باسپانالى بولۋعا مۇمكىندىك بەرەتىن باعدارلامالار
ەلوردانىڭ تۇرعىن ءۇي قورى «باقىتتى وتباسى», «نۇرلى ەرتىس» جانە «ەڭبەك» قولجەتىمدى تۇرعىن ءۇي باعدارلامالارىن جۇزەگە اسىرۋدا. سونىڭ ىشىندە «باقىتتى وتباسى» باعدارلاماسىنا قاتىسۋعا ءبىر مىڭنان استام كوپبالالى جانە از قامتىلعان وتباسى ءوتىنىش بەردى.
اتالمىش باعدارلاما بويىنشا تۇرعىن ءۇي الۋعا جولداما الۋ ءۇشىن وتىنىشتەر قابىلداۋ جالعاسىپ جاتىر. ونىڭ ءبىرىنشى كەزەڭى 31 شىلدەدە اياقتالادى. باعدارلاماعا قاتىسۋشىلار تۇرعىن ءۇي قۇرىلىس جيناق بانكىنەن 20 جىلعا دەيىن جىلدىق 2 پايىزدىق مولشەرمەن نەسيە الا الادى. نەسيەنىڭ ەڭ جوعارى سوماسى – 15 ملن تەڭگە. وعان مۇگەدەك بالالارىن تاربيەلەپ وتىرعان وتباسىلار, كوپبالالى نەمەسە تولىق ەمەس وتباسىلار قاتىسا الادى. جوعارىدا كورسەتىلگەن ساناتتاردىڭ ءبىرى بويىنشا ۇمىتكەرلەردى ەلوردادا تۇرعىن ءۇي كەزەگىنە قويۋ دا مىندەتتى شارت بولىپ تابىلادى. وتباسىنىڭ ءبىر مۇشەسىنىڭ تابىسى 42500 تەڭگەدەن اسپاۋى ءتيىس.
«نۇرلى ەرتىس» باعدارلاماسىنا كوپبالالى وتباسىلاردان وتىنىشتەردى قابىلداۋ دا جالعاسۋدا. ونىڭ اياسىندا قازىرگە دەيىن نۇر-سۇلتاننان ەكىباستۇز قالاسىنا 105-تەن استام استانالىق وتباسى نەمەسە 500-دەن اسا ادام كوشىرىلدى. وعان 3 جانە ودان دا كوپ بالا تاربيەلەپ وتىرعان وتباسىلار قاتىسا الادى. قاتىسۋشىلارعا ەكىباستۇز قالاسىندا ايلىق تولەمى شارشى مەترىنە 99 تەڭگە بولاتىن ەكى جانە ءۇش بولمەلى پاتەرلەر بەرىلەدى. باعدارلاما ورتاشا ەڭبەكاقىسى 120 مىڭ تەڭگەنى قۇرايتىن جۇمىسپەن قامتۋدى كوزدەپ وتىر. «ەڭبەك» باعدارلاماسىنا ەكى جانە ودان دا كوپ بالالارى بار وتباسىلار قاتىسا الادى. وعان قاتىسۋشىلاردىڭ تراكتورشى, باس بۋحگالتەر, مەحانيزاتور, «كاماز» جۇرگىزۋشىسى, كومباينشى, دانەكەرلەۋشى, اۋدارماشى, مالشى, ۆەتەرينارلىق دارىگەر, پسيحولوگ, ساۋىنشى, زووتەحنيك, نەفرولوگ-دارىگەر, كارديولوگ, وتولارينگولوگ, ونكولوگ, ماممولوگ, زەرتحاناشى, مەدبيكە, مۇعالىم مەن تاربيەشى ماماندىقتارى بويىنشا ديپلومى بولۋى ءتيىس. مۇنداي بىلىمدەرى بولماعان جاعدايدا تەگىن وقۋ مۇمكىندىكتەرى قاراستىرىلعان. باعدارلاما سولتۇستىك قازاقستان وبلىسىنىڭ عابيت مۇسىرەپوۆ اتىنداعى, ماعجان جۇماباەۆ اتىنداعى, مامليۋت اۋداندارىندا تۇرعىن ۇيلەردى ۇسىنادى. تۇرعىن ءۇيدىڭ 70-تەن 150 شارشى مەترگە دەيىنگى كولەمىنە بايلانىستى جالعا الۋ اقىسى 7000 تەڭگەدەن 14850 تەڭگەگە دەيىن وزگەرەدى. بۇعان قوسا, قونىس اۋدارۋشىلارعا وتباسىنىڭ ءاربىر مۇشەسىنە 88374 تەڭگەدەن ءبىر رەتتىك الەۋمەتتىك كومەك بەرىلەدى.