قىزىقتى كورمە كۇندەرى دە ورتالانىپ كەلەدى. ۋاقىت بولسا «ەكسپو-2017» كورمەسىندە جىبەرىپ العان تۇستارىمىزدى تۇگەندەپ, قايتا سوعۋعا تىرىسامىز. العاشقى دۇرمەكتەگى اسەرىمىز باسىلىپ, ءبىر كورگەن جەرگە ەكىنشى مارتە ورالۋدىڭ قىزىعى بار. الدىندا ەلەنبەگەن جايتتاردان كوز تارتارىن تاڭداپ, كورمەككە قويىلعان دۇنيەلەردىڭ جاڭا قىرىنا ءمان بەرەمىز. يتاليا پاۆيلونىنا دا قايتا اينالىپ كورۋگە قازاقستان رەسپۋبليكاسىنداعى ەلشىسى ستەفانو راۆانياننىڭ يتاليانىڭ بازيليكاتا ءوڭىرىنىڭ اپتالىعىن اشۋ سالتاناتى سەبەپ بولىپ ەدى.
«استانا ەكسپو-2017» دۇنيەجۇزىلىك كورمەسىندە وڭتۇستىك يتاليانىڭ ورتالىعى بولىپ تابىلاتىن بازيليكاتا ءوڭىرىنىڭ اپتالىعى اياسىندا يتاليالىق عالىمداردىڭ ءبىر توبى بيوكليماتتىق ساۋلەت ونەرىنىڭ قولدانىلۋ تاجىريبەسىن ورتاعا سالىپ, «جاسىل» تەحنولوگيالار سالاسىنداعى جەتىستىكتەرىمەن بولىسپەككە كەلىپتى.
يتاليا ءوڭىرىنىڭ سۇلۋلىعى مەن ەرەكشەلىكتەرىن ونەر تىلىمەن پاش ەتۋ ماقساتىندا بازيليكاتا ءوڭىرىنىڭ ءتۋريزمدى دامىتۋ جونىندەگى اگەنتتىگى ىرىكتەپ العان, فابريس مويرەاۋ اكۆارەلدەرىن قامتيتىن «بازيليكاتاعا ساپار» اتتى كوركەمسۋرەت ونەرى دە تانىستىرىلدى.
اتاۋلى شارا اشىلعان كۇنى بازيليكاتا ءوڭىرىنىڭ قورشاعان ورتانى قورعاۋ جانە ەنەرگەتيكا دەپارتامەنتىنىڭ باس ديرەكتورى كارمەن سانتورو, وڭىرلىك كەڭەس تورالقاسىنىڭ شتاب باستىعى انتونيو بالداسسارە, «ادجيپ قاراشىعاناق» ديرەكتورى دجەراردو تراۆاليو مىرزالار قاتىسىپ, ءسوز سويلەدى.
كارمەن سانتورونىڭ ايتۋىنشا, پاۆيلوندا 12 تامىزعا دەيىن «بازيليكاتا ەنەرگياسى» تاقىرىبى اياسىندا بىرىكتىرىلگەن بىرنەشە ءىس-شارا قاراستىرىلعان. وندا بازيليكاتا عالىمدارى بيوكليماتتىق ساۋلەت ونەرىنىڭ قولدانىلۋ تاجىريبەسىمەن بولىسەدى. بۇل باعىت ءۇي-جايلاردىڭ ديزاينىن ءوڭىر كليماتىن ەسكەرە وتىرىپ ازىرلەۋگە, قۋاتتى از پايدالانا وتىرىپ جايلىلىقتى قامتاماسىز ەتۋگە, ەكولوگيالىق تازا قۋات كوزدەرى ارقىلى عيماراتتاردى جىلىتۋ, سالقىنداتۋ جانە جارىقتاندىرۋعا كەتەتىن شىعىندى قىسقارتۋ ماقساتىندا پايدالانىلادى.
«بازيليكاتا وڭىرىندە جۇزەگە اسىرىلعان كەلەشەكتىڭ ەنەرگياسى» اتتى سەمينار دا وسى شارا شەڭبەرىندە ۇيىمداستىرىلماق. بايانداماشىلار اراسىندا قازاق-بريتان تەحنيكالىق ۋنيۆەرسيتەتىنىڭ وكىلى نادير ابىلاي, سNR وكىلدەرى مارياپيا فارۋولو مەن سيمونا لوپەرتە, ENI قورىنان ەليزابەتتا فورتۋناتو, Feem قورىنان ەنريكو ماتتەي بار.
«يندرا اسپانى» جوباسى تۇراقتى ەنەرگەتيكالىق دامۋ ماسەلەلەرى بويىنشا سەمينار مەن وبلىستىق كەڭەس توراعاسىنىڭ ورىنباسارى فلاۆيا فرانكونيدىڭ قاتىسۋىمەن ەنەرگەتيكا سالاسىنداعى تەحنولوگيالىق يننوۆاتسيالار ماسەلەلەرى بويىنشا كەزدەسۋ وتكىزىلەدى. سونداي-اق, كەزدەسۋدە بازيليكاتا ەنەرگەتيكالىق كومپانيالارىنىڭ وكىلدەرى ءسوز سويلەپ, وڭىردە جۇزەگە اسىرىلىپ جاتقان ۇزدىك تاجىريبەلەرىن تانىستىرادى.
اپتا سوڭىنا قاراي وڭىرلىك اۋىل شارۋاشىلىعى دەپارتامەنتى «Feem» كومپانياسىمەن ىنتىماقتاسا وتىرىپ, «بازيليكاتا – وزگەشە ولشەم. ءومىر ازىعى» جوباسىن تانىستىرادى دەپ جوسپارلانعان.
اپتالىق قوناقتارىنا ۇسىنىلاتىن «بازيليكاتا: فيلمنەن دە اۋقىمدى» اتتى تۋريزم تۋرالى ءفيلمنىڭ كورسەتىلىمىنە مادەني جانە تۋريستىك جۇيەلەرى باسقارماسىنىڭ ديرەكتورى پاتريتسيا ميناردي, تۋريزم باسقارماسىنىڭ وكىلى ميكەلاندجەلو مەسسينا قاتىسادى دەپ كۇتىلۋدە.
ايگۇل ۋايسوۆا
