بارلىق قازاقستاندىقتاردىڭ مىندەتتى الەۋمەتتىك مەديتسينالىق ساقتاندىرۋعا ء(مامس) قاتىسىپ, الەۋمەتتىك تولەمدەردى الۋعا مۇمكىندىگىن ارتتىرۋ ءۇشىن ەڭبەك جانە حالىقتى الەۋمەتتىك قورعاۋ مينيسترلىگى ءوزىن-ءوزى جۇمىسپەن قامتيتىن ازاماتتارعا بىرىڭعاي جيىنتىق تولەم (بجت) ەنگىزۋدى ۇسىنۋدا.
قۇزىرلى ۆەدومستۆو سالىقتىق, اكىمشىلىك-قۇقىقتىق شارالار كەشەنىن قاراستىراتىن زاڭ جوباسىن دايىنداپ, بيىل قىركۇيەك ايىندا ماجىلىسكە ۇسىنباق. بۇل تۋرالى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترىنىڭ ورىنباسارى نۇرجان التاەۆ حابارلادى.
ونىڭ پايىمداۋىنشا, ءبىرىڭعاي جيىنتىق تولەمدى ەنگىزۋ تىركەۋ جۇمىستارىن وڭايلاتۋعا جانە سالىق مولشەرلەمەسىن جەڭىلدەتۋگە جول اشادى, ءمامس شەڭبەرىندە مەديتسينالىق قىزمەتتەردى الۋعا, مىندەتتى الەۋمەتتىك ساقتاندىرۋ جۇيەسىنەن الەۋمەتتىك تولەمدەردى تاعايىنداۋعا مۇمكىندىك بەرەدى. مينيسترلىكتىڭ جوسپارلاعانىنداي, بجت-نىڭ مولشەرى قالا تۇرعىندارى ءۇشىن ءبىر ايلىق ەسەپتىك كورسەتكىشتى, اۋىل تۇرعىندارىنا 0,5 ايلىق ەسەپتىك كورسەتكىشتى قۇرايدى. وسىلايشا, تۇسكەن اقشانىڭ 10 پايىزى – جەكە تابىس سالىعىنا, 20 پايىزى – مەملەكەتتىك مىندەتتى الەۋمەتتىك ساقتاندىرۋ قورىنا, 30 پايىزى – زەينەتاقى تولەمدەرىنە جانە 40 پايىزى مىندەتتى الەۋمەتتىك مەديتسينالىق ساقتاندىرۋ قورىنا اۋدارىلادى. ەڭبەك جانە حالىقتى الەۋمەتتىك قورعاۋ مينيسترلىگىنىڭ بولجامى بويىنشا, بجت-نى ەنگىزۋ ناتيجەسىندە ەلىمىزدەگى 500 مىڭنان اسا ءوزىن-ءوزى جۇمىسپەن قامتاماسىز ەتۋشىلەر كولەڭكەدەن شىعادى.
