كەشە قازاقستاندىق وليمپيادا چەمپيوندارى مەن جۇلدەگەرلەرى, سپورت ارداگەرلەرى قولدارىنا كۇرەك الىپ, استاناداعى وليمپيادالىق «چەمپيوندار اللەياسىنا» اعاش وتىرعىزدى.
اتاپ ايتساق, اللەيادا سۋ دوبىنان ماسكەۋ وليمپياداسىنىڭ چەمپيونى سەرگەي كوتەنكو, باسكەتبولدان سەۋل وليمپياداسىنىڭ جەڭىمپازى ۆالەري تيحونەنكو مەن اتلانتا ويىندارىندا گرەك-ريم كۇرەسىنەن توپ جارعان يۋري مەلنيچەنكو, سيدنەي وليمپياداسىندا جەڭىل اتلەتيكا سپورتىنان التىن مەدال يەلەنگەن ولگا شيشيگينا مەن بوكسشى ەرماحان يبرايموۆ, ميۋنحەن وليمپياداسىندا جۇزۋدەن جۇلدەگەر اتانعان ۆيكتور ابويموۆ پەن اتلانتا جانە سيدنەي ويىندارىندا بوكستان جۇلدەگەر اتانعان بولات ءجۇمادىلوۆ ءوز اتتارى جازىلعان تاقتايشا قالدىردى.
اتاقتى بوكسشى ەرماحان يبرايموۆ شىرشا وتىرعىزۋ ءۇشىن الماتىدان ارنايى كەلدى. «بۇگىن ءار جىلعى وليمپيادا چەمپيوندارى باس قوسىپ, ءبىر مارقايىپ قالدىق. تال ەگىپ, ەكولوگيالىق باعدارلامانى ورىنداپ جاتقانىما وتە قۋانىشتىمىن» دەدى ول.
قازاقستان ۇلتتىق وليمپيادالىق كوميتەتىنىڭ رەسمي وكىلى جىگەر ازبەرگەنوۆتىڭ ايتۋىنشا, يگى ءىس ءارى قاراي ءوز جالعاسىن تابادى. بولاشاقتا «چەمپيوندار اللەياسىن» كەڭەيتۋ دە جوسپارلانىپ وتىر.
– قازاقستاننىڭ ۇلتتىق وليمپيادالىق كوميتەتى جانە استانا قالاسى اكىمدىگىنىڭ «چەمپيوندار اللەياسى» اتتى بىرلەسكەن ەكولوگيالىق باستاماسى داستۇرگە اينالدى. بىلتىر ريو وليمپيادا ويىندارىنىڭ چەمپيوندارى مەن جۇلدەگەرلەرى كوشەتتەر وتىرعىزسا, بيىل ءبىزدىڭ داڭقتى سپورتشىلارىمىز قالانى كوگالداندىرۋعا ۇلەس قوستى. اعاش وتىرعىزۋ ارقىلى ءبىز ەلوردانىڭ ەكولوگيالىق جۇيەسىن رەتتەۋگە كومەكتەسەمىز, سونداي-اق سپورت ارداگەرلەرىن جاس بۋىنعا تانىستىرىپ, دارىپتەيمىز. «عاشىقتار ساياباعىندا» حالىق كوپتەپ جۇرەدى, ساياباق استانالىقتار مەن قالا قوناقتارىنىڭ سۇيىكتى دەمالاتىن ورنىنا اينالعان. ءوتىپ بارا جاتقان ادام «بۇل كىمنىڭ اعاشى؟» دەپ قىزىعۋشىلىق تانىتاتىنى انىق. سوندىقتان «عاشىقتار ساياباعى» بەكەر تاڭدالعان جوق, – دەدى قازاقستاننىڭ ۇلتتىق وليمپيادالىق كوميتەتى وكىلى.
گۇلدانا تالعاتقىزى
