جاقىندا نۇر-سۇلتان تۇرعىندارى تاعى دا جاڭادان اشىلاتىن ەكى ساياباقتا سەرۋەندەيتىن بولادى. مۇنداي جاڭالىقتى Facebook-تەگى پاراقشاسىندا ەلوردا اكىمى باقىت سۇلتانوۆ جاريا ەتتى.
ساياباقتاردى بەيبىتشىلىك جانە كەلىسىم سارايىنان باستاپ «نۇرلى جول» ۆوكزالىنا دەيىن 6 شاقىرىمدى الىپ جاتقان «مىڭجىلدىق» اللەياسىنىڭ بويىنان ورنالاستىرۋ جوسپارلانعان.
«جوسپارىمىز بويىنشا اللەيانىڭ ءوزى دە «نۇرجول» جەلەكجولى, پرەزيدەنت ساياباعى, بايتەرەك, عاشىقتار ساياباعى بويىنشا قالانىڭ ورتالىق بولىگىن جالعاستىراتىن ۇلكەن ءارى دەمالۋشىلارعا ىڭعايلى جاسىل ساياباققا اينالادى. جەلەكجولدىڭ ناق ورتاسىندا ورنالاساتىن جاڭا قازاق دراما تەاترى وسى جەردىڭ ەڭ باستى نىسانى بولماق. ال ونى بويلاي ۇلتتىق, ازيالىق جانە ەۋرازيالىق ساۋلەت ستيلىندە تۇرعىن ۇيلەر سالىنادى» دەپ جازدى ب.سۇلتانوۆ.
اللەيانىڭ ورتالىق جەلەكجولىن جوبالاۋ بويىنشا بايقاۋ جاريالانعان. ال جاقىندا وتكەن قالا قۇرىلىسىنىڭ كەڭەسىندە ونى اينالا قورشايتىن تۇرعىن ءۇي كەشەندەرىنىڭ جوبالارى قارالدى. «مىڭجىلدىق» اۋدانىنىڭ جاڭا كەلبەتىنە قالالىقتار ءوز باعاسىن بەرەتىنىنە سەنىمدىمىن» دەپ جازدى قالا باسشىسى. «مىڭجىلدىق» اۋماعىنىڭ اۋدانى 1,2 مىڭ گەكتارعا جۋىق. اۋماقتىڭ 10 پايىزى يگەرىلىپ, جول جانە ينجەنەرلىك جەلىلەرىنىڭ 50 پايىزى سالىندى.
