مەملەكەت باسشىسى قاسىم-جومارت توقاەۆ ازەربايجان رەسپۋبليكاسىنا مەملەكەتتىك ساپارمەن باردى.
قاسىم-جومارت توقاەۆتى ازەربايجان پرەزيدەنتى يلحام اليەۆ «زاگۋلبا» رەزيدەنتسياسىندا قارسى الدى. سالتاناتتى راسىمنەن سوڭ پرەزيدەنتتەر شاعىن قۇرامدا كەلىسسوز جۇرگىزدى.
قاسىم-جومارت توقاەۆ يلحام اليەۆتى ازەربايجان پرەزيدەنتى سايلاۋىنداعى ايقىن جەڭىسىمەن جانە بيىل باكۋدە سور 29 ءسامميتىن وتكىزۋ مۇمكىندىگىنە يە بولۋىمەن قۇتتىقتادى. پرەزيدەنت قازاقستان مەن ازەربايجان ىنتىماقتاستىعىنىڭ مازمۇنى بايىپ, بىرلەسكەن ءىرى جوبالارمەن تولىعا تۇسكەنىن جانە قارقىندى دامىپ كەلە جاتقانىن جوعارى باعالادى.
ءوز كەزەگىندە ازەربايجان پرەزيدەنتى قازاقستانمەن اراداعى باۋىرلاستىق بايلانىستاردىڭ بەكي تۇسكەنىن ايتتى. كەلىسسوز بارىسىندا تاراپتار ساۋدا-ەكونوميكالىق, كولىك-ترانزيتتىك, ەنەرگەتيكالىق, مادەني-گۋمانيتارلىق ىنتىماقتاستىق, سونداي-اق تسيفرلاندىرۋ, ازىق-تۇلىك قاۋىپسىزدىگى جانە جاڭارتىلاتىن ەنەرگيا كوزدەرى سالالارىنداعى ىقپالداستىق ماسەلەلەرىن تالقىلادى. سونىمەن قاتار ەكى ەل ەكونوميكاسىنىڭ دامۋىنا تىڭ سەرپىن بەرەتىن ينۆەستيتسيالىق جوبالاردى ىسكە اسىرۋ پەرسپەكتيۆاسى قاراستىرىلدى.
قاسىم-جومارت توقاەۆ قازاقستان مەن ازەربايجاننىڭ جوعارى مەملەكەتارالىق كەڭەسىنىڭ ءبىرىنشى وتىرىسىنا قاتىستى. پرەزيدەنت ءوز سوزىندە قوناقجايلىق كورسەتكەنى ءۇشىن ازەربايجان تاراپىنا ريزاشىلىعىن ءبىلدىردى. قاسىم-جومارت توقاەۆ يلحام گەيدار وعلىن ازەربايجان رەسپۋبليكاسىنىڭ پرەزيدەنتى سايلاۋىندا ايقىن جەڭىسكە جەتۋىمەن تاعى دا قۇتتىقتادى. پرەزيدەنتتىڭ ايتۋىنشا, داۋىس بەرۋ قورىتىندىسى ازەربايجان كوشباسشىسىنىڭ ستراتەگيالىق باعدارى جالپىحالىقتىڭ قولداۋىنا يە بولعانىن جانە وعان جۇرتشىلىقتىڭ سەنىمى جوعارى ەكەنىن انىق كورسەتتى.
«ءسىزدى ازەربايجان حالقىنىڭ جالپىعا بىردەي تانىلعان كوشباسشىسى دەپ بىلەمىز جانە حالىقارالىق ارەنادا دا وسىنداي تۇلعا رەتىندە قابىلدايدى. سونىمەن قاتار ازەربايجاننىڭ ءوز ەگەمەندىگىن قالپىنا كەلتىرۋ ىسىندە تاريحي جەڭىسكە جەتكەنىنە شىن جۇرەكتەن قۋانىشتىمىز» دەدى قاسىم-جومارت توقاەۆ.
