نۇر-سۇلتان قالاسى اكىمدىگىنىڭ قوعامدىق كەڭەسىندە ەلوردانىڭ 2021-2023 جىلدارعا ارنالعان بيۋدجەتىنە وزگەرىستەر ەنگىزۋ, نۇر-سۇلتان قالاسىنىڭ قۇرمەت گراموتاسىمەن ماراپاتتاۋ ەرەجەسىن بەكىتۋ ماسەلەلەرىن قارادى.
كۇن تارتىبىندەگى العاشقى ماسەلە بويىنشا نۇر-سۇلتان قالاسى اكىمدىگى ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى قايسار ماڭقاراەۆ بايانداما جاسادى. ءوز بايانداماسىندا قايسار زاكىرۇلى نۇر-سۇلتان قالاسى ءماسليحاتىنىڭ 2020 جىلعى 11 جەلتوقسانداعى «نۇر-سۇلتان قالاسىنىڭ 2021-2023 جىلدارعا ارنالعان بيۋدجەتى تۋرالى» شەشىمىنە وزگەرىستەر ەنگىزۋ جايىن كوتەرىپ, كەڭەس مۇشەلەرىنىڭ نازارىنا قوسىمشا قارجىلاندىرۋدى قاجەت ەتەتىن بيۋدجەتتىك باعدارلامالاردى ۇسىندى. كەڭەس مۇشەلەرى جەكەلەگەن سالالاردى قارجىلاندىرۋدىڭ وڭتايلى تەتىگىن قاراستىرۋ جايىنا توقتالدى. ماسەلەن, كەڭەس مۇشەسى جانات نۇرعاليەۆ سپورت سالاسىن قارجىلاندىرۋدا بالالار سپورتىن دامىتۋعا باسىمدىق بەرىلۋ كەرەكتىگىنە نازار اۋداردى.
كەڭەس مۇشەلەرى نۇر-سۇلتان قالاسىنىڭ قۇرمەت گراموتاسىمەن ماراپاتتاۋ ەرەجەسىنە قاتىستى دا ويلارىن ورتاعا سالدى. ونى قالا اكىمدىگى اپپاراتىنىڭ مەملەكەتتىك-قۇقىقتىق ءبولىمىنىڭ باسشىسى جاڭاسىل شاۋكەنتاەۆ تانىستىردى.
وتىرىستا قارالعان بارلىق ماسەلەلەر بويىنشا كەڭەس مۇشەلەرىنىڭ ءتيىستى ۇسىنىستارى نازارعا الىنىپ, بەكىتىلدى.
