2016 جىلى ەلوردادا 230 مىڭنان استام قۇقىق بۇزۋشىلىق انىقتالدى. ونىڭ باسىم بولىگى بەينەباقىلاۋ جۇيەسىنىڭ كومەگىمەن جۇزەگە اسقان.
قازىرگى ۋاقىتتا استانادا 800-گە جۋىق بەينەباقىلاۋ كامەراسى بار. بۇل ءتارتىپ ساقشىلارىنىڭ قىلمىستاردىڭ الدىن الۋ جانە ولاردى اشۋ بويىنشا جۇمىسىن ەداۋىر جەڭىلدەتەدى.
الدا وتەتىن حالىقارالىق كورمە قارساڭىندا قالا ماڭى اۋماعىن قامتي وتىرىپ, تاعى دا بەينەكامەرالار ورناتۋ جوسپاردا بار. سونىمەن بىرگە, 80 كوشە قيىلىسىندا, 50 جەلىلىك ۋچاسكەدە فوتو جانە بەينەتىركەۋ كەشەندەرىن ورناتۋ كوزدەلگەن.
«استاناداعى «ەكسپو-2017» حالىقارالىق كورمەسىنە دايىندىق جۇمىستارىن جوعارى دەڭگەيدە ۇيىمداستىرىپ, تىڭعىلىقتى وتكىزۋ ءۇشىن ناقتى شارالار بەلگىلەندى. قالا تۇرعىندارى مەن قوناقتارىنىڭ قاۋىپسىزدىگىن جوعارى دەڭگەيدە ۇيىمداستىرۋعا, قالانىڭ ينفراقۇرىلىمىن دايىنداۋعا جانە قىزمەت كورسەتۋ سەكىلدى باسقا دا قاجەتتى شارالاردى وتكىزۋ قاجەت. ايتىلعان جۇمىستار بارىسىندا ەرەكشە جاعداي ورتالىعى قۇرىلىپ, قالاداعى بارلىق تۇرعىن جاي مەن الەۋمەتتىك, كوممەرتسيالىق جانە ينفراقۇرىلىمدىق وبەكتىلەرگە بەينەباقىلاۋ
ورناتىلادى. قالا اۋماعىندا 2017 جىلدىڭ العاشقى جارتىجىلدىعىندا 3 مىڭ كامەرا قويىلادى, 2017 جىلدىڭ اياعىندا – 7 مىڭ, وسىلايشا, ەلوردادا جۇمىس ىستەپ تۇرعان بەينەكامەرالاردىڭ جالپى سانى 12 مىڭدى قۇرايدى» دەيدى قالا اكىمى اسەت يسەكەشەۆ.
