ەركەعالي راحماديەۆ اتىنداعى مەملەكەتتىك اكادەميالىق فيلارمونيا «All the Jazz» كونتسەرتىن ۇسىندى. كەش بارىسىندا اۆستريادان ارنايى شاقىرىلعان تالانتتى مۋزىكانت سەرگەي كيم (فورتەپيانو) جانە ۇرلەمەلى وركەستر ونەر كورسەتتى.
سەرگەي كيم – ا.سكريابين (رەسەي) اتىنداعى V حالىقارالىق فورتەپيانوشىلار بايقاۋىنىڭ, Theresa Liacuna (فرانتسيا) اتىنداعى حالىقارالىق بايقاۋدىڭ, Citta di San Dona di Piave حالىقارالىق فورتەپيانو بايقاۋىنىڭ (يتاليا), Grand Piano Virtuoso حالىقارالىق فورتەپيانو بايقاۋلارىنىڭ لاۋرەاتى. ول بەدەلدى Royal Albert Hall (لوندون) زالىندا جەكە كونتسەرت بەردى.
قۇرمانعازى اتىنداعى قازاق ۇلتتىق كونسەرۆاتورياسىن (قازاقستاننىڭ حالىق ءارتىسى ءجانيا اۋباكىروۆانىڭ شەبەرحاناسى) ۇزدىك بىتىرگەن سەرگەي كيم لينتس قالاسىنداعى انتون برۋكنەر اتىنداعى اۆستريانىڭ مۋزىكا, بي جانە اكتەرلىك ونەر ۋنيۆەرسيتەتىنىڭ ماگيستراتۋراسىندا وقۋىن جالعاستىردى. مۋزىكانت قازاقستاندا, رەسەيدە, گەرمانيادا, اۆستريادا, يتاليادا, چەحيادا جانە فرانتسيادا كونتسەرتتىك قىزمەتتە بەلسەندى قىزمەت اتقاردى. قازىرگى ۋاقىتتا اۆستريا مەملەكەتتىك مۋزىكا مەكتەبىنىڭ وقىتۋشىسى, سونىمەن قاتار ا.برۋكنەر اتىنداعى مۋزىكا, بي جانە اكتەرلىك شەبەرلىك ۋنيۆەرسيتەتىندە كونتسەرتمەيستەر-وقىتۋشىسى.
ۇرلەمەلى وركەستردىڭ كوركەمدىك جەتەكشىسى نيكيتا پوچيتالين سوڭعى ەكى جىلدا جانكۇيەرلەرىنەن دجاز باعىتىندا كونتسەرت بەرۋ تۋرالى وتىنىشتەر كوپ بولعانىن ايتادى. «دجاز شىعارمالارى ۇرلەمەلى وركەستر ورىنداۋىندا ەرەكشە ناقىشتا ەستىلەدى. ال قىزىقتى, ءارى زاماناۋي شىعارماشىلىق ءتاسىل رەتىندە ءبىز اۆستريادان ءوز سالاسىنىڭ شەبەرى, پيانيست سەرگەي كيمدى شاقىردىق» دەيدى ن.پوچيتالين.
«All the Jazz» كونتسەرتتىك باعدارلاماسىنا دجوردج گەرشۆيننىڭ «پورگي مەن بەسس» وپەراسىنىڭ «كوگىلدىر راپسوديا» جانە «سيۋيتا» شىعارمالارى, گلەن ميللەردىڭ «اي سەرەناداسى», لۋيس پريمانىڭ «شىرقا, شىرقا, شىرقا», دەيۆ برۋبەكتىڭ «Take Five» سياقتى تانىمال دجاز كومپوزيتسيالارى كىردى.
