دەموكراتيالىق رەفورمالاردى قولدايدى

30 قىركۇيەكتە ەۋروپا كەڭەسى پارلامەنتتىك اسسامبلەياسىنىڭ كۇزگى سەسسياسىنىڭ سوڭعى كۇنى «قازاقستانداعى ساياسي رەفورما ونىڭ ازاماتتارىنىڭ قاجەتتىلىكتەرى مەن ماقسات-نيەتىنە
جاۋاپ بەرەدى» دەگەن جازباشا دەكلاراتسيا قابىلداندى.
ليتۆا دەپۋتاتى, ەكپا ۆيتسە-پرەزيدەنتى لايما اندري-كيەنە باستاعان, اسسامبلەيا بيۋروسىنىڭ مۇشەلەرى مەن نەگىزگى ساياسي توپتاردىڭ جەتەكشىلەرى, گەرمانيا, ۇلىبريتانيا, نيدەرلاندى, يسپانيا, يتاليا, ليتۆا, پولشا, فينليانديا سياقتى ەلدەردىڭ دەپۋتاتتارى قۇرامىنا ەنگەن
23 پارلامەنتشىدەن تۇراتىن توپ دەكلاراتسيانىڭ اۆتورى بولىپ تابىلادى.
ازاماتتىق جانە ساياسي قۇقىقتار تۋرالى حالىقارالىق پاكتىگە ءولىم جازاسىن جويۋدى كوزدەيتىن ەكىنشى فاكۋلتاتيۆتىك حاتتامانى راتيفيكاتسيالاۋ تۋرالى ەكپا-نىڭ رەسمي سايتىندا ءماتىنى جاريالانعان قۇجاتتا ەۋروپالىق پارلامەنتشىلەر ەلىمىز باسشىلىعىنىڭ شەشىمىنە قولداۋ ءبىلدىرىپ وتىر.
بۇل شەشىم ەكپا قۇندىلىقتارى مەن قاعيدالارىنا سايكەس كەلەتىنى اتاپ ءوتىلدى. «ءبىز قازاقستان پرەزيدەنتى قاسىم-جومارت توقاەۆتىڭ بۇۇ باس اسسامبلەياسىنىڭ 75-سەسسياسىنىڭ جالپى جارىسسوزىندە سويلەگەن ءسوزىن قۇپتايمىز, ول وندا ءومىر ءسۇرۋدىڭ نەگىزگى قۇقىقتارىن, ادامنىڭ قادىر-قاسيەتىن جۇزەگە اسىرۋ جونىندەگى مەملەكەتتىڭ بەرىك ۇستانىمىن اتاپ ءوتتى» دەلىنگەن دەكلاراتسيادا.
2019 جىلعى 4 ساۋىردە ەۋروپا كەڭەسىنىڭ مينيسترلەر كوميتەتى ماقۇلداعان «ەۋروپا كەڭەسىنىڭ قازاقستانمەن تاتۋ كورشىلىك ىنتىماقتاستىق جونىندەگى باسىمدىقتارى» ءتورت جىلدىق باعدارلاماسى اياسىندا قازاقستان ەۋروپا كەڭەسىنىڭ ماڭىزدى سەرىكتەسى بولىپ تابىلاتىنى اتاپ ءوتىلدى.
ەكپا-دا قابىلدانعان دەكلاراتسيا قر پارلامەنتى سەناتى دەلەگاتسياسىنىڭ ستراسبۋرگتەگى كەزدەسۋلەرى بارىسىندا قازاقستانداعى دەموكراتيالىق رەفورمالار تۋرالى ەۋروپالىق دەپۋتاتتار ايتقان جوعارى باعانى راستادى.