كەشە بەيبىتشىلىك پەن كەلىسىم سارايىندا استانا اكىمدىگى مەن ساراتوۆ وبلىسى ۇكىمەتىنىڭ اراسىنداعى ىنتىماقتاستىق تۋرالى مەموراندۋمعا سالتاناتتى تۇردە قول قويىلدى. بۇعان استانا قالاسى اكىمىنىڭ ورىنباسارى ۆاسيلي كرىلوۆ پەن ساراتوۆ وبلىسىنىڭ گۋبەرناتورى ۆالەري راداەۆ قاتىستى.
قۇجاتتا ەكونوميكانىڭ ەڭ ماڭىزدى بۋىندارى سانالاتىن جاڭا ينۆەستيتسيالار تارتۋ مەن اقپارات, تاجىريبە الماسۋعا جول اشاتىن ساۋدا-ەكونوميكالىق بايلانىستارعا باسا كوڭىل بولىنگەن. سونىمەن قاتار, ونەركاسىپتىك ءوندىرىس, قۇرىلىس يندۋسترياسى مەن ونەركاسىپ كاسىپورىندارىنىڭ ونىمدەرىن جەتكىزۋدى ءوزارا ءتيىمدى تۇردە جۇزەگە اسىرۋدى قاراستىراتىن ساۋلەت جانە كوممۋنالدىق شارۋاشىلىق پەن جول-كولىك ينفراقۇرىلىم سالاسى دا قامتىلعان.
اگروونەركاسىپ كەشەنىندەگى ءوزارا ءىس-ارەكەت قايتا وڭدەۋشى وندىرىستەردى مودەرنيزاتسيالاۋ ءۇشىن عىلىمدى قاجەت ەتەتىن جانە پروگرەسسيۆتى تەحنولوگيالاردى ەنگىزۋگە نەگىز بولادى. ءبىلىم جانە عىلىم سالاسى دا نازاردان تىس قالماق ەمەس, وسى سالاداعى ىنتىماقتاستىق تاراپتاردىڭ ءبىلىم مەكەمەلەرى اراسىندا تىعىز بايلانىس ورناتۋعا جانە تاجىريبە الماسۋعا مۇمكىندىك بەرەدى. سونداي-اق, قۇجاتتا دەنساۋلىق ساقتاۋ جانە الەۋمەتتىك دامۋ سالاسى دا قامتىلعان. ال بۇل سالادا ءوزارا يننوۆاتسيالىق تەحنولوگيالاردى ەنگىزۋ تاجىريبەسىمەن الماسۋ جانە حالىققا مەديتسينالىق كومەك كورسەتۋدى ۇيىمداستىرۋ جۇيەسىن جەتىلدىرۋ جوسپارلانىپ وتىر.
جاستار ساياساتى, مادەنيەت, دەنە تاربيەسى جانە تۋريزم سالالارىنداعى ىنتىماقتاسۋ دا بىرلەسە وتىرىپ, ءتۇرلى ءىس-شارالاردى كوپتەپ ۇيىمداستىرۋعا مۇرىندىق بولماقشى. بۇل – استانا مەن ساراتوۆ وبلىسىنىڭ جاستارى اراسىنداعى دوستىق قارىم-قاتىناستى دامىتۋعا مۇمكىندىك بەرەتىن جوبا.
قۇجاتتا كورسەتىلگەن وسى مىندەتتەردىڭ بارلىعى ساراتوۆ وبلىسىنىڭ ۇكىمەتى مەن استانا قالاسى اكىمدىگىنىڭ اراسىنداعى 2014-2016 جىلدارعا ارنالعان كەلىسىم اياسىندا ىسكە اسادى دەپ كۇتىلۋدە.
نۇريسلام قۇسپانعالي
