قازاقستاندا تاياۋداعى ۋاقىتتا بەنزين باعاسى ارزاندامايدى. وعان سەبەپ, بىزبەن سالىستىرعاندا تمد-نىڭ كوپتەگەن ەلدەرىندە بەنزين باعاسى 30-40 پايىزعا قىمبات كورىنەدى. بۇل تۋرالى جۇما كۇنى وتكىزىلگەن بريفينگتە ەلىمىزدىڭ ەنەرگەتيكا ءمينيسترى قانات بوزىمباەۆ ءمالىم ەتتى.
«تمد ەلدەرى اراسىندا بەنزين تۇرىكمەنستاندا عانا بىزدەن 15 پايىزعا ارزان. بىراق, وزبەكستاندا ءبىرشاما قىمبات. بىزدە بەنزيننىڭ ءليترى جارتى دوللار بولسا, ول جاقتا ەكى ەسە قىمبات – ءبىر دوللارعا جۋىق. قىرعىزستاندا دا جوعارى, رەسەيدە 30-40 پايىزعا قىمبات. سوندىقتان رەسەيمەن شەكارا اشىقتىعىن, ەاەو ەلدەرىنىڭ ورتاق نارىعىن ەسكەرەر بولساق, وندا بەنزين باعاسى ارزاندامايتىنى انىق. دەگەنمەن, جەرگىلىكتى قورلاردىڭ ەسەبىنەن بۇگىنگى كۇنگى باعا دەڭگەيىن ۇستاپ تۇرامىز», – دەدى ول جۋرناليستەردىڭ قويعان ساۋالىنا وراي.
استانا قالاسىندا دا نارىقتا كوبىرەك سۇرانىسقا يە ا-92 ماركالى بەنزيننىڭ ءليترى اپتا باسىنان بەرى 158-159 تەڭگەدەن 161-163 تەڭگەگە كوتەرىلىپ, جانار ماي قۇيۋ بەكەتتەرىندە ءتۇرلى باعامەن ساتىلۋدا.
جۇماعازى كەنجەبەك
