ارقىلى قازاقستاندىق وتباسىلاردى قولداۋ مەن نىعايتۋ بويىنشا جۇيەلى جۇمىستار قاراستىرىلعان.

نايما نۇرالىقىزى