اعىمداعى جىلدىڭ ءساۋىر ايىنان باستاپ سۋديانىڭ قاتىسۋىمەن وتەتىن بىتىمگەرشىلىك راسىمدەردى ازاماتتىق سوت وندىرىسىنە ەنگىزۋدىڭ پيلوتتىق جوباسى ىسكە اسىرىلا باستادى.
اتالمىش جوبا بىتىمگەرشىلىك راسىمدەردى قولدانۋ اياسىن كەڭەيتىپ, سۋديالاردىڭ جۇكتەمەسى مەن ىستەردى قاراۋ مەن شەشۋ بويىنشا پروتسەسكە قاتىسۋشىلار مەن سوتتاردىڭ شىعىندارىن ازايتادى.
سوتتاردا سۋديانىڭ قاتىسۋىمەن بىتىمگەرشىلىك راسىمدەردى ەنگىزۋ جونىندەگى جوعارعى سوت قولعا العان پيلوتتىق جوبانىڭ شەڭبەرىندە اعىمداعى جىلدىڭ مامىرى مەن ماۋسىم ايلارىندا 111 ازاماتتىق ءىس, سونىڭ ىشىندە 11 ءىس اپەللياتسيالىق تارتىپپەن قارالدى.
جالپى, داۋ ساناتتارى تۇرعىسىندا سوت مەدياتسياسى نەگىزىنەن, بەرەشەكتى ءوندىرىپ الۋ ىستەرىندە, اتاپ ايتقاندا, كوممۋنالدىق قىزمەتتىڭ تولەماقىسى, كامەلەتكە تولماعان بالالارعا اليمەنت ءوندىرىپ الۋ, نەكە بۇزۋ جانە ماتەريالدىق زياندى وتەۋدە ءجيى قولدانىلادى.
پيلوتتىق جوبا نەگىزىنەن ۇيىمداستىرۋشىلىق, اقپاراتتىق جانە ءبىلىم بەرۋ باعىتتارى بويىنشا جۇزەگە اسۋدا. اتاپ ايتقاندا, ۇيىمداستىرۋشىلىق باعىت سوتتاردا سوت مەدياتسياسى ارقىلى بىتىمگەرشىلىك راسىمدەردى جۇرگىزۋ ءۇشىن ارنايى كابينەتتەر اشۋدى, سونىمەن قاتار, وبلىستىق جانە وعان تەڭەستىرىلگەن سوتتاردىڭ ازاماتتىق جانە اكىمشىلىك ىستەر جونىندەگى القا توراعالارىنىڭ بىتىمگەرشىلىك راسىمدەردى جۇزەگە اسىراتىن سۋديالاردىڭ جۇمىسىن ۇيىمداستىرۋدى كوزدەيدى.
اقپاراتتىق باعىتىنا كەلسەك, پيلوتتىق جوباعا قاتىساتىن سوتتاردىڭ ينتەرنەت-رەسۋرستارىندا تاقىرىپتىق بولىمدەر قۇرىپ, باق, تەلەديدار ارقىلى سوتتاردا بىتىمگەرشىلىك راسىمدەردى قولدانۋ بويىنشا پيلوتتىق جوبانى ىسكە اسىرۋ تۋرالى ءتۇسىندىرۋ جۇمىستارىن جۇرگىزۋدى, سونداي-اق, سوتتاردا اقپاراتتىق ستەندىلەر ورنالاستىرۋدى كوزدەيدى.
ءبىلىم بەرۋ باعىتى بويىنشا, ءبىتىمگەرشىلىك راسىمدەردى قولدانۋدىڭ حالىقارالىق تاجىريبەسىن زەردەلەۋ بويىنشا سوت مەدياتسياسىن جۇزەگە اسىراتىن سۋديانىڭ قاتىسۋىمەن وتكىزىلەتىن ءىس-شارالاردى ۇيىمداستىرادى. بۇعان قوسا بۇل سەگمەنت بىتىمگەرشىلىك راسىمدەردى جۇزەگە اسىراتىن سۋديالاردى سەمينارلار, ترەنينگتەر جانە قاشىقتىقتان وقىتۋ ارقىلى بىتىمگەرشىلىك داعدىسىنا ۇيرەتۋدى قامتاماسىز ەتەدى.
وتان تاشەتوۆ,
استانا قالالىق سوتىنىڭ سۋدياسى
