ول «اكەسىن كورىپ, وق جوندى». ول وزىنەن ۇلكەن داۋلەردى الىپ-جىقتى. ول – «قازاقستان بارىسى» اتاندى.
مۇحيت تۇرسىنوۆ. ەكى كوزىمىزدى ءتورت ەتىپ, تاعاتىمىزدى تاۋىسقان «قازاقستان بارىسىنىڭ» ءتورتىنشى ماۋسىمىندا توپ جارعان جىگىت. مۇحيتتىڭ اكەسى شىڭعىسبەك – بالۋاننىڭ جەكە باپكەرى. وسىلايشا شىعىس قازاقستاندىق اكەلى-بالالى ەكەۋدىڭ توككەن تەرى ەش كەتپەي, بيىلعى ءتۋرنيردى باعىندىرۋ باقىتىنا يە بولعان جايى بار.
استانا كۇنى قارساڭىندا وتكەن جارىس باسىندا «الداسپان», «الاش ۇلى» سىندى ونەر ۇجىمدارى مۋزىكالىق شاشۋمەن «بولعانىنان بولادىسى قىزىق» تويدىڭ كورىگىن ودان ءارى قىزدىرا تۇسكەندەي جاقسى اسەر قالدىردى. ال, جەر-جەردەن شىققان ايقاي مەن سوعىلعان شاپالاقتان قۇلاق تۇنادى. مىنە, بيىلعى تۋرنير وسىلاي باستالعان ەدى.
«جالىن» دەگەن بۇركەنشىك اتپەن ونەر كورسەتكەن جەڭىمپاز فينالدا قاراعاندىلىق «جاس سۇڭقار» – اسىل بارمەنوۆتەن ايلاسىن اسىردى. نەگىزگى ۋاقىتتا ءبىرىن-ءبىرى جەڭە الماعان قوس بالۋان كەزدەسۋ سوڭىنداعى قويان-قولتىق بەلدەسۋ ارقىلى عانا كىم مىقتىنى انىقتاعان بولاتىن.
تۋرنير قورىتىندىسىندا, 2014 جىلعى «قازاقستان بارىسى» مۇحيت تۇرسىنوۆ 150 مىڭ اقش دوللارىن قانجىعاسىنا بايلاسا, ونىڭ باپكەرىنە, ياعني اكەسى شىڭعىس تۇرسىنوۆقا 20 مىڭ اقش دوللارى تابىستالدى. ال, ەكىنشى ورىن يەلەنگەن اسىل بارمەنوۆ 30 مىڭ دوللار كولەمىندە سىياقى السا, ونىڭ باپكەرىنە 10 مىڭ اقش دوللارى ۇسىنىلدى.
ۇزدىك ۇشتىككە تالاسقان كەزدەسۋدە قىزىلوردادان كەلگەن «سىر بارىسى» رۋسلان ابدىرازاقوۆ جامبىلدىق «تالاس ارلانى» – داۋلەتحان جاقىپوۆتىڭ جاۋىرىنىن جەر يىسكەتىپ, تارتىستى كەزدەسۋدىڭ نەگىزگى ۋاقىتى ءتامامدالماي جاتىپ-اق قولا بەلبەۋدى بەلىنە تاقتى. سونداي-اق, ول 10 000 اقش دوللارىنا تاتيتىن چەككە يە بولدى. جەكە باپكەرى دە ماراپاتتان قۇر قالماي, 3 000 اقش دوللارى كولەمىندەگى سىياقىنى قالتاسىنا باستى. ال, كورەرمەندەردىڭ كوزايىمىنا اينالعان داۋلەتحان جاقىپوۆ ۇيىمداستىرۋشىلار تاراپىنان ارنايى سىيلىق – «Hyundai Elantra» كولىگىنە وتىردى.
سونىمەن قاتار, بوز كىلەمگە «قازاقستان بارىسىنىڭ» بىلتىرعى جەڭىمپازى, شىعىس قازاقستان وبلىسىنىڭ ۇكىلەگەن ءۇمىتى ايبەك نۇعىماروۆ شيرەك فينالدىڭ الدىندا قولا جۇلدەگەر قىزىلوردالىق رۋسلان ابدىرازاقوۆقا ەشكىم كۇتپەگەن جەردەن ۇتىلىپ قالدى. وسىلايشا 95 كەلىدەگى «سىر بارىسى» وزىنەن 20 كەلى اۋىر ءارى اتىنان ات ۇركەتىن قارسىلاسىنان ەش قايمىقپاي, تازا جەڭىسپەن كەلەسى كەزەڭگە ءوتتى.
مۇحيتتىڭ بۇل جەڭىسىن زاڭدىلىق دەپ ايتىپ جاتقاندار دا بار. ويتكەنى, ول 2012 جىلى «قازاقستان بارىسى» اتانعان ءارى «ەۋرازيا بارىسى» بەيبىت ىستىباەۆتان ايلاسىن اسىرىپ كەتتى. ال, بەيبىت بيىلعى ءتۋرنيردىڭ نەگىزگى فاۆوريتتەرىنىڭ ءبىرى سانالاتىن.
شارا سوڭىنداعى جەڭىمپازداردى ماراپتتاۋ راسىمىندە ەلدىڭ بەلدى ازاماتتارى سوزدەرىن ايتىپ, جەڭگەن بالۋانداردى قۇتتىقتاسا, جەڭىلگەندەردى مويىماۋعا شاقىردى. سولاردىڭ ىشىندە قالا اكىمى يمانعالي تاسماعامبەتوۆ, «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەك, قر سپورت جانە دەنە شىنىقتىرۋ ىستەرى اگەنتتىگىنىڭ توراعاسى تاستانبەك ەسەنتاەۆ جانە داڭقتى پالۋان جاقسىلىق ۇشكەمپىروۆ سياقتى تۇلعالار بولدى. سونداي-اق, كورەرمەندەر اراسىندا ۇتىس بيلەتتەرى ويناتىلىپ, جولى بولعان ادامعا كولىك بەرىلدى.
بيىلعى تۋرنيرگە قاتىسۋشىلاردىڭ سانى 33 ەمەس, 28 بولعانىن ايتقانبىز. ولاردىڭ نەگىزگى سەبەبى – دوپينگ قولدانعاندارىندا. ياعني, مەملەكەتتىك «دوپينگكە قارسى ۇلتتىق ورتالىق» مەكەمەسىنىڭ 2014 جىلعى 20 مامىرداعى دوپينگتىك سىناما قورىتىندىسىنا سايكەس, قانىنىڭ قۇرامىندا دوپينگتىك زات انىقتالعان باتىس قازاقستان وبلىسىنىڭ بالۋانى دامير قالاقوۆ, قوستاناي وبلىسىنىڭ بالۋانى ميحايل تۆەردوحلەبوۆ, استانا قالاسىنىڭ بالۋانى نۇرعالي بايتاراقوۆ جانە ماڭعىستاۋ وبلىسىنىڭ بالۋانى ماناس يمانقۇلوۆ فينالدىق باسەكەدەن شەتتەتىلگەن ەدى.
نۇريسلام قۇسپانعالي
