تۇسكە دەيىن كۇن اپتاپ ىستىق بولىپ تۇرىپ, تۇستەن كەيىن نوسەرلەتە جاۋىن جاۋاتىنىنا ەلوردا تۇرعىندارى بوي ۇيرەتە باستاعانداي. ءتىپتى, ءۇش ساعات تولاسسىز جاۋعان جاۋىننان كەيىن اۆتوكولىكتەرى سۋدا قالىپ نەمەسە سۋدان وتەمىن دەپ نومىرلەرىن جوعالتقان جۇرگىزۋشىلەردى دە كەزدەستىردىك.
جاقىندا ءبىر اپتا بويى اپتاپ ىستىقتىڭ سوڭىنان جاۋعان جاڭبىردا ەلوردا اۋماعىنان ءبىر تاۋلىك ىشىندە ەكى مىڭ تەكشە مەترگە جۋىق سۋ سورىلدى.
وتكەن تاۋلىكتە جاڭبىر سۋىن سورۋ جۇمىستارىنا 40-تان اسا ارناۋلى تەحنيكا تارتىلىپتى.
اۋا رايىن بولجاۋشىلار «بۇگىن ەلوردادا كۇن الا بۇلتتانىپ, وتكىنشى جاڭبىر جاۋادى, كۇن كۇركىرەۋى ىقتيمال. اۋا تەمپەراتۋراسى كۇندىز +24+26°س, تۇندە +16+18°س بولادى, وڭتۇستىك-باتىستان سوققان جەلدىڭ ەكپىنى 15-18 م/س جەتەدى» دەپ وتىر.
ال, «ەرتەڭ استانادا اۋا رايى جاقسارادى, كۇن الا بۇلتتى, جاۋىن-شاشىنسىز بولادى. اۋا تەمپەراتۋراسى كۇندىز +28+30°س, تۇندە +15+17°س-قا جەتىپ, وڭتۇستىك-باتىستان 9-14 م/س جىلدامدىقپەن جەل سوعادى» دەگەن بولجام جاسايدى.
