قازاقستاندا سوڭعى ءتورت ايدا كوروناۆيرۋس ينفەكتسياسى 16 ەسە ازايدى. تامىز ايىنداعى اپتاسىنا 56120 جاعدايدان جەلتوقسان ايىندا اپتاسىنا 3524 جاعدايعا دەيىن تۇسكەن. رەپرودۋكتيۆتى كورسەتكىش 0,90-دى قۇراپ, تامىز ايىمەن سالىستىرعاندا 1,2 ەسەگە تومەندەگەنى بايقالادى.
بۇل تۋرالى دەنساۋلىق ساقتاۋ ءمينيسترىنىڭ مىندەتىن اتقارۋشى جاندوس بۇركىتباەۆ ۇكىمەت وتىرىسىندا ەلدەگى سانيتارلىق-ەپيدەميولوگيالىق جاعداي تۋرالى باياندادى. وسى رەتتە ينفەكتسيالىق جانە رەانيماتسيالىق توسەكتەردىڭ قامتىلۋى 19 پايىزدى قۇرايدى. بۇگىنگى تاڭدا 9 ملن-نان استام ادام ءبىرىنشى كومپونەنتپەن ەگىلدى: بۇل – ەرەسەك تۇرعىنداردىڭ 80 پايىزى, 8,4 ملن-نان استام ادام نەمەسە ەرەسەك تۇرعىنداردىڭ 75 پايىزى – ەكىنشى كومپونەنت. جاسوسپىرىمدەردى, جۇكتى جانە بالا ەمىزەتىن ايەلدەردى Comirnaty (Pfizer) ۆاكتسيناسىمەن ەگۋ جالعاسۋدا. دەنساۋلىق ساقتاۋ مينيسترلىگىنىڭ مالىمەتىنشە, بۇگىنگى تاڭدا ءبىرىنشى كومپونەنتپەن 235117 ادام ۆاكتسيناتسيالاندى, ونىڭ ىشىندە 187315 ءجاسوسپىرىم جانە 47786 جۇكتى جانە بالا ەمىزەتىن ايەلدەر. ەكىنشى دوزاسىمەن 66017 ادام ەگىلگەن. سونىمەن قاتار رەۆاكتسيناتسيانى ەلىمىزدىڭ 303 مىڭ ازاماتى الدى.
