وزبەكستاندىق ولي ءماجىلىسىنىڭ زاڭ شىعارۋشى پالاتاسى دەلەگاتسياسى استاناعا رەسمي ساپارى اياسىندا قازاقستان حالقى اسسامبلەياسى وكىلدەرىمەن كەزدەستى.
ولي ءماجىلىسىنىڭ زاڭ شىعارۋشى پالاتاسى سپيكەرى نۋردينجون يسمويلوۆ باستاعان باۋىرلاس مەملەكەت دەلەگاتتارى ەلورداداعى دوستىق ءۇيى مەن وزبەك ەتنومادەني ورتالىعىن ارالاپ, ولاردىڭ قىزمەتىمەن تانىستى.
– قالامىزداعى وزبەك ەتنومادەني ورتالىعى 2007 جىلى اشىلعان. ول استاناداعى ەڭ بەلسەندى بىرلەستىكتەردىڭ ءبىرى. بۇل ورتالىقتاعىلار شاھارداعى اۋقىمدى ءىس-شارالارعا ارقاشان بەلسەنە اتسالىسادى. قازىرگى تاڭدا مۇندا حالىقارالىق جانە رەسپۋبليكالىق جارىستاردا توپ جارىپ جۇرگەن «پويتاحت» جانە «استانا عۋنچالاري» اتتى ەكى ونەر ۇجىمى بار, – دەدى استانا قالاسى اكىمىنىڭ ورىنباسارى ەرمەك امانشاەۆ. سونداي-اق ول قحا وكىلدەرى ۇيىمداستىراتىن قايىرىمدىلىق اكتسيالارىنا وزبەك ەتنومادەني ورتالىعى تۇراقتى تۇردە قولداۋ كورسەتىپ وتىراتىنىن جەتكىزدى.
اتالمىش ورتالىقتىڭ توراعاسى شەرزود پۋلاتوۆتىڭ ايتۋىنشا, مەكەمە جانىندا وزبەك جەكسەنبىلىك مەكتەبى جۇمىس ىستەيدى. وندا بالالار قازاق جانە وزبەك تىلدەرىن
ۇيرەنىپ, قوس ۇلتتىڭ تاريحى مەن مادەنيەتىن تەرەڭدەتە وقيدى.
– باستاپقىدا بەلسەندى ازاماتتارىمىزدىڭ سانى بار بولعانى 15 شاقتى عانا ەدى, بۇگىندە ولار 200-گە جەتىپ وتىر. بۇل – ءبىزدى العا باسۋعا شابىتتاندىراتىن تاماشا كۇش, – دەدى ش. پۋلاتوۆ.
ەتنومادەني بىرلەستىكتەگىلەر وزبەكستاننىڭ قازاقستانداعى جىلى بارىسىندا اۋقىمداعى ىستەر اتقارىپ, باۋىرلاس ەلدەر دوستىعىنىڭ ودان ءارى نىعايۋىنا قوماقتى ۇلەس قوستى. ەندى ولار قازاقستاننىڭ وزبەكستانداعى جىلىنا قىزۋ دايىندىق ۇستىندە.
– بۇل ءبىز ءۇشىن ماڭىزدى وقيعا بولعالى تۇر. ءبىز جاس كوشباسشىلار فورۋمى مەن ءبىلىم الۋعا باعىتتالعان ەكسكۋرسيا سياقتى قىزىقتى ءىس-شارالاردى ۇيىمداستىرۋدى جوسپارلاپ جاتىرمىز, – دەدى وزبەك ەتنومادەني ورتالىعىنىڭ مۇشەسى فارانگيز احمەدوۆا.
ءوز كەزەگىندە قوناقتار اتىنان ن.يسمويلوۆ قحا وكىلدەرىنە وسىنداي جىلى كەزدەسۋ ءۇشىن جۇرەكجاردى العىسىن ءبىلدىردى.
