قاسىم-جومارت توقاەۆ پەن يلحام اليەۆ باق وكىلدەرى ءۇشىن بريفينگ وتكىزدى. مەملەكەت باسشىسى قاسىم-جومارت توقاەۆ پەن ازەربايجان پرەزيدەنتى يلحام اليەۆ بۇقارالىق اقپارات قۇرالدارىنىڭ وكىلدەرى ءۇشىن بىرلەسكەن مالىمدەمە جاسادى.
پرەزيدەنت ازەربايجاندى قازاقستاننىڭ ستراتەگيالىق سەرىكتەسى رەتىندە اتاپ ءوتىپ, باۋىرلاس مەملەكەتكە جاساعان ساپارىنىڭ ءمان-ماڭىزىنا توقتالدى.
– بۇل مەملەكەتتىك ساپار ەلدەرىمىز اراسىنداعى ىنتىماقتاستىقتى ودان ءارى دامىتۋ تۇرعىسىنان وتە ماڭىزدى. مەنىمەن بىرگە ۇلكەن دەلەگاتسيا كەلدى. بۇل باۋىرلاس ازەربايجان ەلىنە جوسپارلانعان وسى مەملەكەتتىك ساپارعا مەيلىنشە تىڭعىلىقتى دايىندالعانىمىزدى بىلدىرەدى. بۇگىن ءبىز ءتيىستى قۇجاتتار مەن كەلىسىمدەرگە قول قويۋ راسىمىنە قاتىستىق. ەڭ باستىسى, اراداعى كەلىسىمگە سايكەس, ەكى ەل ۇكىمەتتەرى مەن باسقا دا سالالىق ۆەدومستۆولار جوعارى دەڭگەيدەگى كەزدەسۋلەر بارىسىندا قول جەتكىزىلگەن ۋاعدالاستىقتاردى تولىققاندى جۇزەگە اسىرۋعا بار كۇش-جىگەرىن جۇمسايدى, – دەدى قازاقستان پرەزيدەنتى.
مەملەكەت باسشىسى قازاقستان مەن ازەربايجاننىڭ ىقپالداستىعى دوستىققا, سەنىمگە, ءبىر-ءبىرىنىڭ مۇددەسىن قۇرمەتتەۋگە جانە ەسكەرۋگە نەگىزدەلگەن مەملەكەتارالىق قاتىناستىڭ وزىق ۇلگىسى سانالاتىنىن ايتتى. قاسىم-جومارت توقاەۆتىڭ پىكىرىنشە, جوعارى دەڭگەيدەگى بايلانىستاردىڭ ءبارى ەكى ەل اراسىنداعى ستراتەگيالىق سەرىكتەستىك پەن وداقتاستىق قاتىناستاردى نىعايتۋ ءۇشىن وتە پايدالى. پرەزيدەنت جوعارى مەملەكەتارالىق كەڭەستىڭ العاشقى وتىرىسىندا تالقىلانعان ماسەلەلەردىڭ ماڭىزدىلىعىنا نازار اۋداردى.
– ءبىز بۇگىن بۇكىل الەمدە رەسۋرستاردان بولەك, كولىك-لوگيستيكا سالاسىنداعى مۇمكىندىكتەرگە قول جەتكىزۋ ءۇشىن باسەكەلەستىك كۇشەيىپ كەلە جاتقانى تۋرالى ايتتىق. بۇل – ستراتەگيالىق سالا. قازاقستان دا, ازەربايجان دا سەنىمدى سەرىكتەستىكتەر رەتىندە بۇل باعىتتا تىعىز قارىم-قاتىناس جاساپ جاتقانى قۋانتادى. سيان پورتىنان قازاقستان اۋماعى ارقىلى ازەربايجانعا دەيىنگى تەمىرجول باعدارىن اشۋدىڭ ءوزى كوپ نارسەنى اڭعارتادى. بۇل, شىن مانىندە, وتە ماڭىزدى شارا. ءبىز تسيفرلاندىرۋ, جاساندى ينتەللەكت جۇيەسىن قۇرۋ, كاسپي تەڭىزىنىڭ تابانى ارقىلى وپتيكالىق-تالشىقتى بايلانىس جەلىسىن تارتۋ باعىتتارىندا كۇش-جىگەر بىرىكتىرۋ تۋرالى پىكىرلەستىك. مۇنىڭ ءبارى – بىرەگەي جوبالار, – دەدى پرەزيدەنت.
قاسىم-جومارت توقاەۆ مادەني-گۋمانيتارلىق ىنتىماقتاستىق ماسەلەلەرىنە ارنايى توقتالدى. سونداي-اق قازاقستاننىڭ مادەنيەت كۇندەرىن جوعارى دەڭگەيدە وتكىزگەنى ءۇشىن ازەربايجان تاراپىنا ريزاشىلىعىن ءبىلدىردى.
قازاقستان پرەزيدەنتى كوپجاقتى قۇرىلىمدار اياسىنداعى ىنتىماقتاستىقتى نىعايتۋ ماڭىزدى ەكەنىن ايتتى.
– بۇۇ, تمۇ, ەقىۇ, اوسشك, سپەكا جانە تمد سياقتى اسا ماڭىزدى حالىقارالىق ۇيىمدار اياسىنداعى ىقپالداستىعىمىزدى ايرىقشا اتاپ وتكىم كەلەدى. مەنىڭشە, بۇل قارىم-قاتىناستىڭ اۋقىمى كەڭ جانە حالىقارالىق دەڭگەيدەگى ىنتىماقتاستىعىمىز ودان ءارى جالعاسا بەرەدى. ستراتەگيالىق سەرىكتەستىك تۇرعىسىنان كەلگەندە, مۇنىڭ دا ءمانى زور, – دەدى قاسىم-جومارت توقاەۆ.
ءوز كەزەگىندە ازەربايجان پرەزيدەنتى يلحام اليەۆ مەملەكەتتىك ساپارمەن كەلگەنى ءۇشىن قاسىم-جومارت توقاەۆقا العىس ايتىپ, كەلىسسوزدەردىڭ ناتيجەسىنە كوڭىلى تولاتىنىن جەتكىزدى.
قازاقستان مەن ازەربايجان پرەزيدەنتتەرىنىڭ كەلىسسوزى ناتيجەسىندە ونداعان قۇجاتقا قول قويىلدى.
