استانا قالاسىندا بەلگىلى تۇراعى جوق ادامدارعا ارنالعان الەۋمەتتىك بەيىمدەۋ ورتالىعى بار. 2001 جىلدان بەرى جۇمىس ىستەپ كەلە جاتقان مەكەمەدە ازاماتتار ءبىر ايدان ءبىر جىلعا تۇرىپ, مەديتسينالىق الەۋمەتتىك قىزمەت الادى.
ءبىر تانىسىم قازىرگى زاماننىڭ ەڭ اۋىر قارعىسى «ءوز ماسەلىڭدى ءوزىڭ شەش» ەكەنىن ايتىپ, ويلانتىپ تاستاعان ەدى. راسىندا, تىرلىكتىڭ كەمەسى سۋعا باتقاندا تاۋەكەلدىڭ «جەل قايىعىمەن» يىرىمنەن شىعىپ كەتسەڭ, جاقسى. ال, ءيىرىم باتىرىپ اكەتسە شە؟! سوندا ادام بالاسى شىن قارىپكە اينالماي ما؟! وسىندايدا اعايىندارى سىرت اينالسا, «ءوز ماسەلەڭدى ءوزىڭ شەش» دەپ قوعام بەزبۇيرەكتىك تانىتسا نە بولماق؟ قۋانىشتىسى, ەلوردا مۇنداي ادامدارعا شاما-شارقىنشا قول ۇشىن بەرىپ كەلەدى. جوعارىدا اتالعان بەلگىلى تۇراعى جوق ادامدار مەكەندەيتىن ورتالىق – سونىڭ كۋاسى.
وتكەن جىلى اتالمىش مەكەمەگە 1275 ادام كەلىپ تۇسكەن. ونىڭ 300-ىندە عانا جەكە قۇجاتى بولسا, قالعان 984-ىندە جەكە باسىن راستايتىن قۇجاتى بولماي شىققان. ورتالىق سولاردىڭ 134-ءىنىڭ قۇجاتىن قالپىنا كەلتىرىپ, 10 ادامنىڭ «قىزىل پاسپورتى» جەكە كۋالىككە اۋىستىرىلعان. ال, 92 ازامات ورتالىقتىڭ كۇشىمەن جۇمىسقا ورنالاستىرىلعان.
قاڭعىباستار قامىتىن كيگەندەردىڭ جەتەۋى قارتتار مەن مۇگەدەكتەرگە ارنالعان الەۋمەتتىك مەديتسينالىق مەكەمەگە ورنالاسىپ, تۇراقتى جايىن تاپتى. 55 ادام دەنساۋلىعىنا بايلانىستى مۇگەدەكتىككە راسىمدەلىپتى. ال 63 ازاماتقا جاسىنا بايلانىستى زەينەتاقى مەن مۇگەدەكتىگىنە قاتىستى الەۋمەتتىك تولەمدەر الۋىن قامتاماسىز ەتكەن. وسى كەزەڭدە رەسپۋبليكانىڭ وزگە ايماقتارىنان كەلگەن 310 ادام كەلگەن جەرلەرىنە قايتارىلعان. اعايىندارىنان قول ۇزگەن ءجۇز ادامنىڭ جاقىندارىمەن بايلانىسىپ, تۋىستارىنىڭ الىپ كەتۋىنە قول ۇشىن بەرىپتى. ەشقانداي تۋىسى تابىلماعان 60 ازامات وزدەرى تىركەلگەن باسقا وبلىستارداعى بالامالى الەۋمەتتىك ورىندارعا جەتكىزىلگەن.
وسى جىلدىڭ العاشقى توقسانىندا الەۋمەتتىك بەيىمدەۋ ورتالىعىنا 618 ادام كەلىپ ءتۇسىپ, بەلگىلەنگەن ءتارتىپ اياسىندا قىزمەت كورسەتىلۋدە. ورتالىقتا تەك قانا تۇنەمەلىككە 50 توسەك-ورىن بولىنگەن. وتكەن جىلى 7908 ادام وسىندا قونىپ كەتىپ ءجۇرىپتى. ۇستىمىزدەگى جىلدىڭ العاشقى توقسانىندا بۇل قىزمەت 4771 جانعا كورسەتىلگەن. 2012 جىلدان بەرى مۇندا ءموبيلدى «الەۋمەتتىك جاساق» قىزمەتى ىسكە قوسىلعان.
– كۇن سايىن ديسپەتچەرىمىز بارلىق تىرەك پۋنكتتەرىمەن, پيك, قالا ۆوكزالدارىمەن بايلانىسادى. ەگەر بەلگىلى تۇراعى جوق ادامدار انىقتالسا, ولاردى مەكەمەمىزگە الدىرتۋعا تىرىسامىز. قالا بويىنشا 9:00-دەن 22:00-گە دەيىن جۇمىس ىستەيتىن ءموبيلدى الەۋمەتتىك جاساعىمىز ءبىزدىڭ قاراۋىمىزداعى ساناتقا كىرەتىن ادامداردى جىلدام جەتكىزە الادى. مۇندا ولارعا مەديتسينالىق كومەك كورسەتىلىپ, الەۋمەتتىك احۋالىنا تالداۋ جاساپ كورسەتىلەتىن قىزمەتتى بەلگىلەيمىز, – دەيدى استانالىق بەلگىلى تۇراعى جوق ادامدارعا ارنالعان الەۋمەتتىك بەيىمدەلۋ ورتالىعى ديرەكتورىنىڭ الەۋمەتتىك ماسەلەلەر جونىندەگى ورىنباسارى دينارا شاپينا.
وسىلايشا, مەكەمەنىڭ الەۋمەتتىك قىزمەتكەرلەرى وزدەرى از بولسا دا قامقورلىققا اسا ءزارۋ جاندارعا جان-جاقتى كومەك كورسەتىپ, ولاردىڭ ءومىر ءسۇرۋ سالتتارىنا وزگەرىس جاساپ, كوكىرەكتەرىندە ءۇمىت وياتىپ, جاقسىلىققا جەتەلەۋگە كومەكتەسىپ كەلەدى.
ءبىر جاقسىسى, مۇندا «ءوز ماسەلەڭدى ءوزىڭ شەش» دەگەن ءسوز جوق. كەرىسىنشە, قۇردىمعا كەتكەندەردى قۇتقارۋ ءۇشىن ورتالىق قولدان كەلگەن بار مۇمكىندىكتەردى قاراستىرىپ وتىر.
ايگۋل ۋايسوۆا
