استانادا قازاقستان بوكسىنىڭ 85 جىلدىعى اتالىپ ءوتىلدى. بوكس, بىلە بىلسەك, قازاقتىڭ وڭ جامباسىنا قونعان, ۇلتتىق سپورتىنا بالانعان ونەر دەسەك تە جاراسادى. قازاقستان بىلعارى قولعاپ شەبەرلەرى الەمدىك دەڭگەيدەگى بايراقتى باسەكەلەردەن قۇرالاقان قايتقان ەمەس. سەرىك قوناقباەۆ, ۆيكتور دەميانەنكو, ۆاسيلي جيروۆ, بەكزات ساتتارحانوۆ, ەرماحان ىبىرايىموۆ, باقتيار ارتاەۆ, باقىت سارسەكباەۆ, سەرىك ساپيەۆ, دانيار ەلەۋسىنوۆ سىندى شارشى الاڭنىڭ شەبەرلەرى شىن مانىندە حالقىمىزدىڭ ماقتانىشى بولىپ سانالادى.
سپورت الەمىنىڭ شىڭى – وليمپيادا ويىندارىنان قازاقستان بوكسشىلارىنىڭ 7 التىن, 6 كۇمىس, 11 قولا مەدال العانى, سونىمەن قاتار ءۇش قازاقستاندىق بىلعارى قولعاپ شەبەرىنىڭ «باركەر كۋبوگىنىڭ» يەگەرى بولعانى ەل سپورتىنىڭ مەرەيىن ۇستەم ەتكەنى ايقىن. سونداي-اق الەم چەمپيوناتتارى مەن قۇرلىق بىرىنشىلىكتەرىندە دە قازاق بوكسشىلارى كوپتەگەن جۇلدەگە قول سوزدى. الەمدىك شارشى الاڭدا كوك تۋىمىزدى كوككە كوتەرگەن بوكسشىلارىمىز حالقىمىزدىڭ ماقتانىشىنا اينالىپ ءجۇر. مۇنداي كورسەتكىش باسقا سپورت تۇرلەرىنەن ازىرگە بولعان ەمەس.
ەل سپورتىنىڭ بيىك كورسەتكىشىنە ەلوردامىز استانا قالاسىنىڭ قوسىپ جاتقان ۇلەسى دە ايتارلىقتاي. كەزىندە كسرو بىرىنشىلىكتەرى مەن حالىقارالىق جارىستاردا ولجا سالعان رومان كاسپەر, ۆاسيلي سكۋب, تاگير ايتباگينوۆ, نيكولاي كۋمپان, كاميل حابيبراحمانوۆ, اعايىندى بەرىك, ەرىك جانە ەرمەك مارجىقپاەۆ, ماۋلەن, مۇرات جانە مارات مۇستافيندەر, جانات, قايرات جانە مارات ماناشەۆتەر, ابىلاي يسكاكوۆ, رامازان تۇلكىباەۆ, ەركىن بەكسەيىتوۆ, اقىلبەك نۇرماعانبەتوۆ, باۋىرجان تاڭجارىقوۆ, بولات ابدراحمانوۆ, يسلام گويگوۆ جانە باسقا دا جىگىتتەر سالعان اقجولتاي ءىزدى كەيىنگى تولقىنمەن كەلگەن جاستار دا ساتىمەن جالعاستىرا ءبىلدى.
قازاقستان ۇلتتىق قۇراماسى ساپىندا ەل نامىسىن قورعاعان ەلوردالىق دانيار ەلەۋسىنوۆ, گەننادي گولوۆكين, ۆاسيلي لەۆيت, مەرەي اقشالوۆ, مارينا ۆولنوۆا, ءلاززات كۇنگەيباەۆا, ۆالەنتينا حالزوۆا, قانات ابۋتاليپوۆ, جەڭىس نۇرعوجين, نۇرجان كارىمجانوۆ, ءىلياس سۇلەيمەنوۆ, دانيار تولەگەنوۆ, ازات ماحمەتوۆ, راحات مارجىقپاەۆ, سادريددين احمەدوۆ, نۇربەك, ايبەك ورالبايلار جانە باسقا دا بوكسشىلار وليمپيادا ويىندارىنان باستاپ, الەم چەمپيوناتتارى مەن ازيا دودالارىندا توپ جاردى. وسى بوكسشىلار اراسىنان وليمپيادا ويىندارىنىڭ ءبىر چەمپيونى, ەكى كۇمىس جانە ءبىر قولا جۇلدەگەرى, سەگىز الەم چەمپيونى شىقتى.
ارينە, سپورتشىنىڭ جەڭىمپاز بولۋى كوپ رەتتە كوزگە كورىنە بەرمەيتىن باپكەرلەردىڭ ەڭبەگىنە بايلانىستى بولاتىنى بەلگىلى. جاقسى جاتتىقتىرۋشى جەڭىسكە جول سالاتىن نەگىزدى قالايدى. بۇل رەتتە بۇرىنعى اقمولا مەن بۇگىنگى استانانىڭ بوكسىن ورگە سۇيرەگەن مايتالمان باپكەرلەر دە جەتكىلىكتى. بۇل رەتتە قانبەك بايعۇلوۆ, سەرگەي تۋرچاك, اناتولي تەن, جانات ماناشەۆ, بەرىك مارجىقپاەۆ, مارات ەلەۋسىنوۆ, ماۋلەن مۇستافين, ۆلاديمير كاماشوۆ, بەيبىت ماساباەۆ جانە باسقا دا باپكەرلەردىڭ ەسىمى ۇلكەن قۇرمەتپەن اتالادى.
ءيا, الەمدەگى ۇزدىك قۇرامالاردىڭ الدىڭعى قاتارىنان كورىنىپ جۇرگەن قازاقستان بوكسىنىڭ مەرەيى ۇستەم بولا بەرەتىنىنە قازاق جانكۇيەرى سەنىممەن قارايتىنى ءسوزسىز.
