بۇگىن قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆانىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى.
كوميسسيا وتىرىسىن اشا وتىرىپ, گۇلشارا ابدىقالىقوۆا مەملەكەت باسشىسى ن.ءا.نازارباەۆ «قازاقستان جاڭا جاھاندىق ناقتى احۋالدا: ءوسىم, رەفورمالار, دامۋ» اتتى جولداۋىندا جاڭا الەۋمەتتىك ساياسات ۇسىنعانىن ايتتى. ەلباسى اتاپ وتكەندەي, «الەۋمەتتىك ساياساتتاعى مەملەكەتتىڭ باسىمدىعى ادام كاپيتالىن دامىتۋعا كەڭ اۋقىمدى ينۆەستيتسيالار بولۋى ءتيىس». بۇل ورايدا الەمنىڭ ۇزدىك ۋنيۆەرسيتەتتەرىندە جوعارى بىلىكتى كادرلاردى دايارلاۋ ماڭىزدى مانگە يە بولۋدا.
مەملەكەتتىك حاتشى ستيپەنديانىڭ ۇلتتىق ەكونوميكانىڭ جەتەكشى سالالارىن ەكپىندى دامىتۋ ءۇشىن وزىق ءبىلىم مەن تاجىريبەنى بەلسەندى تۇردە ترانسفەرتتەۋ پروتسەسىندەگى ەرەكشە ءرولىن اتاپ ءوتتى.
كوميسسيانىڭ شەشىمىمەن ماگيستراتۋرادا جانە دوكتورانتۋرادا وقۋعا, الەمنىڭ جەتەكشى عىلىمي جانە وندىرىستىك ورتالىقتارىنا تاعىلىمداماعا جىبەرىلەتىن 375 ۇمىتكەرگە ستيپەنديا تاعايىندالدى.
سونداي-اق, كوميسسيانىڭ جۇمىسى شەڭبەرىندە 2016 جىلعا باسىم ماماندىقتار تىزبەسى بەكىتىلدى. ماماندىقتاردىڭ جاڭا ءتىزىمى مەملەكەتتىك ورگانداردىڭ تاپسىرىستارى بويىنشا عانا جاساقتالدى جانە ەكى ەسەگە دەيىن قىسقارتىلدى. تىزبەدە بارلىعى 161 ماماندىق ۇسىنىلعان, ونىڭ 45-ءى مەديتسينا, 67-ءى تەحنيكالىق, 49-ى گۋمانيتارلىق ماماندىقتان تۇرادى.
وتىرىستى قورىتىندىلاي وتىرىپ, قازاقستان رەسپۋبليكاسىنىڭ مەملەكەتتىك حاتشىسى گ.ابدىقالىقوۆا جاڭا 2016 جىلى ستيپەنديانى دامىتۋدىڭ جاڭا باعىتتارىن ىسكە اسىرۋعا جانە ۇمىتكەرلەردى ىرىكتەۋدىڭ ساپاسىن ارتتىرۋعا قاتىستى بىرقاتار تاپسىرمالار بەردى.
