دارىندى وقۋشىلار ماراپاتتالدى
استانادا مەكتەپ وقۋشىلارى اراسىندا بيىل ەكىنشى رەت وتكىزىلگەن «الەمدى وزگەرتەتىن يدەيالار» بايقاۋىنا 46 وقۋشى قاتىسىپ, وزدەرى ۇسىنعان 36 جوبا بويىنشا باق سىناعان بولاتىن. قر تۇڭعىش پرەزيدەنتى مۋزەيىندە وسى بايقاۋدىڭ جەڭىمپازدارى ماراپاتتالدى.
بۇل بايقاۋ ەل تاۋەلسىزدىگىنىڭ 25 جىلدىعىنا ورايلاستىرىلىپ وتكىزىلگەن ەدى. سونداي-اق, «100 ناقتى قادام» ۇلت جوسپارى شەڭبەرىندە قوعامداعى وزەكتى ماسەلەلەردى تانىپ-بىلۋگە, وقۋشىلاردىڭ عىلىمي-زەرتتەۋشىلىك جانە وقۋ-تانىمدىق قىزىعۋشىلىعىن ىنتالاندىرۋعا باعىتتالعان. ءۇش كەزەڭنەن تۇراتىن بايقاۋدىڭ العاشقى تۋرى قالالىق مەكتەپتەردە ۇيىمداستىرىلعان. ءۇشىنشى كەزەڭگە ىلىككەن جوبالار مەكتەپتەردىڭ نامىسىن قورعادى. ياعني, بۇل كەزەڭدە مەكتەپتەر ءوزارا جارىسقا تۇسكەن.
بيىلعى بايقاۋدا «كۇن ساۋلەسى ارقىلى جارىقتاندىرۋ قۇرىلعىسى» جانە «ەل ەكونوميكاسىنىڭ بالامالى تۇرگە – «جاسىل ەكونوميكا» فورماتىنا اۋقىمدى بەتبۇرىسى» تاقىرىبىنداعى جوبالارىمەن اسحات ابۋباكىروۆ پەن اسەل ورىنبەكوۆا كوش باستاعان. قازىلار القاسىنىڭ شەشىمىمەن بايقاۋ جەڭىمپازدارى مەن جۇلدەگەرلەرى پوليتەحنيكالىق جانە گۋمانيتارلىق باعىتتار بويىنشا انىقتالدى. عىلىمي جوبالاردىڭ باسىم بولىگى قازاقستاندىقتاردىڭ ءومىر ءسۇرۋ ساپاسىن جاقسارتۋعا باعىتتالعان جوعارى تەحنولوگيالارعا نەگىزدەلگەن ەكەن. بايقاۋ دارىندى جاس زەرتتەۋشىلەردى انىقتاۋعا جانە ولارعا قولداۋ كورسەتۋگە مۇمكىندىك بەردى.
مەڭدوللا نۇرىمۇلى