سوڭعى جىلدارى استانادا اۋلا كلۋبتارىنىڭ قاتارى كوبەيدى. بۇل كۇندە قالالىق اكىمدىكتىڭ قولداۋىمەن اشىلعان 12 اۋلالىق كلۋب ەلوردالىقتارعا قىزمەت كورسەتىپ وتىر.
بۇلار, اسىرەسە, بالالار مەن جاستار ءجيى باراتىن پايدالى ورىنعا اينالدى. جاستار ساياساتى ماسەلەلەرى باسقارماسىنا قاراستى بۇل مەكەمەلەر – شىنىندا دا كوپشىلىكتىڭ بوس ۋاقىتىن ءتيىمدى ۇيىمداستىرۋعا تاپتىرماس مەكەن. اسىرەسە, جازعى دەمالىس شاعىندا اتالمىش ۇيىمداردىڭ كومەگى كوپ ەكەنى بەلگىلى.
سونداي ورتالىقتاردىڭ ءبىرى – شاھارداعى ابىلاي حان كوشەسىندە ورنالاسقان «جاس قانات» اۋلا كلۋبى جاقىندا «اشىق ەسىك كۇنىن» وتكىزدى. كوڭىلدى شارا بارىسىندا بۇلدىرشىندەر مەن جاسوسپىرىمدەر ءان مەن بيدەن جارىسىپ, قىزۋ دوداعا ءتۇستى. سونىمەن بىرگە, فۋتبول, تەاتر ونەرى, اكتەرلىك شەبەرلىك, ۇستەل تەننيسى جانە سكاۋتينگ سەكىلدى جاڭا ۇيىرمەلەر تۇساۋىن كەسىپ, بالاقايلاردى ءبىر قۋانتتى.
– مۇنداعى ۇل-قىزدار اۋداندىق جانە قالالىق دەڭگەيدەگى مادەني-سپورتتىق سايىستارعا بەلسەنە اتسالىسادى. ەڭ ۇزدىك توپتار رەسپۋبليكالىق جارىستارعا جىبەرىلەدى. جالپى, اۋلا كلۋبتارى بالدىرعاندارىمىزدى سالاۋاتتى ءومىر سالتىنا باۋلۋعا, شىعارماشىلىققا يكەمدەۋگە جاردەمدەسەدى. بۇگىندە قالادا اكىمدىكتىڭ باستاماسىمەن قۇرىلعان 12 اۋلا كلۋبى جۇمىس ىستەيدى. ەڭ باستىسى ولارداعى بارلىق ۇيىرمەلەرگە, وتكىزىلەتىن شارالارعا قاتىسۋ تەگىن, – دەيدى جاستار ساياساتى ماسەلەلەرى باسقارماسىنىڭ اۋلا كلۋبتارىن دامىتۋ جونىندەگى ءبولىمى باسشىسى مۇرات بورىقباەۆ.
بوتاگوز ماراتقىزى
