نۇر-سۇلتان قالاسىنىڭ اكىمدىگى جارتى جىلدان بەرى باسىنان داۋ-داماي ارىلماي كەلە جاتقان تۇرعىن ءۇي كەشەنىنىڭ قۇرىلىسىنا بەرگەن كەلىسىمدى كەرى قايتارىپ الدى.
اتىشۋلى ءۇي ەلوردانىڭ سول جاعالاۋىندا سىعاناق كوشەسى مەن قابانباي داڭعىلىنىڭ قيىلىسىندا بوي كوتەرگەن. ال اۋدان حالقى ول تۇستا كەزەكتى كوپقاباتتى تۇرعىن ءۇي كەشەنىنىڭ تۇرعانىن ەمەس, بالالار سارايىنىڭ نەمەسە مەكتەپتىڭ, ايتپەسە ادامدار دەمالاتىن ساياباقتىڭ قانات جايعانىن قالايدى. ويتكەنى بۇل وڭىردە حالىق تىعىز ورنالاسقان, ءزاۋلىم ۇيلەر كوپ, بىراق تۇرعىندارعا قىزمەت كورسەتەتىن الەۋمەتتىك نىساندار جەتىسپەيدى. ورامدا تەك ءبىر عانا ورتا مەكتەپ بار, ونداعى وقۋشىلار سانى شامادان الدەقايدا اسىپ كەتكەن.
راس, جازدا تۇرعىن ءۇي كەشەنىنىڭ العاشقى قازىعى قاعىلا باستاعاندا ەسىل اۋدانى اكىمىنىڭ ورىنباسارى ءانۋار قايىرجانوۆ تۇرعىن ءۇي كەشەنىمەن بىرگە مەكتەپ تە سالىناتىنىن ايتقان. ونى قۇرىلىس سالۋشى كومپانيا BI Group تا راستادى. ال ساۋلەت, قالا قۇرىلىسى جانە جەر قاتىناستارى باسقارماسىندا تۇرعىن ءۇي كەشەنىنىڭ قۇرىلىسى 17 شىلدە كۇنى بەكىتىلىپ كەتكەنىن ايتتى. ونداعىلار دا جوبادا مەكتەپتىڭ قاراستىرىلعانىن جەتكىزدى. سونداي-اق جوبانىڭ تۇجىرىمداماسى قالا قۇرىلىسى كەڭەسىندە ماقۇلدانعان. جوبا سىزباسى ءۇيدىڭ ناقتىلانعان جوسپارىنا جانە بارلىق قۇرىلىس نورمالارىنا ساي جاسالعان» دەيدى باسقارماداعىلار. ونىڭ ۇستىنە بۇل ءۇيدى سالار الدىندا اكىمدىك اۋدان تۇرعىندارىمەن ءۇش رەت كەزدەسۋ وتكىزگەن.
الايدا اتالعان قۇرىلىسقا قارسى باستاماشىل توپتىڭ بەلسەندىسى ولجاس ءبىلالوۆتىڭ ايتۋىنشا, نۇر-سۇلتان قالاسىنىڭ باس جوسپارى بويىنشا قالانىڭ 50 پايىز اۋماعى جاسىل ايماقپەن قامتىلۋى ءتيىس. ال داۋلى ءۇي باس جوسپاردا كورسەتىلگەن ناق وسى «جاسىل ۋچاسكەگە» ءتۇسىپتى. «مەكتەپ سالامىز دەگەندەرى – حالىقتىڭ نارازىلىعىن باسۋدىڭ ايلاسى. BI Group كومپانياسى تۇرعىن ءۇي كەشەنىمەن بىرگە ءبىلىم وشاعىن سالامىز دەسە, تۇرعىندار قارسى بولمايدى دەپ ويلاسا كەرەك» دەيدى ول.
بىراق بۇل ءىستىڭ ارتى ناسىرعا شاپتى. اۋدان حالقى قول جيناپ, ءارتۇرلى ينستانتسيالارعا شاعىمداندى. ءتىپتى قر پارلامەنتى ءماجىلىسىنىڭ دەپۋتاتتارى پرەمەر-مينيستر اسقار ءماميننىڭ اتىنا ساۋال جولداعان. وسىعان بايلانىستى قالا اكىمدىگى اتالعان تۇرعىن ءۇي كەشەنىنىڭ قالا قۇرىلىسى زاڭدىلىعىنا قايشى كەلەتىن-كەلمەيتىندىگىن تەكسەردى. تەكسەرىس ناتيجەسى بويىنشا ءۇي قۇرىلىسىنان كەمشىلىكتەردىڭ انىقتالۋىنا بايلانىستى قۇرىلىس جۇرگىزۋگە رۇقسات بەرىلگەن قۇجاتتار – ساۋلەت-جوبالاۋ تاپسىرىسى مەن سىزبا جوباسىنىڭ كەلىسىمى كەرى قايتارىپ الىندى. سونداي-اق انىقتالعان كەمشىلىكتەردى جويۋدىڭ جوسپارى جاسالدى. ەندى ەلوردا اكىمدىگى تۇرعىن ءۇي كەشەننىڭ سالىنىپ قويعان قۇرىلىسىن ەسكەرە وتىرىپ, قالا قۇرىلىسى قۇجاتىنا تيىسىنشە وزگەرتۋلەر ەنگىزبەكشى. سونداي-اق قۇرىلىستى جالعاستىرعاندا مىندەتتى تۇردە قوعامنىڭ سۇرانىسى ەسكەرىلەتىن بولادى.
ءبىر ايتا كەتەتىن جايت, قولدانىستاعى زاڭ بويىنشا وبلىستاردىڭ جانە نۇر-سۇلتان, الماتى, شىمكەنت قالالارىنىڭ اكىمدەرىنە وزدەرىنە قاراستى وڭىرلەردە وزدىگىنەن قۇرىلىس جۇمىستارىن جوسپارلاۋعا رۇقسات ەتىلگەن. بىراق قازىرگى كەزدە مەملەكەتتىك قالا سالۋ ەكسپەرتيزاسى ينستيتۋتىن ەنگىزۋ, سونداي-اق جوبانى مۇددەلى مەملەكەتتىك ورگاندارمەن جانە «اتامەكەن» ۇكپ-مەن كەلىسۋ ماسەلەسى قىزۋ تالقىلانىپ جاتىر.
بۇل ەندى الداعى كۇننىڭ ەنشىسىندە. ەگەر مۇنداي ينستيتۋت قولدانىسقا ەنسە, وندا ساپاسىز ازىرلەنگەن جانە قوعاممەن كەلىسىلمەگەن قالا قۇرىلىسى قۇجاتتارى بەكىتىلىپ كەتپەگەن بولار ەدى.