مەملەكەت باسشىسى استانا مەن باكۋ ىنتىماقتاستىقتىڭ جوعارى دەڭگەيىن كورسەتىپ, بىرلەسكەن جۇمىستىڭ جاڭا باعىتتارىن دامىتىپ وتىرعانىن ەرەكشە اتاپ ءوتتى. «جاڭا عانا ءبىز ساۋدا-ەكونوميكالىق, ينۆەستيتسيالىق ىنتىماقتاستىققا, حالىقارالىق ارەناداعى ءوزارا ىقپالداستىققا قاتىستى بارلىق ماسەلەنى ەگجەي-تەگجەيلى تالقىلادىق جانە ورتاق ۇيعارىمعا كەلدىك. بۇل قازاقستان مەن ازەربايجاننىڭ, شىن مانىندە, ستراتەگيالىق سەرىكتەس, وداقتاس مەملەكەتتەر ەكەنىن كورسەتەدى. وسى ورايدا ەكى ەل ۇكىمەتتەرى بۇگىن قول قويىلعان قۇجاتتار, كەلىسىمدەر تۇرىندەگى ۋاعدالاستىقتاردى جۇزەگە اسىرۋمەن اينالىساتىنىن ەسكەرسەك, ىنتىماقتاستىعىمىزدىڭ پەرسپەكتيۆاسى وتە زور. مەن COP29 سامميتىنە قاتىسۋعا شاقىرۋىڭىزدى ىقىلاسپەن قابىل الامىن. مۇنداي شارانى وتكىزۋ – ازەربايجان مەملەكەتى مەن ونىڭ ديپلوماتياسى ءۇشىن ايتۋلى تاريحي جەتىستىك. سامميت قازىرگى كليمات ماسەلەلەرىن رەتتەۋ جانە جاھاندىق ىنتىماقتاستىقتى نىعايتۋ تۇرعىسىنان وتە ماڭىزدى. باكۋ بۇل مىندەتتى ابىرويمەن اتقاراتىنى ءسوزسىز» دەدى مەملەكەت باسشىسى.
قازاقستان پرەزيدەنتى ازەربايجانمەن اراداعى ساۋدا-ەكونوميكالىق قاتىناستاردىڭ قارقىندى دامىپ كەلە جاتقانىن اتاپ ءوتتى. «قازاقستان مەن ازەربايجان اراسىنداعى تاۋار اينالىمى 2020 جىلدان بەرى 5 ەسە ارتتى. ارينە, بۇل تسيفر سونشالىقتى تاڭقالارلىق كورسەتكىش ەمەس شىعار. بۇل باعىتتا جۇمىس ىستەۋ كەرەك, الايدا قازىرگى ساۋدا قارقىنى وڭ باعالاۋعا لايىق. ەلدەرىمىز ايتارلىقتاي ەكونوميكالىق الەۋەتكە يە. ءبىز بۇدان دا زور جەتىستىككە جەتەمىز دەپ ويلايمىن. شىن مانىندە, ىنتىماقتاستىقتىڭ اۋقىمى وتە كەڭ. ءبىز بۇگىن مۇناي مەن گازدان بولەك, كولىك پەن لوگيستيكادان باستاپ, تسيفرلاندىرۋعا دەيىنگى ماسەلەلەردىڭ ءبارىن قاراستىردىق. حالىقارالىق ارەنادا تابىستى جۇمىس ىستەپ جاتقانىمىزعا كوڭىلىم تولادى. بىرىككەن ۇلتتار ۇيىمىنداعى جانە باسقا دا حالىقارالىق ۇيىمدارداعى دەلەگاتسيالارىمىز ءوزارا جەمىستى قارىم-قاتىناس جاساپ وتىر. بۇل باعىتتاعى جۇمىستار جالعاسادى دەپ ويلايمىن» دەدى مەملەكەت باسشىسى.
پرەزيدەنتتىڭ پىكىرىنشە, قازاق-ازەربايجان قاتىناستارىن نىعايتۋعا مادەنيەت سالاسىنداعى ۋاعدالاستىقتاردى جۇزەگە اسىرۋ ءىسى دە وڭ سەپتىگىن تيگىزۋدە. ماسەلەن, قاسيەتتى تۇركىستان مەن شۋشا شاھارلارى, سونداي-اق ورال مەن مينگەچەۆير, شىمكەنت پەن گياندجا قالالارىنىڭ اراسىندا باۋىرلاستىق قاتىناس ورنادى.
