استانا تويىنا ازىرلىك الدەقاشان باستالىپ كەتتى. التى كۇن بويى ءدۇبىرى تىيىلمايتىن دۋمانعا الىس-جاقىن شەت مەملەكەتتەردەن قوناقتار اعىلىپ كەلەدى. ءتۇرلى شارالار وتەدى. قايىرىمدىلىق اكتسيالارى تاعى بار. اسىرەسە, تاريحقا تەرەڭ بويلاپ, كەشەگى زامانداردى ەسكە الامىز. سالتاناتى مەن ءسانى, ءان-جىرى ءبىر بولەك.
داستۇرگە اينالعان «استانا تاڭداۋى» بايقاۋى بيىل دا جالعاسىن تابادى. قالا تۇرعىندارىنىڭ ۇزدىك مامان يەلەرىن: پەداگوگتى, قوعامدىق كولىك جۇرگىزۋشىسىن, ۋچاسكەلىك ينسپەكتوردى, دارىگەردى, ەنەرگياشىنى, جول جوندەۋشى مەن قۇرىلىسشىنى انىقتاۋىنا ارنالعان سايىسقا 1 ماۋسىم كۇنى ينتەرنەت ارقىلى اشىق داۋىس بەرۋ باستالدى. «بايتەرەك» حالىقارالىق مەديا ورتالىعىنىڭ مالىمەتى بويىنشا, سايتقا ورنالاستىرىلعان ۇمىتكەرلەرگە العاشقى ەكى تاۋلىكتىڭ ىشىندە 2223 ادام داۋىس بەرگەن.
بايقاۋ جونىندە ايتساق, وعان قاتىسۋعا وتىنىشتەر قابىلداۋ ءساۋىر ايىنان 31 مامىرعا دەيىن جۇرگىزىلدى. وسى ۋاقىت ىشىندە 250 ءوتىنىش كەلىپ ءتۇستى. سونىڭ ىشىندە 195 مامان ىرىكتەپ الىندى, ولار داۋىس بەرۋگە قاتىسۋدا.
ەڭ كوپ, ياعني, 65 ءوتىنىش مۇعالىمدەردەن كەلىپ ءتۇسىپتى. ەكىنشى ورىندا ەنەرگياشىلار – 39, ءۇشىنشى – دارىگەرلەر – 31, سودان كەيىن قۇرىلىسشىلار – 25, جۇرگىزۋشىلەر – 14, ۋچاسكەلىك پوليتسيا ينسپەكتورلارى – 13 جانە جول جوندەۋشىلەر – 8.
داۋىس بەرۋگە تەك تىركەلگەن پايدالانۋشىلار عانا قاتىسا الادى. www.astana.gov.kz سايتىندا داۋىس بەرۋ كەزەڭىندە ءار اتالىم بويىنشا ءبىر ۇمىتكەرگە ءبىر رەت قانا داۋىس بەرۋگە بولادى. داۋىس بەرۋ پاراقشاسىندا قاتىسۋشىلار ءار سانات بويىنشا الفاۆيت رەتىمەن جازىلعان.
بايقاۋ جەڭىمپازدارى حالىققا تانىلىپ, استانا قالاسىنىڭ اكىمىنىڭ كۋبوگى مەن گراموتاسىن يەلەنەدى. سونىمەن قاتار, جەڭىمپازدار تۋرالى شاعىن دەرەكتى فيلم ءتۇسىرىلىپ, فوتوسەسسيا ۇيىمداستىرىلادى, ەلوردا كوشەلەرىندە ۇزدىك مامان يەلەرىنىڭ بەينەسى مەن ەسىمدەرى جازىلعان بيلبوردتار ىلىنەدى.
