قارقارالى اۋدانىنىڭ ورتالىعىندا اعا سۇلتان قۇنانباي وسكەنبايۇلى مەن اباي قۇنانبايۇلىنا ەسكەرتكىش قويىلدى. ۇلتىمىزدىڭ ۇلى تۇلعالارىنا ارنالعان ءمۇسىن ەلباسى ن.نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا بوي كوتەردى.
بيىكتىگى 4 مەتردەن اساتىن ءمۇسىن تازا مىستان جاسالعان. تۋىندى اۆتورى ساكەن داۋلەتباەۆتىڭ ەسكەرتكىشىندە بالا ابايدىڭ مەدرەسەدەگى وقۋدان دەمالىسقا كەلىپ, اكەسىمەن كەزدەسكەن ءساتى بەينەلەنگەن. ەسكەرتكىش اعا سۇلتاننىڭ 1851 جىلى سالدىرعان مەشىتىنىڭ الدىندا بوي كوتەردى. «قۇنانباي بابامىز ءوزى ىرگەتاسىن قالاعان مەشىتتىڭ جانىنا ەسكەرتكىش ورناتۋ – ءبىزدىڭ پارىزىمىز. قازاقستاننىڭ 100 كيەلى ورنى تىزىمىنە ەنگىزىلگەن قۇنانباي قاجى مەشىتىن تاماشالاۋعا كوپتەگەن ادامدار كەلەدى. مىنە, وسى تۇرعىدان العاندا, بۇل ءمۇسىننىڭ ءمانى زور» دەدى قارقارالى اۋدانىنىڭ اكىمى حالەل ماقسۇتوۆ.
ءمۇسىننىڭ اشىلۋ سالتاناتىنا نۇر-سۇلتان, الماتى قالالارى مەن شىعىس قازاقستان وبلىسىنان كەلگەن مەيماندار قاتىستى.
