استانا قالاسى اكىمدىگىنە قاراستى جۇمىسپەن قامتۋ ورتالىعى كەشە تۇلەكتەرگە ارنالعان بوس جۇمىس ورىندار جارمەڭكەسىن وتكىزدى. ايتۋلى شاراعا س.سەيفۋللين اتىنداعى قازاق اگروتەحنيكالىق ۋنيۆەرسيتەتىن ەلەكتروەنەرگەتيكا, راديوتەحنيكا, ەلەكترونيكا جانە تەلەكوممۋنيكاتسيا ماماندىعى بويىنشا وقۋىن بيىل بىتىرگەن جاستار قاتىستى.
شاعىن-اۋكتسيونعا تەحنيكا سالاسىنداعى 5 كاسىپورىن 20 شاقتى بوس جۇمىس ورنىن ۇسىندى. «مەكەمەمىز جول قوزعالىسىن رەتتەۋمەن اينالىسادى. باعدارشامدىق شارۋاشىلىق بولىمىنە ينجەنەر-ەلەكتريك قاجەت. تاجىريبەسى جوق جاس ماماندى جۇمىسقا تارتىپ كورمەكشىمىز. ولارعا وسى ءىستىڭ قىر-سىرىن ۇيرەتەتىن كاسىبي جەتەكشىنى بەكىتەمىز. ەڭ باستى تالاپ – جوعارى ءبىلىمنىڭ بولۋى. ەڭبەكاقى – 130 مىڭ تەڭگە» دەيدى كادر قىزمەتكەرى يرينا بويكو.
جارمەڭكەنىڭ ۋاقىتى ديپلومدى سالتاناتتى تۇردە تابىستاۋ راسىمىمەن تۋرا كەلگەندىكتەن, بىتىرۋشىلەردىڭ بار زەيىنى كوپتەن كۇتكەن ءساتتى تويلاۋدا بولدى. وكىنىشكە قاراي, جۇمىس بەرۋشىلەردىڭ ۇسىنىس ۇستەلىنە قىزىعۋشىلىق تانىتقاندار قاتارى كوپ بولا قويعان جوق. «تۇلەكتەر قازىر قۋانىش ۇستىندە. ديپلومدارى قولىنا ءتيدى. «ءبارى ءبىزدى قۇشاق جايا قارسى الادى» دەپ اسىقپايدى. ادەتتە جاستار ەڭبەك نارىعىنداعى باسەكەلىستىكتى كۇزدە عانا ۇعادى. سول كەزدە جان-جاقتان جۇمىس ىزدەپ, شيراق قيمىلداي باستايدى» دەيدى جۇمىسپەن قامتۋ ورتالىعىنىڭ مامانى ارداق جەكسەمبينا.
ونىڭ ايتۋىنشا, تەحنيكا سالاسىنداعى جۇمىس بەرۋشىلەر وسىنداي شاقىرتۋلاردى قۋانا قابىلدايدى. جۇمىس بەرۋشىلەردىڭ اراسىندا جاس ماماندى ءوز قاراجاتىنا وقىتىپ, جۇمىسپەن قامتۋعا ءمۇددەلى كاسىپورىندار دا بار ەكەن. ءماسەلەن استاناداعى ءبىرقاتار عيماراتتى ورتكە قارسى قۇرىلعىلارمەن جابدىقتايتىن كاسىپورىننىڭ ءبىرى ينجەنەر-جوبالاۋشى قىزمەتىنە قاعىلەز جاستاردى ىزدەپ كەلىپتى. «قازاتۋ-دىڭ ءبىلىم بەرۋ جۇيەسىنە ريزامىز. ولاردان جاقسى ينجەنەرلەر شىعادى. تەوريالىق بىلىمدەرى تەرەڭ, ءبىز تەك پراكتيكاعا باۋليمىز» دەيدى يننا ماگدا ەسىمدى قادر قىزمەتكەرى.
تۇلەكتەردىڭ بىرقاتارى اڭگىمەلەسۋدەن ءوتىپ, جۇمىس بەرۋشىلەرگە تۇيىندەمەلەرىن قالدىردى. ديپلومىن ەندى العان تۇلەكتەر ءۇشىن وسىنداي جارمەڭكەلەر الداعى ۋاقىتتا دا ۇيىمداستىرىلاتىن بولادى.
ءمادينا جاقىپ
