ءماجىلىس دەپۋتاتى امانتاي جارقىنبەك قازاقستاندا ناسىباي ساتۋدى مۇلدەم توقتاتۋدى ۇسىندى. ول ءوز ۇسىنىسىن پرەمەر-ءمينيستردىڭ ورىنباسارى تامارا دۇيسەنوۆا مەن ىشكى ىستەر ءمينيسترى ەرجان سادەنوۆكە جولداعان دەپۋتاتتىق ساۋالىندا ايتتى, دەپ حابارلايدى astana-akshamy.kz.
دەپۋتاتتىڭ ايتۋىنشا, بۇگىندە كەز كەلگەن ادام, ونىڭ ىشىندە مەكتەپ وقۋشىلارى ناسىبايدى ەركىن ساتىپ الا الادى.
«وكىنىشكە قاراي, بۇرىن ونى تەك ەرەسەك ۇرپاق قولدانسا, قازىر جاستار, ءتىپتى قىزدار دا وعان تاۋەلدى. ولاردىڭ سانى جىل سايىن ارتىپ كەلەدى. ونىڭ ۇستىنە بۇل جاعىمسىز ادەت ءتىپتى سپورتشىلار اراسىندا دا قالىپتى جاعدايعا اينالعانىن قالاي تۇسىنۋگە بولادى؟», – دەدى دەپۋتات امانتاي جارقىنبەك.
ماجىلىسمەن بۇل ءونىمنىڭ قۇرامى كۇماندى ەكەنىن ايتىپ, ونى پايدالانۋ دەنساۋلىققا زيان كەلتىرەتىنىن ەسكەرتتى.
«شۆەد عالىمدارى زەرتتەۋ جۇرگىزىپ, ناسىبايدىڭ قۇرامىندا حروم, نيكەل, كادمي, قورعاسىن, مىشياك سياقتى حيميالىق زاتتار بار ەكەنىن انىقتادى. دارىگەرلەر ناسىبايدىڭ تاۋەلدىلىك تۋعىزىپ قانا قويماي, ءتۇرلى اۋرۋلاردى تۋدىراتىنىن اتاپ ءوتتى. ناسىبايدى تۇتىنۋ ادام اعزاسىن قاتەرلى ىسىككە, بەدەۋلىككە اكەلەتىنى عىلىمي تۇرعىلان دالەلدەنگەن. قازاق ونكولوگيا جانە راديولوگيا عىلىمي-زەرتتەۋ ينستيتۋتى ماماندارىنىڭ ايتۋىنشا, ناسىباي تارتۋ اۋىز قۋىسىنىڭ قاتەرلى ىسىگىنىڭ دامۋىنا اكەلىپ سوعادى. ولار كەيىنگى كەزدەرى ناسىبايدى تۇتىنۋدىڭ سالدارىنان جاستاردىڭ قاتەرلى ىسىك اۋرۋىyنا شالدىعاتىنىن اتاپ ءوتتى”, – دەدى دەپۋتات.
امانتاي جارقىنبەك «ەلدى ۋلاپ جاتقان بۇل ىندەتتى اۋىزدىقتاپ, ونىڭ تارالۋىن تۇبەگەيلى توقتاتۋ قاجەت» دەپ ەسەپتەيدى.
«ەلىمىزدە زاڭمەن شەكتەۋ قويىلعانىمەن, ونى جۇزەگە اسىرۋدا السىزدىك تانىتىپ وتىرمىز. سوندىقتان ۇلت دەنساۋلىعىنا نۇقسان كەلتىرەتىن, ۇرپاعىمىزدى ۋلاپ جاتقان قازاق حالقىنا جات ادەتتەن ارىلۋىمىز كەرەك. ارنايى ورگاندار وسكەلەڭ ۇرپاقتى ۋلاپ جاتقان ساۋدا نۇكتەلەرىنە قاتىستى شەشىم قابىلداپ, كەشەندى شارالار قابىلداۋى كەرەك», – دەدى دەپۋتات.
