ەلوردانىڭ قارقىندى دامۋىنا ساي بارلىق جاعدايلاردى ەسكەرىپ, جاڭا باس جوسپار جاسالۋدا. بۇل جايىندا نۇر-سۇلتان قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسى مالىمدەدى.
بۇعان دەيىن 2010 جىلى باس جوسپاردى جاساۋ كەزىندە ەلوردا حالقى 2030 جىلعا قاراي 1 ميلليون 200 مىڭ ادام بولادى دەپ ەسەپتەلگەن. الايدا جاعداي شىندىعىندا باسقاشا بولىپ, قالا حالقىنىڭ سانى 2020 جىلدىڭ وزىندە اتالعان مەجەنى وڭاي ەڭسەردى. ءوز كەزەگىندە بۇل فاكتور ەلوردالىقتاردىڭ سۇرانىستارى مەن تالاپ-تىلەكتەرىن قاناعاتتاندىرۋدىڭ بارلىق مۇمكىندىكتەرى قاراستىرىلعان جاڭا باس جوسپار ءتۇزۋ قاجەتتىلىگىن تۋىنداتتى.
بۇگىندە قالادا «نۇر-سۇلتان» – قولايلى قالا» شەبەر-جوسپارى ىسكە اسىرىلىپ جاتىر. بۇل جوسپار قالانىڭ باس جوسپارى مەن ەلوردانىڭ 2030 جىلعا دەيىنگى دامۋ ستراتەگياسى نەگىزىندە جاسالعان. سوندىقتان وندا تۇرعىندارعا قولايلى ورتا قالىپتاستىرۋمەن بىرگە قالالىق رەسۋرستاردى جوسپارلاۋ, ەلەكترەنەرگەتيكاسىنىڭ شىعىنىن ەسەپتەۋ, ءتاريفىن بولجاۋ, قۇرىلىس نىساندارىنىڭ تىعىزدىعى سىندى نەگىزگى پارامەترلەردى دە قامتيدى. بۇدان بولەك, شەبەر-جوسپار قولجەتىمدى تۇرعىن ءۇي قۇرىلىسىنىڭ قارقىنىن ارتتىرۋدىڭ دا مۇمكىندىكتەرىن قاراستىرادى.
