باسقارما جۇمىسى بايىپتالدى
قازىرگى تاڭدا ەلىمىزدە مەملەكەتتىك قىزمەت كورسەتۋدىڭ ساپاسى مەن حالىققا قولجەتىمدىلىگىن ارتتىرۋ اسا وزەكتى ماسەلەلەردىڭ قاتارىنا شىعىپ وتىر. «جاڭارۋ» سىبايلاس جەمقورلىققا قارسى كۇرەس جالپىۇلتتىق قوزعالىسى تىكەلەي بۇل باعىتتاعى جۇمىستاردى قاداعالايتىن بولادى. بەيسەنبى كۇنى وسى قوعامدىق بىرلەستىكتىڭ مۇرىندىق بولۋىمەن استانا قالاسى ساۋلەت جانە قالا قۇرىلىسى باسقارماسىنىڭ قىزمەتىنە قاتىستى قوعامدىق تىڭداۋلار ءوتتى. وندا اتالمىش باسقارما باسشىسى ۆيتالي سيلەتسكي مەكەمەنىڭ جۇمىسى تۋرالى بايانداما جاسادى.
ونىڭ ايتۋىنشا, ساۋلەت جانە قالا قۇرىلىسى باسقارماسى تۇرعىندارعا بەس ءتۇرلى مەملەكەتتىك قىزمەت كورسەتەدى. سونىڭ ىشىندە قالانىڭ كوشەلەرى مەن وبلىستىق جانە اۋداندىق ماڭىزى بار اۆتوكولىك جولدارىنىڭ بويىنا سىرتقى (كورنەكى) جارنامانى ورنالاستىرۋعا رۇقسات بەرۋ ءتارتىبى تۋرالى ەگجەي-تەگجەيلى بايانداعان ول حالىقتان كوپتەگەن سۇراقتار وسى ماسەلە بويىنشا كەلەتىنىنە نازار اۋداردى.
ەلوردانىڭ كەلبەتىنە كورىك قوساتىن قۇرىلىس نىساندارىنا توقتالعان بايانداماشى «مىڭجىلدىق» ساياباعىنىڭ ماڭايىندا ورنالاساتىن جاڭا تەمىر جول ۆوكزالى اۋدانىنىڭ دامۋ تۇجىرىمداماسى قارالىپ, بەكىتىلگەنىن ايتىپ ءوتتى. ول اۋماقتا, سونداي-اق, كوممەرتسيالىق ورىن-جايلار, بيزنەس-ورتالىقتار, قوناق ۇيلەر, تۇرمىستىق قىزمەت كورسەتۋ نىساندارىمەن قاتار تۇرعىن ۇيلەر دە بوي كوتەرمەك. جالپى, ورىنبور كوشەسىنىڭ بويىندا تۇرعىزىلاتىن نىساندار بولاشاقتا استانامىزدى ودان ءارى اجارلاندىرا تۇسەدى.
ارينە, حالىقتى ەڭ الدىمەن تۇرعىن ۇيلەردىڭ قۇرىلىسى ماسەلەسى تولعاندىرادى. بۇل تۇرعىدان العاندا الداعى بەسجىلدىقتا ەلوردا ەلىمىزدەگى كوشباسشى ورىندى ساقتاپ قالاتىنىنا سەندىردى ۆيتالي سيلەتسكي. «استانادا تۇرعىن ءۇي قۇرىلىسىنا 823 جەر تەلىمى بولىنگەن. سونىڭ ءىشىندەگى 121 جەر تەلىمىنە بيۋدجەتتىك نىساندار سالىنادى, ال 702 نىساندى كوممەرتسيالىق ۇيىمدار يگەرەدى. اتالعان اۋماقتاردا 15,8 ميلليون شارشى مەتر تۇرعىن ءۇي ورنالاسادى دەپ بولجانۋدا» دەگەن باسقارما باسشىسى باس جوسپارعا سايكەس 2030 جىلعا قاراي باس قالانىڭ تۇرعىن ءۇي قورى 37,2 ميلليون شارشى مەترگە, ال تۇرعىندار سانى 1 ميلليون 220 مىڭ ادامعا جەتەدى دەپ بولجانىپ وتىرعانىن مالىمدەدى.
قوعامدىق تىڭداۋعا «جاڭارۋ» سىبايلاس جەمقورلىققا قارسى كۇرەس جالپىۇلتتىق قوزعالىسى» رەسپۋبليكالىق قوعامدىق بىرلەستىگىنىڭ توراعاسى ورالباي ابدىكارىموۆ قاتىسىپ, بايانداماشىعا سۇراقتاردى قويدى. بۇل ۇيىم قالالىق ساۋلەت جانە قالا قۇرىلىسى باسقارماسىنىڭ بىلتىرعى جانە اعىمداعى جارتىجىلدىق جۇمىسىنا تالداۋ جاساعان ەكەن. ونىڭ قورىتىندىلارىن قوعامدىق بىرلەستىكتىڭ استانا قالالىق فيليالى ديرەكتورىنىڭ ورىنباسارى ەسەنجان دوسانوۆ جاريا ەتتى. اسىرەسە, باسقارما مەملەكەتتىك قىزمەت كورسەتۋدى ورىنداۋ مەرزىمى ماسەلەسىنە كەلگەندە سىلبىر قيمىلدايتىنى ايتىلدى. جۇمىس قارقىنى مەن دەڭگەيىنە مەكەمەگە بولىنگەن بولمە سانى دا كەرى اسەر ەتىپ وتىر ەكەن. ماسەلەن, 30 قىزمەتكەرگە ەكى-اق كابينەت بەرىلگەن. وعان جاۋاپ بەرگەن ۆيتالي سيلەتسكي بۇگىنگى تاڭدا مەكەمەنىڭ 500 قىزمەتكەرى قالانىڭ ءار بۇرىشىندا ورنالاسقان عيماراتتاردا وتىرۋعا ءماجبۇر بولىپ جاتقانى, الداعى ۋاقىتتا ساۋلەت جانە قالا قۇرىلىسى باسقارماسىنا جاڭا عيمارات سالىناتىنىن ايتتى.
وتىرىس قورىتىندىسىندا «جاڭارۋ» سىبايلاس جەمقورلىققا قارسى كۇرەس جالپىۇلتتىق قوزعالىسىنىڭ تاراپىنان باسقارماعا بىرنەشە ۇسىنىس ايتىلىپ, قوعامدىق بىرلەستىكتىڭ استانا قالالىق فيليالىنىڭ ديرەكتورى داۋلەتكەرەي راحمەتۋللين جىل سوڭىنا دەيىن ۇيىم تاعى التى رەت وسىنداي قوعامدىق تىڭداۋ ۇيىمداستىرۋدى جوسپارلاعانىن جەتكىزدى.
امانعالي شميتۇلى