ەلوردا اكىمى التاي كولگىنوۆ جاستار ۇيىمدارىنىڭ وكىلدەرىمەن, ەرىكتىلەرمەن كەزدەستى. كونستيتۋتسيا كۇنى قارساڭىندا ەلباسى مەن پرەزيدەنت اتىنان جاستار ۇيىمدارى مەن ۆولونتەرلىك قوزعالىستاردىڭ بەلسەندى وكىلدەرىنە العىس حاتتار تابىس ەتتى.
جيىندا جاستار تۇرعىن ءۇي باعدارلاماسى ماسەلەلەرىن كوتەردى. سونىمەن قاتار ەكولوگيا, ۆولونتەرلىك جوبالاردى قولداۋ: ءتۇرلى تاقىرىپتار مەن سالالار بويىنشا تەگىن كۋرستاردى وقىتۋ, ءىسىن جاڭا باستاعان كاسىپكەرلەردى قولداۋ, سپورتپەن شۇعىلدانۋعا بولاتىن سپورت عيماراتتارىنىڭ سانىن ارتتىرۋ جانە باسقا دا ماسەلەلەر ورتاعا سالىندى. وسى ورايدا اكىم بيىل جۇمىس ىستەيتىن جاستارعا ارنالعان جالعا بەرىلەتىن تۇرعىن ءۇي باعدارلاماسىن جالعاستىراتىنىن ايتتى.
سونداي-اق اكىم «ەلوردا جاستارى» استانالىق باعدارلاماسىنىڭ تۇجىرىمداماسىن ازىرلەيتىنىن جەتكىزدى. «بۇگىن جاستار ۇيىمدارىنىڭ وكىلدەرىمەن, ەرىكتىلەرمەن كەزدەسىپ, ۇسىنىستارىن تىڭدادىق. ولاردىڭ يدەيالارىن باعدارلاما تۇجىرىمداماسىنا ەنگىزەمىز. جاستار – ەلىمىزدىڭ دامۋ درايۆەرى, پاندەميا كەزىندە ولار كوروناۆيرۋسپەن كۇرەسۋگە زور ۇلەس قوستى. ارنايى وقىتىلعان ەرىكتىلەر بلوكبەكەتتەردە كەزەكشىلىك اتقاردى, دەزينفەكتسيا جۇمىستارىن جۇرگىزدى, ءدارى-دارمەكتەر مەن قورعانىس قۇرالدارىن تاسىمالدادى. زەينەتكەرلەرىمىز بەن مەديتسينا قىزمەتكەرلەرىنە كومەك كورسەتۋدى جالعاستىرىپ جاتىر. كەلگەن ءار ادامنىڭ پىكىرىن تىڭداۋ ءبىز ءۇشىن ماڭىزدى بولدى. جاستارىمىزدىڭ قالانى دامىتۋعا اتسالىسىپ جاتقانى قۋانتادى. سۇراقتاردىڭ باسىم بولىگى شەشىمىن تاپتى, قالعاندارى بويىنشا تاعى دا كەزدەسۋلەر وتكىزەمىز» دەپ قورىتىندىلادى كەزدەسۋدى قالا باسشىسى.
