ءدارى تاڭداۋعا دا ساۋاتتىلىق كەرەك
دارىلىك اقپاراتتىق-تالداۋ ورتالىعى حالىققا ءدارى-دارمەك پەن كەپىلدەندىرىلگەن تەگىن مەديتسينالىق كومەككە قاتىستى ناقتى اقپارات بەرۋگە ءتيىس. قازىرگى كەزدە وسى ورتالىقتىڭ بازاسىندا جەتى مىڭعا تارتا ءدارى بار ەكەن. ونى قالاي جانە قانداي جاعدايدا پايدالانۋعا بولاتىندىعىن ورتالىق باسشىسى بايان مولداحمەتوۆا ايتىپ بەرەدى.– ناۋقاس ادامدار ەمحانالاردى ءوزدەرى تاڭداۋ مۇمكىندىگى بار دەگەنگە نە ايتاسىز؟
– كەيىنگى كەزدە, شىندىعىندا دا, سىرقاتتار ەمحانالاردى وزدەرى ەركىن تاڭداپ, سوندا بارىپ ەم الا الادى. الايدا, اۋماقتىق بولىنىسكە نەگىزدەلگەندىكتەن, ەگەر ناۋقاستىڭ تاڭداعان ەمحاناسى تۇرعىلىقتى مەكەن-جايىنان قاشىق بولسا, وندا دارىگەردى ۇيگە شاقىرتقان كەزدە قيىندىقتار تۋىنداۋى مۇمكىن. دەگەنمەن, ەندى قالانىڭ ءار تۇرعىنى 15 قىركۇيەكتەن 15 قاراشاعا دەيىن قالاداعى كەز كەلگەن ەمحاناعا ءتىركەلە الادى.
– تەگىن ءدارى-دارمەك كىمدەرگە بەرىلەدى؟
– تەگىن ءدارىنى بەلگىلى ءبىر سىرقاتپەن اۋىراتىن ادامدار تۇرعىلىقتى جەرىندەگى ەمحانادا ديسپانسەرلىك ەسەپتە تۇرسا عانا الا الادى. ال ەسەپكە تۇرۋ ءۇشىن ناۋقاس ادام ەمدەۋشى دارىگەرىنە بارىپ, تەكسەرىلۋى قاجەت. تاعى ءبىر اتاپ ايتارلىعى, 2012 جىلدىڭ قاڭتارىنان باستاپ تەگىن بەرىلەتىن دارىلەردىڭ سانى كوبەيگەنىمەن, ول بارلىق اۋرۋلارعا بىردەي بەرىلە بەرمەيدى. امبۋلاتوريالىق تەگىن مەديتسينالىق كومەكتىڭ كەپىلدەندىرىلگەن اۋقىمىنا دارىلەردى ەنگىزۋ تۋرالى شەشىمدى كاسىبي ماماندارى بار ارناۋلى كوميسسيا شىعارادى. ءدارى ناۋقاسقا تەگىن بەرىلگەن كۇننىڭ وزىندە ەمدەۋشى دارىگەر جاسالعان ەمنىڭ ءتيىمدىلىگىنە كوز جەتكىزۋى قاجەت. سودان سوڭ ونىڭ بەرىلۋ مەرزىمى ۇزارتىلادى. ءارى دارىگە شەك قويىلمايدى. ناۋقاستىڭ ەمدەلۋى ءۇشىن قانشا ءدارى كەرەك بولسا, سونشا ءدارى تەگىن جازىلىپ بەرىلەدى.
-ءدارىحانالاردا ءدارىنىڭ باعاسى ءار قيلى بولاتىنى نەسى؟
– ويتكەنى, قازىر ءدارىحانالاردىڭ بارلىعى جەكەمەنشىكتە. سوندىقتان ءاربىر ءدارىحانا ءوزىنىڭ باعاسىن قويادى. ايتارىمىز, ەگەر ەمدەلۋشى بەلگىلى ءبىر دارىگە ۇيرەنىپ, سونىڭ دەنساۋلىعىن جاقسارتۋعا اسەرىن بايقاعان بولسا, ونىڭ قاي ءدارىحانادا ارزان ساتىلاتىنىن تەلەفون ارقىلى بىلە الادى. ەكىنشى ءبىر جايت, دارىلەردە ساۋدا اتاۋى ءىرى ارىپتەرمەن جازىلادى دا, ونىڭ استىندا ۇساق ءارىپتەرمەن حالىقارالىق پاتەنت العان اتاۋى كورسەتىلەدى. ايتايىن دەگەنىم, ناۋقاستىڭ وسى ساۋدا اتاۋىنداعى باسقا ارزانداۋ ءدارى ءتۇرلەرىن دە پايدالانۋعا ءمۇمكىندىگى بار. ولاردىڭ دا داۋاسى بىردەي بولادى.
«اۋىرىپ ەم ىزدەگەنشە, اۋىرمايتىن جول ىزدە» دەمەكشى, ابزالى, دارىگە ءۇيىر بولماي, ەسەسىنە تازا اۋادا كوبىرەك سەرۋەندەپ, سپورتپەن اينالىسۋدىڭ, دەنەنى سەرگىتۋدىڭ پايداسى مول.