نۇر-سۇلتان قالاسى ءماسليحاتىنىڭ كەزەكتەن تىس سەسسياسىندا ەلوردانىڭ وتكەن جىلعى بيۋدجەتىنىڭ اتقارىلۋى تۋرالى ەسەپ تىڭدالىپ, قالانىڭ 2019-2021 جىلدارعا ارنالعان بيۋدجەتىنە ەنگىزىلگەن وزگەرىستەر بەكىتىلدى. مۇنىڭ الدىندا بۇل ماسەلەلەر ءماسليحاتتىڭ تۇراقتى كوميسسيالارى مەن قوعامدىق كەڭەس وتىرىستارىندا جان-جاقتى تالقىلانعان بولاتىن.
بىلتىرعى بيۋدجەتتىڭ قورىتىندىلارىمەن قارجى باسقارماسىنىڭ باسشىسى ءالىبي جۇماەۆ تانىستىردى. ونىڭ ايتۋىنشا, وتكەن جىلى بيۋدجەتكە 430 ملرد تەڭگە ءتۇستى. جوسپار 4 ملرد تەڭگەگە اسىرا ورىندالدى. شىعىستار 99,8 پايىزعا اتقارىلدى.
– 2018 جىلى الەۋمەتتىك قورعاۋ ساياساتىن ىسكە اسىرۋ ءۇشىن 3,7 ملرد تەڭگەگە الەۋمەتتىك كومەك كورسەتىلدى. ونىڭ ىشىندە كومەككە مۇقتاج جەكەلەگەن ساناتتاعى ازاماتتارعا 3,1 ملرد تەڭگە ءبولىندى. كەپىلدەندىرىلگەن تەگىن مەديتسينالىق كومەك شەڭبەرىندە قاراستىرىلعان 3,4 ملرد تەڭگە 100 پايىز يگەرىلدى. ءبىلىم بەرۋ جۇيەسىن دامىتۋ شەڭبەرىندە 15 مەكتەپ پەن 3 بالاباقشانىڭ قۇرىلىسى جالعاستى. 23 ورتا ءبىلىم بەرۋ مەن مەكتەپالدى دايارلىق نىسانىنىڭ جوباسى جاسالدى. سونىڭ ىشىندە 15 نىسان بويىنشا مەملەكەتتىك ساراپتاما وڭ شەشىم شىعاردى. 9 مەكتەپتىڭ قۇرىلىسى باستالدى. 189 جەكەمەنشىك بالاباقشاعا مەملەكەتتىك تاپسىرىس اياسىندا بالالار ورنالاستىرىلدى. 81 جالپى ءبىلىم بەرەتىن مەكتەپتى ۇستاۋعا 33 ملرد تەڭگە, 11396 ستۋدەنتتى وقىتاتىن 11 كوللەدجگە 5,6 ملرد تەڭگە ءبولىندى. بارلىق قارجى تولىعىمەن يگەرىلدى. 4470 جەتىم جانە اتا-انا قامقورلىعىنسىز قالعان بالالارعا قوعامدىق كولىكتە جەڭىلدىكپەن جۇرۋگە كومەك كورسەتىلدى, – دەدى باسقارما باسشىسى.
قالالىق ءماسليحاتتىڭ بيۋدجەت, ەكونوميكا, ونەركاسىپ جانە كاسىپكەرلىك ماسەلەلەرى جونىندەگى تۇراقتى كوميسسيا توراعاسى ميراس شەكەنوۆ وتكەن جىلدىڭ بيۋدجەت قاراجاتىن ءتيىمدى پايدالانۋ بويىنشا ناقتى جۇمىستار جۇرگىزىلگەنىن, قارجىنى يگەرۋدە وڭ ديناميكا بايقالعانىن اتاپ ءوتتى.
ستراتەگيالىق جانە بيۋدجەتتىك جوسپارلاۋ باسقارماسى باسشىسىنىڭ ورىنباسارى ايجان تۇگەلباەۆا كوپبالالى جانە تۇرمىسى تومەن وتباسىلاردى قولداۋدى كۇشەيتۋ ماقساتىندا نۇر-سۇلتان قالاسىنىڭ 2019-2021 جىلدارعا ارنالعان بيۋدجەتىنە وزگەرىستەر ەنگىزىلگەنىن ايتتى.
ونىڭ ايتۋىنشا, قالادا وتەتىن مادەني-ساۋىقتىق شارالارعا بولىنگەن قارجى, وزگە دە اكىمشىلىك شىعىندار, رەسپۋبليكالىق بيۋدجەتتەن كەلەتىن ماقساتتى ترانسفەرتتەر قايتا قارالدى. ناتيجەسىندە وسى جىلعى بيۋدجەت ونىڭ الدىندا بەكىتىلگەن بيۋدجەتكە قاراعاندا 36 ملرد تەڭگەگە نەمەسە 8,2 پايىزعا ءوسىپ, جالپى العاندا 461 ملرد تەڭگەنى قۇرادى. بيۋدجەتتى ناقتىلاۋ بارىسىندا الەۋمەتتىك سالاعا قوسىمشا 2,5 ملرد تەڭگە ءبولۋ ۇيعارىلدى.
