كەشە ەلوردالىق مۋزىكالىق جاس كورەرمەن تەاترى II تەاتر ماۋسىمىنىڭ شىمىلدىعىن اشتى. سالتاناتتى شارانىڭ اشىلۋىنا ەلوردا اكىمىنىڭ ورىنباسارى اسحات ورالوۆ قاتىسىپ, جاس ونەر ۇجىمىنا شىعارماشىلىق تابىس تىلەدى.
– نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاترىنىڭ اشىلۋىمەن بارشاڭىزدى قۇتتىقتايمىن! قازاق ارقاشان ونەر ادامدارىن قولداپ, قۇرمەتتەگەن. سوندىقتان تەاتر ماۋسىمىنىڭ اشىلۋى ءبىز ءۇشىن دە ۇلكەن مارتەبە. قالا اكىمى تەاتردىڭ جاڭا ماۋسىمىمەن قۇتتىقتاپ, ارنايى حات جولدادى. تەاتر ماۋسىمىنىڭ «اباي-توعجان» قويىلىمىمەن اشىلۋى بەكەر ەمەس. ۇلى ابايدىڭ اتى حالقىمىزدىڭ تاريحىندا التىن ارىپپەن جازىلعان, – دەدى اسحات ورالوۆ.
ەلوردا تورىندە 2020 جىلى تۇساۋى كەسىلگەن نۇر-سۇلتان قالاسى اكىمدىگىنىڭ مۋزىكالىق جاس كورەرمەن تەاتر ۇجىمى – ونەر بايگەسىنە جاڭادان قوسىلعان جاس تەاتر. تەاتر العاشقى شىمىلدىعىن قازاقتىڭ ۇلى اقىنى اباي قۇنانباەۆتىڭ 175 جىلدىق مەرەيتويى قارساڭىندا م.اۋەزوۆتىڭ «اباي-توعجان» مۋزىكالىق-دراماسىمەن اشقان بولاتىن. جاڭا ماۋسىمدا تەاتر ۇجىمىنىڭ كورەرمەندەرگە دايىنداعان تىڭ تۋىندىلارى جەتەرلىك.
باس شاھاردىڭ رۋحاني-مادەني ومىرىنە مازمۇندى مانەرىمەن قوسىلعان ونەر ورداسى جاس ۇرپاقتىڭ بويىنا رۋحاني قۇندىلىقتاردى دارىتىپ, وتاندىق جانە الەمدىك مۋزىكالىق قويىلىمداردى ساحنالاۋ ارقىلى بالالار مەن جاسوسپىرىمدەردىڭ مادەني-ەستەتيكالىق الەمىن, تانىم-تاعىلىمىن, شىعارماشىلىق الەۋەتىن جەتىلدىرۋگە باعىتتالعان.
ايتا كەتۋ كەرەك, تەاتر وركەسترى «كونە تاراز كۇمبىرى» دەپ اتالاتىن ەل تاۋەلسىزدىگىنىڭ 30 جىلدىعى شەڭبەرىندە وتكەن ەتنوفولكلورلىق رەسپۋبليكالىق فەستيۆالدە 1-ورىن جەڭىپ الدى. وركەستر جەتەكشىسى – باۋىرجان اقتاەۆ.
– تەاترىمىز جاڭا ماۋسىمدا كورەرمەندەرگە 5-6 پرەمەرا ۇسىنادى. قازىر تاۋەلسىزدىك كۇنىنە وراي ەركىندىكتى اڭساعان ارىستارىمىزدىڭ جارلارى, سولاردىڭ تاعدىرى, الجير تۋرالى ۇلكەن تاريحي دەرەكتى دراما دايىنداپ جاتىرمىز. سەبەبى جاس ۇرپاق ءبىرىنشى كەزەكتە اكەلەردىڭ اقجولتاي اماناتىن ۇمىتپاۋى ءتيىس, – دەدى تەاتر ديرەكتورى اسحات ماەميروۆ.
ەلىمىزدەگى تەاتر الەمىندە العاش ساحنالانعان «اباي-توعجان» قويىلىمى – جاستاردىڭ جۇرەك قىلىن شەرتىپ, وي-ارماندارىن اسقاقتاتاتىن تۋىندى. مۇندا الىپ اقىننىڭ بوزبالا كەزەڭىن بەينەلەگەن وقيعالار كورەرمەندى ىڭكار سەزىمگە بولەيدى. جاس ابايدىڭ جۇرەگىندە ويانعان العاشقى ماحابباتى, كوكىرەگىندە تۋعان تۇڭعىش جىرى دا اۋەزدى انگە اينالىپ, كورگەن ادامنىڭ جۇرەك پەرنەسىن تەربەتتى.
