چەمپيوندار شەبەرلىكتەرىن كورسەتتى
![](https://astana-akshamy.kz/wp-content/uploads/2022/07/dsc_4177.jpg)
كەشە نۇر-سۇلتان قالاسىنىڭ ءال-فارابي اتىنداعى وقۋشىلار سارايى فيليالىنىڭ «ءبىلىم پارك» ونەر-ءبىلىم ورتالىعىندا ەلىمىزدىڭ ماقتان تۇتار چەمپيوندارى بالالارمەن كەزدەستى.
بالالار جىلى اياسىندا ۇيىمداستىرىلعان ءىس-شاراعا نۇر-سۇلتان قالاسى ءبىلىم باسقارماسى باسشىسىنىڭ ورىنباسارى ريمما يمانعازينوۆا, بوكستان جاستار اراسىنداعى الەم چەمپيونى سانجار تاشكەنباي, مما بويىنشا الەم چەمپيونى جاسۇلان اكىمجان, شاحماتتان الەم چەمپيونى ساۋات نۇرعاليەۆ, كوركەم گيمناستيكادان ازيا چەمپيونى سابينا باقاتوۆا جانە وقۋشىلار سارايىنىڭ بالالارى قاتىستى.
– نۇر-سۇلتان قالاسىندا العاش رەت «بالالار مەن چەمپيوندار» جوباسىن ىسكە قوستىق. مۇندا بالالاردىڭ دامۋى ءۇشىن قاجەتتى شاحمات, بوكس, كوركەم گيمناستيكا سياقتى سپورت تۇرلەرىنەن ۇيىرمەلەر مەن شەبەرلىك ساباقتارىن ۇيىمداستىردىق. بالالار جازعى دەمالىسىن, بوس ۋاقىتىن ءتيىمدى وتكىزسىن دەگەن نيەتپەن وسى جوبانى قولعا الدىق. اتالعان ءىس-شارانىڭ ماقساتى – وسكەلەڭ ۇرپاقتى دەنە شىنىقتىرۋمەن اينالىسۋعا, سالاۋاتتى ءومىر سالتىن قالىپتاستىرۋعا شاقىرىپ, وقۋشىلار اراسىندا بۇقارالىق سپورتتى ناسيحاتتاۋ, – دەدى قالالىق ر.يمانعازينوۆا.
سپورتشىلار الدىمەن وسى ورتالىقتىڭ جۇمىسىمەن, وسى جەردەگى وقۋشىلارعا اشىلعان مۇمكىندىكتەرمەن تانىستى.
بوكستان الەم چەمپيونى سانجار تاشكەنباي, مما بويىنشا الەم چەمپيونى جاسۇلان اكىمجان, شاحماتتان الەم چەمپيونى ساۋات نۇرعاليەۆ, كوركەم گيمناستيكادان ازيا چەمپيونى سابينا باقاتوۆا بالالارعا ارناپ وزدەرىنىڭ شەبەرلىك ساباقتارىن وتكىزدى. بالالاردىڭ بۇل دارىستەردەن العان اسەرلەرى ەرەكشە.
شارا سوڭىندا وقۋشىلار چەمپيونداردىڭ جەتىستىككە جەتۋ جولىنداعى كەدەرگىلەرى مەن ولاردى جەڭۋ جولدارى, ەل ءۇشىن دوداعا تۇسكەن ۋاقىتتاعى ەموتسيالارى تۋرالى وزدەرىن قىزىقتىراتىن ساۋالدارعا جاۋاپ الدى.