– ەڭبەك جانە حالىقتى الەۋمەتتىك قورعاۋ مينيسترلىگى اتاۋلى الەۋمەتتىك كومەك كولەمىن ءوسىردى. اعىمداعى ترانسفەرتتەردەن وسى ماقساتقا 942,6 ملن تەڭگە بولدىك. ايلىعى تومەن بيۋدجەت سالاسى قىزمەتكەرلەرىنىڭ جالاقىسىن 30 پايىزعا كوتەرۋگە 4,4 ملرد تەڭگە, الەۋمەتتىك وسال توپتارعا جاتاتىن ازاماتتارعا 50 شارشى مەتردەن كەم ەمەس 616 پاتەردى الىپ بەرۋگە 5,1 ملرد تەڭگە, مەملەكەت مۇقتاجدىعى ءۇشىن جەر تەلىمدەرىن ساتىپ الۋعا 3,8 ملرد تەڭگە ءبولىندى, – دەدى ا.تۇگەلباەۆا.
بۇعان قوسا, دەربەس بيۋدجەتتىك باعدارلامالارعا بولىنگەن قارجى قايتا قارالىپ, 10 ملرد 956 ملن تەڭگە جەدەل شەشىلۋى ءتيىس ماسەلەلەرگە بولىنەتىن بولدى. از قامتىلعان ازاماتتارعا ۇزبەي قولداۋ كورسەتىپ وتىرۋعا جانە جۇمىس ورىندارىن قۇرۋعا بيۋدجەتكە 1,5 ملرد تەڭگە سالىندى. جىلدىڭ باسىنان بەرى وعان قوسىمشا 460,7 ملن تەڭگە قاراستىرىلدى. سونىڭ ارقاسىندا بۇل كومەكپەن جىلدىڭ اياعىنا دەيىن 4 مىڭ ادامدى قامتۋ جوسپارلانىپ وتىر.
– الەۋمەتتىك وسال توپتارعا, سونىڭ ىشىندە تۇرمىسى تومەن وتباسىلارعا 30-دان استام الەۋمەتتىك كومەك تۇرلەرى كورسەتىلەدى. وسىنىڭ بارلىعىنا 14 ملرد 011 ملن تەڭگە جۇمسالادى. قالا باسشىلىعىنىڭ كوپبالالى جانە تۇرمىسى تومەن وتباسىلارمەن كەزدەسۋلەرىنىڭ ناتيجەسىندە جاڭا الەۋمەتتىك باستامالاردىڭ قورجىنى دايىندالدى. ولاردى ورىنداۋعا 2019 جىلى 2,5 ملرد تەڭگە بولىنەدى. جۇمىسشى ماماندىقتاردى الۋعا جانە ودان كەيىن جۇمىسقا تۇرعىزۋعا بارلىق جاعدايلار جاسالدى. بۇل باعىت بويىنشا قارجىلاندىرۋ 6 ملرد تەڭگەدەن 8 ملرد تەڭگەگە ۇلعايدى. قايتا وقىتۋ جانە بىلىكتىلىكتى ارتتىرۋ باعدارلاماسىنا قوسىمشا 110,4 ملن تەڭگە قارالدى. اتالمىش باعدارلاما 700 ادامدى قامتيدى, – دەدى ا.تۇگەلباەۆا.
قاتتى وتىندى الاتىن وتباسىلاردىڭ تىزىمىنە مىڭنان استام وتباسىنى قوسۋ جوسپارلانۋدا. بۇل كومەك ءتۇرى 8 اەك-تەن16 اەك-كە ءوسىپ, 40 مىڭ تەڭگە شاماسىنداعى قارجىنى قۇرايدى. 750-گە جۋىق ادام ساناتسيا جانە ءتىس پروتەزدەۋ قىزمەتتەرىنە تەگىن قول جەتكىزە الادى. وقۋ گرانتتارى 130-دان 180-گە كوبەيدى. كوپبالالى وتباسىلاردان شىققان جوعارى وقۋ ورىندارى ستۋدەنتتەرى قوعامدىق كولىكتە جەڭىلدىكپەن ءجۇرۋ قۇقىعىنا يە بولدى.
– بۇگىندە ەلوردا مەكتەپتەرىندەگى 1-4-سىنىپتاردىڭ بارلىق وقۋشىلارى ىستىق تاماقپەن قامتىلادى. الەۋمەتتىك وسال توپتارعا جاتاتىن وتباسىلاردان شىققان 5-11-سىنىپ وقۋشىلارى دا بۇل تىزىمگە قوسىلدى. قوسىمشا كومەك رەتىندە وسى توپتاعى وتباسىلاردىڭ 2 مىڭنان استام بالاسىنا بالاباقشالاردا تەگىن تاماق بەرىلەتىن بولادى. مەكتەپ فورماسى مەن وقۋ قۇرالدارىنا قوسىمشا 200 ملن تەڭگە بولىنبەك. ەكى مىڭنان استام بالانى كانيكۋل ۋاقىتىندا ساۋىقتىرۋعا 100 مىڭ تەڭگە قاراستىرىلدى, – دەدى بايانداماشى.
ەلدى مەكەندەردى اباتتاندىرۋ مەن كوگالداندىرۋ ءۇشىن اۋدانداردىڭ اكىمدىكتەرىنە قوسىمشا 1299,4 ملن تەڭگە, رەسپۋبليكالىق بيۋدجەتتەن ترانسفەرتتەر ەسەبىنەن قوسىمشا قارجىلاندىرۋ مەن ينۆەستيتسيالىق جوبالاردى اياقتاۋعا 3 ملرد تەڭگە كولەمىندە ءبولۋ قاراستىرىلدى.
