استانانىڭ اۋەجايىنا اپارار جولدا, پريگورودنىي تۇرعىن الابى ماڭىندا اشىلعان مەشىت تۋرالى العاشقىلاردىڭ ءبىرى بولىپ سۇيىنشىلەگەن ەدىك. رامازان ايىنىڭ الدىندا جاماعاتقا ءتورىن ۇسىنعان قۇلشىلىق ءۇيىنىڭ داستارقانىنان ورازا ايىنىڭ وتىز كۇنىندە اۋىز بەكىتكەندەر ءدام تاتۋمەن, نامازحاندار ءمىناجات ەتۋمەن بولدى. جاڭا مەشىتتەن كۇنى كەشەگى ايت نامازىن وقۋعا نيەت ەتكەن مۇسىلماندار قاتارى دا از بولمادى.
مىڭ جارىمعا جۋىق ادامعا ارنالعان قۇلشىلىق ءۇيى ۇلىق عيباداتتان كەيىن جاماعات اراسىندا ۇلتتىق سپورت تۇرلەرىنەن جارىس ۇيىمداستىردى. كوپشىلىك اسىق اتۋدان, قول كۇرەسىنەن, كىر تاسىن كوتەرۋدەن سىنعا ءتۇسىپ, ورازا ايتقا ارنالىپ جايىلعان داستارقاننان ءدام تاتتى.
مەشىتتىڭ باس يمامى ەرمەك مۇقاتايدىڭ ايتۋىنشا, قۇلشىلىق ۇيىنە باس سۇعاتىن جاماعات سانى كۇن ساناپ ارتىپ كەلەدى. «بۇگىنگى ءدىني مەرەكەدە قادىر ءتۇنىندەگىدەي بوساعامىزدى اتتاعان باۋىرلارىمىزدىڭ قاتارى ءتىپتى كوپ بولدى. سول قالىپتى ساقتاپ قالۋ ءۇشىن بار كۇش-جىگەرىمىزدى سالۋدامىز. پايعامبارىمىز مۇحاممەد (س.ع.س) «ۇمبەتتەرىمنىڭ كوپتىگىمەن ماقتانامىن» دەگەن عوي, ينشاللا, كوپ بولساق, شىعار اسۋىمىز دا بيىك بولادى» دەيدى باس يمام. سونداي-اق, ول استاناعا ات باسىن بۇرعان قوناقتار مەن ساپار شەگۋشى ەل ازاماتتارى جول بويىنداعى وزىندىك شىعىس ۇلگىسىندە كوزدى تارتاتىن مەشىتكە قادام باسىپ, قۇران وقىتىپ, دۇعا ەتەتىنىن دە اڭگىمەلەدى.