«مەن ەلدەرىمىز اراسىنداعى مادەني بايلانىستارعا باسا ءمان بەرەمىن. بۇل حالىقتارىمىزدى جاقىنداتۋ تۇرعىسىنان وتە ماڭىزدى. سۋمگايت قالاسىنداعى كوشەگە احمەت بايتۇرسىنۇلىنىڭ ەسىمىمەن اتالدى. ءبىز ول ءۇشىن العىس ايتامىز. سونداي-اق استانا قالاسىنداعى كوشەگە گەيدار اليەۆتىڭ ەسىمى بەرىلدى. بۇل ەكى ەلدىڭ ۇلى تۇلعالارىن ۇلىقتاۋعا ارنالعان ەلەۋلى وقيعا بولدى. بىلتىر ازەربايجاندا قازاقستان مادەنيەتىنىڭ كۇندەرى تابىستى ءوتتى. الگىندە ءوزىڭىز ايتقانداي, ەرتەڭ فيزۋلي قالاسىندا قۇرمانعازى اتىنداعى بالالار شىعارماشىلىعى ورتالىعىن اشامىز. بۇل دا ءبىزدىڭ ىقپالداستىعىمىز بەن ىنتىماقتاستىعىمىزدىڭ سيمۆولى بولاتىنى انىق» دەدى قاسىم-جومارت توقاەۆ.
ءوز كەزەگىندە ازەربايجان پرەزيدەنتى جوعارى مەملەكەتارالىق كەڭەستىڭ العاشقى وتىرىسىنىڭ تاريحي مانىنە توقتالدى. ونىڭ پىكىرىنشە, قاسىم-جومارت توقاەۆتىڭ ساپارى مەن مەملەكەتارالىق كەڭەس وتىرىسىنىڭ قورىتىندىسى ەكى ەل قارىم-قاتىناسىنىڭ الداعى كۇن ءتارتىبىن ايقىندايدى. «قازاقستان مەن ازەربايجان – باۋىرلاس مەملەكەتتەر. حالىقتارىمىز عاسىرلار بويى تاتۋ, باۋىرلاس ەل رەتىندە ىنتىماقتاستىقتا ءومىر ءسۇرىپ كەلەدى. سوڭعى كەزدەرى ءبىزدىڭ ءبىر-بىرىمىزگە جاساعان ساپارىمىزدىڭ جيىلەدى. وسىدان-اق ءوزارا قاتىناستاردىڭ قارقىنى قانشالىقتى كۇشەيە تۇسكەنى ايقىن كورىنەدى. ءبىز قازاقستاننىڭ ءار تابىسىنا قۋانامىز. ءسىزدى جانە بۇكىل باۋىرلاس قازاقستان حالقىن الەۋمەتتىك-ەكونوميكالىق جانە يننوۆاتسيالىق دامۋ جولىنداعى كەرەمەت جەتىستىكتەرىمەن قۇتتىقتاعىم كەلەدى. سونىمەن قاتار ءبىز ەكى ەلگە ورتاق جوبالار تۋرالى اڭگىمەلەستىك. مەن قاراباقتى قالپىنا كەلتىرۋ ىسىنە باۋىرلاس ەل رەتىندە جاردەم بەرگەنى ءۇشىن قازاقستان پرەزيدەنتىنە ريزاشىلىعىمدى ءبىلدىردىم. فيزۋلي قالاسىندا قۇرمانعازى اتىنداعى بالالار شىعارماشىلىعى ورتالىعى قازاق حالقىنىڭ ازەربايجان حالقىنا تارتۋى رەتىندە پرەزيدەنت توقاەۆتىڭ باستاماسىمەن بوي كوتەردى. ەرتەڭ ءبىز دوستىعىمىزدىڭ ورتالىعىنا اينالاتىن وسى نىساندى اشامىز» دەدى يلحام اليەۆ.
قازاقستان مەن ازەربايجاننىڭ جوعارى مەملەكەتارالىق كەڭەسىنىڭ العاشقى وتىرىسىندا ساۋدا-ەكونوميكا, ينۆەستيتسيا, مۇناي-گاز, كولىك-لوگيستيكا سالالارىنداعى ىنتىماقتاستىقتى نىعايتۋ, سونداي-اق جاڭارتىلاتىن ەنەرگيا كوزدەرى, تسيفرلىق كوممۋنيكاتسيا جانە مادەني-گۋمانيتارلىق باعىتتارداعى ىقپالداستىقتى دامىتۋ ماسەلەلەرى قاراستىرىلدى.
