بىرەر كۇن بۇرىن سىبايلاس جەمقورلىققا قارسى كۇرەس جونىندەگى ۇلتتىق بيۋرو قازاقستاننىڭ وزبەكستانداعى ەلشىسى ەرىك وتەمباەۆتىڭ اسا ءىرى كولەمدە بيۋدجەت اقشاسىن ۇرلادى دەگەن كۇدىككە ىلىنگەنىن حابارلادى. قۇزىرلى مەكەمەنىڭ رەسمي وكىلى جاننا باستاروۆا ە.وتەمباەۆتىڭ وزبەكستانداعى ەلشىلىگىمىزدىڭ اكىمشىلىك عيماراتىنىڭ قۇرىلىسى بويىنشا جالعان اكتىلەرگە قول قويعانىن راستادى. زاڭسىز ءىس-قيمىلدىڭ سالدارىنان ەلىمىزگە 140 ميلليون تەڭگەدەن اسا زيان كەلگەن. ءسال كەيىنىرەك سىرتقى ىستەر مينيسترلىگىنىڭ ءباسپاسوز قىزمەتىنىڭ جەتەكشىسى ايبەك سمادياروۆ «وتەمباەۆتىڭ ءىسى» اسا ءىرى كولەمدە پارا الدى دەپ ايىپتالعان سىرتقى ىستەر مينيسترلىگىنىڭ بۇرىنعى جاۋاپتى حاتشىسى اناربەك قاراشەۆتىڭ تۇتقىندالۋىمەن بايلانىستى ەكەنىن مالىمدەدى.
سىرتقى ىستەر ءمينيسترى قايرات ءابدىراحمانوۆ جەمقورلىققا قاتىستى جانجالدىڭ ەلىمىزدىڭ حالىقارالىق بەدەلىنە ەشقانداي نۇقسان كەلتىرمەدى دەپ سانايدى. «نۇقسان كەلەدى دەپ ويلامايمىن. ءبىزدىڭ ءوزىمىز بۇل ءىستىڭ اشىق, ءادىل تەرگەلۋىنە جانە كەلەشەكتە مۇنداي وقيعالاردىڭ قايتالانباۋىنا مۇددەلىمىز» دەدى مينيستر جۋرناليستەرگە بەرگەن جاۋابىندا. ال جۋىردا قازاقستان پرەزيدەنتىنىڭ جارلىعىمەن ەرىك وتەمباەۆتىڭ اتقارعان قىزمەتىنەن شەتتەتىلگەنى ءمالىم.
«وتەمباەۆتىڭ ىسىنە» وراي, ءبىز قازاقستاندىق ديپلوماتتاردىڭ قاتىسۋىمەن ورىن العان بۇرىنعى جانجالداردى ەسكە ءتۇسىرۋدى ءجون كوردىك. ەدىرەڭدەگەن ەلشىلىكتەگىلەر جانجالداردان رەكورد جاساعان جىلى – 2011. ناۋرىز ايىندا ۇلىبريتانياداعى قازاقستان ەلشىلىگىنىڭ ءۇشىنشى حاتشىسى راحات تۇرلىحانوۆتى ەلگە قايتاردى. ول لوندوندا بىرنەشە مارتە جول ءجۇرۋ, اۆتوكولىكتى تۇراققا قويۋ ەرەجەلەرىن بۇزىپ, ايىپپۇل تولەدى. سول ايدا قازاقستاننىڭ بەرليندەگى ەلشىلىگىنىڭ اتتاشەسى دانيار اتانوۆ تاكسيشىمەن توبەلەستى. ول جۇرگىزۋشى قىمبات سۇرادى دەپ جول اقىسىن تولەۋدەن باس تارتقان. قاتاڭ سوگىس العان ديپلوماتتى ەلگە شاقىرتتى. ءساۋىر ايىندا قازاقستاننىڭ يۋنەسكو جانىنداعى وكىلىنىڭ كەڭەسشىسى ۆالەري تولماچەۆ پاريجدەن ريمگە ۇشاققا ءمىنىپ, اۋە كەمەسىن ليۆيا استاناسىنا قوندىرۋدى تالاپ ەتتى. ستيۋاردەسسانىڭ تاماعىن كىشكەنە پىشاقپەن تىلگەن وتانداسىمىزدى يتاليان پوليتسياسى تۇتقىندادى. 2013 جىلى گەرمانيادا باس كونسۋلىمىز احات الپىسباەۆ پەن ونىڭ كومەكشىسى قايرات ادىروۆ تۇتقىندالدى. سالىق سالىنبايتىن تەمەكىنى تاسىمالداعان ديپلوماتتار 2 جىل 8 ايعا سوتتالدى. 2014 جىلى نورۆەگياداعى قازاقستاننىڭ كونسۋلى قۋانىش اعايداروۆقا الكوگول ونىمدەرى مەن قىزمەتتىك قۇجاتتاردى ۇرلادى دەگەن ايىپ تاعىلدى. كوپ ۇزاماي ول وسلودان ەلگە قايتتى. 2016 جىلى قازاقستاننىڭ ۇندىستانداعى ەكس-كونسۋلى ءراشيد راحىمبەكوۆ 1 جىل 6 ايعا باس بوستاندىعىنان ايرىلىپ, 26 ميلليون تەڭگە ايىپپۇل تولەدى. سويتسە, ول باتپانقۇيرىق قىزمەتىن پايدالانىپ, ءۇندىستان ازاماتتارىنا زاڭسىز جولمەن 1700 ىسكەرلىك ۆيزا بەرىپتى. ءبىزدىڭ ەلشىلەر مەن ديپلوماتتاردىڭ باسى داۋدان ارىلمايتىنى نەسى ەكەن؟..
