«استانا» ۇزاپ بارادى

فۋتبولدان قازاقستان چەمپيوناتىنىڭ كەزەكتى ويىنىن «استانا» كومانداسى تارازدا وتكىزىپ, جەڭىسكە جەتتى.

بۇل ۇلتتىق بىرىنشىلىكتىڭ كوش باسىندا جانە سوڭىندا تۇرعان كوماندالاردىڭ كەز­دەسۋى بولدى. بيىلعى ماۋسىم باستالعالى ءار كوماندا 14 ويىننان وتكىزدى. «استانا» ءبىر-اق رەت جەڭىلىستىڭ اششى ءدامىن تاتسا, «تاراز» ءبىر-اق رەت جەڭىسكە جەتكەن ەكەن.
تارازداعى ويىن دا وسى كورسەتكىشتەرگە ساي ءوتتى دەۋگە بولادى. «استانا» فۋتبولشىلارى سەرىكجان مۋجيكوۆ پەن دجوردج دەسپوتوۆيچ مەرگەندىگىمەن تانىلدى. ال الاڭ يەلەرى قانشالىقتى تىرىسقانىمەن, قوناقتار قاقپاسىنىڭ قۇلپىن بۇزا المادى. وسىلايشا, «استانا» 2:0 ەسەبىمەن كەزەكتى جەڭىسىنە جەتتى.
تۋردىڭ باسقا ويىندارىندا مىناداي ناتيجەلەر تىركەلدى: «قايرات» – «اتىراۋ» 5:2, «وقجەتپەس» – «اقجايىق» 4:2, «توبىل» – «ورداباسى» 1:0, «جەتىسۋ» – «اقتوبە» 1:1, «ەرتىس» – «شاحتەر» 0:0.
«استانا» كەلەسى ويىنىن 11 ماۋسىم كۇنى «استانا ارەنا» الاڭىندا وتكىزەدى. قارسىلاسى – «جەتىسۋ».
تۋرنير كەستەسىندە ازىرگە «استانا» 37 ۇپايمەن توپ ىشىنەن ۇزاپ بارادى. ەكىنشى ورىندا 31 ۇپاي ەنشىلەگەن «ەرتىس», ال 26 ۇپاي جيناعان «قايرات» ۇزدىك ۇشتىكتى تۇگەندەپ تۇر.

عالىم قوجابەكوۆ