بوردو تەاترىنىڭ بالەتى
استانالىق كورەرمەن س.پروكوفەۆتىڭ «رومەو مەن دجۋلەتتا» بالەتتىك سپەكتاكلىن جاڭا ورىنداۋدا تاماشالايدى. «جىبەك جولى» حالىقارالىق فەستيۆالىنىڭ اياسىندا, 19 قىركۇيەكتە, تەك ءبىر-اق كۇن, ۇلكەن ساحنادا بوردو ۇلتتىق وپەراسىنىڭ (فرانتسيا) ەتۋالى رومان ميحالەۆ قيالشىل رومەونىڭ بەينەسىن اشادى
حورەوگراف-بالەتمەيستەر شارل ءجيۋدتىڭ قويىلىمىندا جارقىرايتىن بالەتتىڭ تاعى ءبىر جەتەكشى ءسوليستى – قازاقستاندىق جۇلدىز ءمادينا باسپاەۆا دجۋلەتتانىڭ ءرولىن ورىندايدى. ايتا كەتەيىك, شارل ءجيۋدتىڭ شاقىرۋىمەن مادينا بۇل پارتيانى فرانتسيادا ورىنداپ, جوعارى تالعامدى كورەرمەننىڭ قوشەمەتىنە يە بولعان. الەمدىك بالەت ونەرىنىڭ كلاسسيكاسىنا اينالعان ماحاببات وقيعاسى ءبىرىنشى ماۋسىمداعى وسى ءساتتى قويىلىمىنان كەيىن تەاتر رەپەرتۋارىنا تۇراقتى ەنگىزىلدى. بوردو تەاترى بالەتتىك ترۋپپاسىنىڭ جەتەكشىسى ش.جيۋد س.پروكوفەۆتىڭ مۋزىكاسىنا جازىلعان بالەتتىك سپەكتاكلدى رۋدولف نۋريەۆتىڭ كۇردەلى نۇسقاسىنا نەگىزدەپ وڭدەگەن. ال, نەگىزىنەن «رومەو مەن دجۋلەتتانىڭ» ساحناداعى شەجىرەسى 1938 جىلى برنو (چەحيا) قالاسىنداعى تۇساۋكەسەرىنەن باستاۋ الادى.
ەلوردا تۇرعىندارى مەن قوناقتارى, يتاليالىق شەبەرلەر ەتسيو فريدجەريو مەن فرانكو سكۋارچاپينو ازىرلەگەن اسەم دەكوراتسيالار مەن ادەمى كوستيۋمدەردىڭ ارقاسىندا ەرلىك ىستەرگە تولى ورتا عاسىر ءداۋىرىن قيالدارىمەن شولا الادى. قويىلىم ديريجەرى – قر ەڭبەك سىڭىرگەن قايراتكەرى ايدار ءابجاحانوۆ.
اسىعىڭىز! حالىقارالىق فەستيۆالعا ارنايى باعامەن قويىلعان بيلەتتەر ساتىلىمعا ءتۇستى. ولاردى ونلايندا www.BiletiAstana.kz, www.biletbar.kz cايتتارىنان جانە «استانا وپەرا» تەاترىنىڭ جانە «قازاقستان» وكز كاسسالارىنان ساتىپ الۋعا بولادى.